Categories
في المراية

سكرب و ماسك الشوفان و العسل لتنشيط البشرة

السكرب ده لطيف جداً على البشرة، هو صحيح شكله كأنك بتحضرى فطار بس هتشوفى فرق من اول استخدام. انا بعمل السكرب ده قبل الميكاب لو عندى حاجة مهمة او نازلة بالليل. لو عندك وقت ممكن تتقليه شوية بأنك تحطى نص كمية المياه او اقل و تستخدميه كماسك.

الشوفان بيشيل الخلايا الميتة و هو منظف طبيعي للجسم، بالتالى هيسحب كل الزيوت و الأوساخ من البشرة. العسل مرطب و غنى بمضادات الأكسدة اللى بتحفز الدورة الدموية و تقلل من التجاعيد. الليمون معاهم بيقلل من الهالات السودة و بيعادل لون البشرة.

¾ كوب شوفان، حبوب كاملة مش مطحون او سريع التحضير

¼ كوب عسل

¼ كوب مياه

1 معلقة صغيرة عصير ليمون

قلبى المكونات كلها مع بعض، ممكن تديهم ضربة سريعة فى الخلاط عشان توفرى وقت.

السكرب ده مش سميك، هينقط فى كل حتة و انتى بتحطيه. ننصحك تقفى قدام الحوض و تحضرى فوطتك جنبك.

ماسك شوفان عسل

ادعكى بيه بشرتك براحة جدا فى حركة دائرية. حطى منه شوية شوية لحد ما تحسى ان بشرتك انتعشت.

خلاص! اشطفى بشرتك بمياه فاترة و نشفى بدون ما تشدى الجلد.

لو اتبقى منك كمية ممكن تحفظيهم فى برطمان ازاز فى التلاجة لـ4 ايام.