Categories
في المطبخ

زيت جوز الهند فى المطبخ

زيت جوز الهند، العالم كله بقى مهتم بيه جداً عشان فوائده الكتير و استخداماته اللى ملهاش حصر. احنا جربنا زيت جوز الهند للعناية الشخصية بالبشرة و الشعر و الاظافر و جربناه فى البيت فى التنضيف و غيره و هنقولك بقى تعملى بيه ايه فى المطبخ.

١. للتحمير و الـstir frying : او الطبخ على حرارة عالية. لأن تركيبة زيت جوز الهند مش بتتغير و تكون دهون مركبة مضرة بالعكس بيحافظ على تركيبته و مكوناته بدون ما يتأكسد تحت تأثير الحرارة. هنا نعتبره بديل صحى جداً لزيت الذرة و عباد الشمس اللى ناس كتير بتستعملهم هنا. و يحل مشكلة ان زيت الزيتون مش بيقدر يقوم بالدور ده.

٢. بديل للزبدة: لو غاوية تحطى حتة زبدة الصبح على التوست، زيت جوز الهند يعتبر بديل صحى ممتاز، و هيساعدك تحافظى على وزنك و يخلصك من احساسك بالذنب تجاه اى حاجة بالزبدة. لو استخدمتيه بدون طبخ هتحسى بطعم خفيف جداً لجوز الهند، لو طبختى بيه الطعم ده بيختفى تماماً.

٣. مع العصاير: معلقة صغيرة او اتين من زيت جوز الهند هيزودوا الفيتامينات و الغذا اللى داخلين مع الفواكه، كمان هيساعدك تحسى بالشبع لفترة اطول و يدى دفعة طاقة لو بتشربي سموزى بعد او قبل تمرين.

٤. اعملى فشار: اكتر سناك صحى فى اقصر وقت. مشكلته فى الطريقة اللى بيتحضر بيها. الميكروويف مش احسن حاجة و على النار مش دايماً بيظبط من غير دهون. الحل: حوالى معلقة كبيرة زيت جوز الهند لكل كوباية ذرة فشار. و كلميني على الريحة التحفة كمان.

٥. فى الحلويات: استبدلى الدهون الغير صحية زى السمن او الزبدة بزيت جوز الهند. و كلى الحلويات اللى نفسك فيها بدون تأنيب ضمير.

٦. اعملى جرانولا بارز فى البيت: مش محتاجة مجهود و تبقى متطمنة من ان المكونات كلها صحية. 3 كوبايات شوفان كامل + 1 كوب لوز مجروش + 2 معلقة صغيرة قرفة + 1/3 كوب عسل + ½ معلقة صغيرة ملح + 1/3 كوب زبدة جوز الهند. دوبى جوز الهند على النار الاول و انقليه فى بولة كبيرة و ضيفي لها بقية المكونات. دخليها الفرن فى قالب خبز على حرارة 180 ل15 دقيقة. فى نص الوفت لفى الصينية عشان تتأكدى من توزيع الحرارة. سيبيها تبرد نص ساعة و بعدين كسريها و استمتعى بقى.

٧. استغنى عن مشروبات الطاقة: مليانة سكر و كافيين كتير على الفاضى. على اى عصير فواكه تحبيها حطى معلقة كبيرة زيت جوز الهند و بذور شيا.

٨. عشان الاكل ميلزقش: سواء هتعملى اومليت على النار او هتخبزى كيك فى الفرن. زيت جوز الهند زي كل انواع الزيوت هيمنع التصاق الاكل.

٩. فوندو شوكولاتة صحى: ده استخدامى المفضل لزيت جوز الهند. 1 معلقة كبيرة زيت جوز الهند على كوبايتين شوكولاتة غامقة بدون سكر. على النار و قلبى لحد ما الشوكولاتة تسيح. ممكن تزودى زيت جوز الهند لحد ما يوصل للقوام اللى تحبيه. ممكن تغمسى الشوكولاتة بقطع فاكهة او بسكوت دايجستف.

One reply on “زيت جوز الهند فى المطبخ”

Comments are closed.