Categories
في المراية

زيت جوز الهند و العناية الشخصية

فجأة كل اخصائيين الجمال و التغذية بدأوا يهتموا بالجانب الطبيعى للعناية الشخصية و بقى اسهل انك تلاقى وصفات طبيعية للعناية ببشرتك و شعرك و ضوافرك. زيت جوز الهند بقى عليه تركيز كتير مؤخراً عشان خصائصه الممتازة كمرطب و مضاد للأكسدة و مضاد للبكتيريا. ممكن تستعمليه ازاى؟

١. مرطب للبشرة: زيت جوز الهند بيبقى ماسك نفسه زى الكريمات و هو فى درجة حرارة الغرفة. بس اول ما بيلامس حرارة الجسم بيدوب. ميزته ان البشرة بتتشربه بسرعة، و بيرطب بعمق و بدون مواد كيميائية طبعا. ممكن كمان تعملى بيه ماسك خفيف للبشرة قبل النوم. حبة صغيرين، تدفيهم بأيدك و بعدين تدهنى بيه وشك. تسيبيه 5 دقايق. بعدها تمسحى الزيادة بمنديل. بخفة عشان متشيليش كله. الصبح بقى ابقى اغسلى وشك منه.

٢. بيحارب التجاعيد: آمن تماما انك تستخدميه حوالين عينيكى. نقطة منه و تدلكى بيها منطقة تحت العيون و سيبيه طوال الليل. هتصحى حاسة بأنتعاش و هتشوفى مع الوقت الخطوط الخفيفة اللى حوالين العينين و فى الجبهة و هى بتختفى.

٣. مزيل للمكياچ: حتة صغيرة على قطنة هتدوب كل المكياج، خاصة مكياج العيون و الووتربرووف. احسن من اى مزيل مكياج فى السوق، أولاً لأنه مفيهوش اى مواد كيميائية. ثانياً ممكن تستخدميه لأى نوع بشرة. ثالثاً مش هيحرق عينيكى. رابعاً هو أصلاً مرطب فمش هينشف بشرتك. حركى القطنة حركة دائرية لحد ما كل المكياچ يطلع، بعدها اشطفى وشك بفوطة مبلولة مياه دافية.

٤. بعد ازالة الشعر: خدى دش دافى بعد ما تخلصى و حطى طبقة خفيفة جداً من زيت جوز الهند، و البشرة لسه رطبة. ممكن تحطيه على جسمك كله. هيحبس الترطيب و يزود عليه تغذيه. و هيحسسك بنعومة اكبر.

٥. مرطب للشفايف: اللى احنا أصلاً فى الآخر بناكله و مليان مواد كميائية، زيت جوز الهند صالح للأكل و مغذى كمان. ده الى جانب انه بيوفر حماية من الشمس. لو عايزة تزودى الترطيب اخلطى مع كل معلقتين كبار زيت جوز الهند، معلقتين كبار شمع العسل و معلقة كبيرة زبدة الشيا. دفيهم الاول على النار لحد ما كله يسيح و يمتزج. ممكن تستخدمى علبة روچ او مرطب شفايف قديمة، تكونى نضفتيها كويس اوى، و تصبى الخليط فيها. سيبيه 6 ساعات لحد ما يرجع صلب تانى.

٦. Tinted Lipstick : من مكونات طبيعية، استخدمى نفس الوصفة المرطبة و زودى عليها الوان من الطبيعة زى مياه البنجر، الكاكاو، القرفة، الكركم…

٧. ديودوران طبيعى / مزيل عرق: هو بصراحة لوحده ريحته تحفة. عشان زيت جوز الهند بيقتل البكتريا بالتالى هيمنع الروائح السيئة. ممكن تضيفي له روائح طبيعية تانية زى اللافندر او روح الورود أو المسك. ممكن تخلطى كذا حاجة على بعض و تعملى لنفسك حاجة مميزة.

٨. غسول للوجه: هتلاحظى مع استخدامه انه لطيف جدا على البشرة هتتشجعى انك تستعمليه كل يوم. ممكن تحضرى للأسبوع و تحفظيه فى برطمان ازاز. معلقة كبيرة زيت جوز الهند + 3 نقط زيت شجرة الشاى + معلقة صغيرة عسل.

٩. لحروق الشمس، او للحماية من الشمس: زيت جوز الهند SPF4 هو رقم مش كبير جنب اللى موجود فى الصيدليات لكنه كافى انه يحميكى من الشمس لفترات قصيرة فى المدينة. ممكن تحطى منه تانى لو هتتعرضى للشمس لفترات طويلة. لو بتعانى من حروق الشمس، زيت جوز الهند هيسرع من علاج الجلد المتضرر و هيهدى الوجع.

١٠. زيت للمساچ: ممكن تستخدميه مع نقطتين زيت لافندر و زيت نعناع لتدليك الجسم، هيساعد على استرخاء العضلات و ريحتهم مع بعض تجنن.

١١. طارد للحشرات: معلقة كبيرة زيت جوز الهند مع نقطتين زيت نعناع و زيت روزمارى و زيت شجرة الشاى هتمنع عنك الناموس و قرايبه. آمن انك تحطيه على الوش (او الجسم كله) و للأطفال على عكس اللى بيبقى موجود فى الصيدليات.

