Categories
في المراية

سكرب الشوفان لتنضيف البشرة

لما بحس ان الروتين اليومى بتاعى مش مرطب و منضف بشرتى كفاية بألجأ للسكرب ده. 3 مكونات بس؛ شوفان و عسل و زيت اللوز الحلو.

الشوفان بينضف و بيشيل الخلايا الميتة. و بيهدى البشرة لو فيها حبوب او ملتهبة.

العسل فيه مضادات للأكسدة و مضاد حيوي طبيعى بينقى البشرة و بيعالج اى مشاكل ظهرت، ده غير انه مرطب.

زيت اللوز الحلو ميزته انه مش تقيل، على عكس زيوت تانية كتير. بينضف المسام و بيغذيها.

انا بأحب السكرب ده خصوصاً فى الشتا. لأنه بيعالج جفاف البشرة و البقع الحمرا اللى بتظهر بسبب الجفاف او قلة شرب المياه.

½ كوب شوفان

¼ كوب عسل

2 معلقة كبيرة زيت اللوز الحلو

قلبى كله مع بعض لحد ما يبقى سميك و متجانس. ممكن تستعملى اى نوع شوفان عندك، مجروش او كامل.

ممكن تزودى زيت لوز او مياه لو حاسة انه ناشف او تزودى شوفان او حاسة انه خفيف.

افركى بيه وشك و اتأكدى انك غطيتى كل المناطق.

سييه 4 لـ 5 دقايق

افركى بيه مرة كمان قبل ما تشطفيه بمياه فاترة