Categories
في البيت

شرح تيكيت الملابس

كلنا بنعانى من المشكلة دى لما بنجيب لبس جديد و نيجى نغسله أول مرة. مش عارفين نغسله علي البارد و لا ينفع سخن؟ طيب و العصر هيبوظه و ممكن يكش؟ المكواه نعليها عادى و نكوى و لا القماشة دى مش بتتكوى أصلاً و ممكن تبوظ.
اجابة الأسئلة دى كلها هتلاقيها موجودة عندك فى شكل رموز بسيطة على تيكيت فى كل الملابس.
هتبصى عليها بس هتفهمى ازاى تتعاملى مع كل قطعة ملابس و حافظى على لبسك جديد.

هتلاقى 5 علامات أساسية هما:
الغسيل
التبييض
التجفيف
الكوى (استعمال المكواه)
التنظيف الجاف dry cleaning

كل علامة جواها رموز مختلفة ليها معنى.

الغسيل

علامة على شكل حوض مليان مياه و دى اللى بتقولنا نغسل قطعة الملابس دى ازاى.
عشان نعرف درجة الحرارة المناسبة هنلاقى مكتوب فى نص الحوض ده رقم، الرقم ده هو درجة الحرارة اللى المفروض نغسل عليها، هتساعدك جداً لو غسالتك ممكن تظبطي درجة الحرارة لكل برنامج، يبقي تظبطيها و خلاص.
ممكن بدل الرقم تلاقى نقط من 1 ل 6 نقط، كل مايكون عدد النقط أقل هنقلل درجة الحرارة.
نقطة واحدة = 30 درجة
نقطتان = 40 درجة
أربع نقط = 60 درجة
خمس نقط = 70 درجة
ست نقط = 95 درجة
لو فيه خط واحد تحت رمز الغسيل يعنى القماش ده فيه مواد كيميائية بتمنع الكرمشة و تحافظ على شكله الأصلى و دى عادة بتطلع من الغسالة مش بتحتاج مكواه.
لو فيه خطين تحت رمز الغسيل، لازم نشغل دورة غسيل خفيفة عشان غالباً بتبقى دورة ألياف حساسة زى الصوف و الحرير و ممكن تتضرر من دورة غسيل قوية.
لو فيه شكل أيد جوه الحوض بتاع رمز الغسيل، هنا ضرورى نغسل يدوى بدل الغسالة و نستعمل مسحوق مخصوص للغسيل اليدوى.
لو فيه علامة X على رمز الغسيل، ده معناه انها هتحتاج تنضيف جاف.

Bleaching التبييض

سهل جداً، مجرد شكل مثلث.
لو فاضى يبقى ممكن نستعمل كل أنواع مبيضات الملابس من كلور، فانيش، أى حاجة. بس طبعاً عند اللزوم مش علي طول.
لو المثلث فيه خطين يعنى نستخدم الأنواع الخالية من الكلور، نقرا على ضهر المنتج انه خالى من الكلور و البديل ليه هنلاقى مادة اسمها هيدروجين بروكسيد فى الفانيش و أمثاله و دى هايلة مع البقع و بتعمل تطهير كمان.
لو المثلث لونه أسود و عليه علامة X يعنى ممنوغ نستخدم أى نوع من المبيضات.

Drying التجفيف

رمز التجفيف هو مربع جواه دائرة.
زى ما قلنا مع رموز الغسيل عدد النقط جوه الدوايرهيعرفنا درجة الحرارة المطلوبة لدورة الغسيل.
تلات نقط = تجفيف على درجة حرارة عالية
نقطتان = درجة حرارة متوسطة
نقطة واحدة = درجة حرارة منخفضة
لو فيه علامة X على رمز التجفيف يبقى لازم تسيبي الهدوم تنشف لوحدها على المنشر أو حبل الغسيل.
و اكيد التجفيف هنا مقصود بيه استخدام المجفف، او دورة التجفيف في الغسالة. ده غير العصر، دورة العصر بيتطبق عليها نفس بروجرام الغسيل.

Ironing الكى

علامة مكواه شكلها واضح.
رموز المكواه ماشية بنفس نظام النقط لظبط مستويات الحرارة.
أقل عدد نقط يعنى أقل درجة حرارة فى المكواه و العكس صحيح.

Dry Cleaning التنضيف الجاف

رمز التنضيف الجاف عبارة عن دايرة بس كده.
دى معناها بلاش تتغسل كتير فى الغسالات العادية.
و ده مش معناه انها محتاجة متخصص بس محتاجة معاملة خاصة.
عموماً أنا مش بحب المجازفة، و أفضل انى أوديها للتنضيف الجاف، أمان أكتر.
لو فيه علامة X على الدايرة يعنى ممنوع التنضيف الجاف و نغسل فى الغسالة عادى.

فى الأخر نصيحتى ليكى أى قطعة ملابس مترددة فى طريقة غسيلها، اغسليها على أيدك و سيبيها تنشف فى الهوا. اتباع ارشادات تنضيف الملابس اللي بتبقي علي التيكيت بتحافظ علي عمر قطعة الملابس، و بتمنع ان اللون ينزل في الغسيل او ان حجمها يتغير.

Leave a Reply

Your email address will not be published. Required fields are marked *