Categories
رمضانيات

شرائح اللحم بصوص الصويا و الخضار

الوصفة دى لحمة بالخضار للناس اللى بتدور على أكلة خفيفة بس يهمها الطعم يكون مختلف، مش أى خضار مسلوق و لحمة. أنا بحب آكل و استمتع بالأكل، و اللى يسمع اتغديت خضار و لحمة يتخض كده و اصعَب عليه. بس الحمدلله الوصفة دى بشهادة كل اللى داقها تحببك فى الخضار. أهم حاجة تكونى غاوية صويا صوص أو حتى تجربى فى الوصفة دى و تشوفى بنفسك.

نصف كيلو لحمة فيلية مدقوقة رفيع و متقطعة زى الشاورما
3 فصوص ثوم مفروم
قرن فلفل حار (اختيارى)
1 بصل
2 كوسة و ممكن جزر, فلفل ألوان أى خضار موجود
بروكلى
مشروم
صوياصوص، كميته حسب الرغبة بس على الأقل معلقتين كبار
معلقة كبيرة نشا مدوبة فى نصف كوب مياه

* نتبل اللحمة بملح و فلفل و بهارات و ننزل بيها فى طاسة سخنة مش بتلزق (non-stick pan ( تاخد صدمة الأول عشان متنزلش مياه. منحطهاش كلها مرة واحدة عشان درجة حرارة الطاسة تفضل عالية.
* نضيف الثوم و الفلفل و نقلب.
* البروكلى فى حلة لوحده ننزله فى مياه مغلية لمدة دقيقة واحدة و بعدين نطلعه على مياه ساقعة عشان نوقف تسويته.
* نضيف الخضروات كلها مرة واحدة تاخد تشويحة.
* نضيف الصويا صوص و نقلب.
* لما يغلوا مع بعض نضيف النشا و نستنى دقيقة كمان عشان النشا يستوى و نطفى.
* ممكن جمبها رز أبيض، بطاطس بيوريه أو حتى مكرونة مسلوقة تتقلب معاها.