١٢. مضاد للفطريات: يعنى ممكن تدعكى بيه رجليكي عشان يمنع تكون اى ريحة. سيبيه يمتص على الرجلين و بعدين امسحى الزيادة بمنديل. ممكن تلبسى عليه شراب لو حابة.

١٣. حبوب البرد: اللى بتطلع حوالين المناخير او الفم بعد ما تخفى من البرد. زيت جوز الهند احسن علاج ليها. لأنه فيه مضاد حيوي طبيعى هيقضى على البكتيريا اللى بيسبب ظهورها. و لأنه مضاد للفطريات هيمنع انها تسيب علامة و يسرع من علاجها.

١٤. المناطق الجافة: زى الكوع و الركب و الكعب، خاصة فى الشتا. زيت جوز الهند هيرطبها بعمق و هيحسن من ملمسها فى وقت قليل. ممكن تضيفي عليه اى نوع من الزيوت الطبيعية اللى هتدى ترطيب زيادة.

١٥. يمنع و يحارب الشعر تحت الجلد: ده بالأخص للى بتستخدم الحلاقة لأزالة الشعر. لكن مناسب لأى واحدة بتعانى من طلوع الشعر تحت الجلد اللى بيسبب حكة و هو بيطلع و بيكون حبوب مؤلمة و بتعور و انتى بتشيلي الشعر المرة اللى بعدها. عشان زيت جوز الهند فيه مضاد حيوى طبيعي هيمنع الألتهابات اللى بتسبب الحكة او الوجع، و عشان بيطرى الجلد هيخلى طلوع الشعراية اسهل و يقلل من نموها تحت الجلد.

١٦. كريم لأزالة الشعر: تدهنى منه طبقة خفيفة على المنطقة اللى هتقومى بحلاقتها. زيت جوز الهند هيقلل من احتكاك الموس بالبشرة و هيساعد الموس انه يتحرك بسهولة فيشيل الشعر اقرب للجلد. كمان هو مرطب للجلد مش هتحتاجى تحطى حاجة مرطبة بعده.

١٧. شامبو طبيعي: لو خلطتيه مع خل التفاح هينضف الشعر بعمق و يرطبه فى نفس الوقت. كل ما هتبعدى المواد الكيميائية عن شعرك هتحسى بتحسن فى ملمس الشعراية و قوتها. التساقط و التقصف هيقلوا بدرجة ملحوظة.

١٨. مرطب طبيعي للشعر: ممكن تعمليه كماسك كمان. حسب طول و تقل شعرك هتحتاجى من معلقة صغيرة لمعلقتين كبار. متسيبيهمش اكتر من ساعة على الشعر و اشطفى بمياه دافية. بينعم جداً و بيقلل التطاير. الماسك كمان بيقلل من القشرة، مع تكراره.

١٩. لتسليك الشعر: خاصة للأطفال. دفى معلقة صغيرة زيت جوز هند بين ايديكى و بعدين دلكى بيه شعرك. التسريح هيبقى اسهل مليون مرة و بدون خناق. ممكن تعملى الموضوع ده على شعر مبلول كمان بس قللى الكمية عشان الشعر ميلزقش.

٢٠. سكرب طبيعي: اخلطيه مع سكر او قهوة مجروشة و افركى بيه بشرتك. هيشيل الجلد الميت، يغذى، يرطب، يقلل الحبوب و الشعر تحت الجلد.

٢١. تنضيف فرش المكياچ: افركى الفرش بخفة بزيت جوز الهند و سيبيه ما بين ساعة لساعتين على الاكتر. المدة طويلة شوية بس عشان تديله فرصة انه يعقم و يفك المكياج المتراكم عليهم. و اى بواقى هتفضل على الفرش مش هتضر بشرتك ولا تأثر على المكياج و انتى بتحطيه. و ممكن تنفذى نفس الفكرة مع فرش الشعر.

٢٢. للأطفال، للحماية و علاج التهابات الحفاضات: دلكى على بشرة البيبي حوالى معلقة صغيرة زيت جوز الهند، هيكون طبقة عازلة على جلد البيبي و عشان فيه مضاد للفطريات و مضاد حيوى طبيعي هيقوم بعلاج اى التهابات تظهر.

٢٣. بديل الزيت و جل و مثبت للشعر: و مفيهوش اى مواد كيميائية مقارنة بأى حاجة من دول. التصفيف بيعتمد على كمية زيت جوز الهند اللى تحطيها. حبة صغيرين بين صوابعك على شعر مبلول يبقى بديل الزيت. كمية كبيرة يبقى جل. مسحة خفيفة هتمنع التطاير و تثبت الشعر.

٢٤. يحارب علامات السترتش ماركس: عشان بيرطب البشرة من العمق، فبيساعد على التأم الجلد مع تقليل العلامات. حافظى على ترطيب البشرة اثناء الحمل و بعد الولادة لحد ما تبدأ العلامات بتغيير لونها للأفتح.

تعرفى كمان ازاى تستفيدي من زيت جوز الهند فى البيت و المطبخ.

2 replies on “زيت جوز الهند و العناية الشخصية”

Leave a Reply

Your email address will not be published. Required fields are marked *