Categories
في البيت

ريفيو فيليبس آير فراير

ريفيو فيليبس آير فراير

الآير فراير عندي بقالها تقريباً شهرين بس و بصراحة انا مبسوطة منها جداً.

ريحتني من الوقفة قدام الزيت، خاصة في الحر. و مع الوقت كمان عرفت الوقت المظبوط لكل اكلة فبقيت أحط البطاطس مثلاً و اسيبها مع نفسها و اكمل عمل باقي الاكل. تقريباً بنساها لحد ما ترن انها خلصت.

الموضوع احتاج شوية مجهود في الاول. اول مرة عملت بطاطس طازة فيها حرقت الأطراف عشان الحرارة كانت عالية. جربت اعمل بانيه من غير ولا نقطة زيت و استوي حلو بس البقسماط بره فضل زي ما هو 🙈. مغامرات 😆

البطاطس طازة او مجمدة بتدخل زي ما هي من غير زيت. البانيه و اي حاجة عليها بقسماط أو دقيق لازم تاخد رشة زيت بالبخاخة او تتمسح بالزيت بفرشة.  

جربت كمان شويت فيها فرخة صغيرة حوالي ١.٢كج. قطعتها ٨ قطع و تبلتها من بالليل. تاني يوم صفيت التتبيلة الزيادة و دخلتها الآير فراير علي حرارة ١٦٠، خدت حوالي ساعة و طلعت مقرمشة و حمرا من بره و مستوية بتدوب من جوه.

philips air fryer

لسه عايزة اجرب اخبز فيها. اعرف ان ممكن تستخدمي فيها اي صينية مناسبة للفرن مش لازم الملحقات بتاعتها.

التنضيف بقي، ده اللي كان مخوفني الاول. لحد دلوقتي مفيش اي مشاكل. بنضفها اول بأول بمياه و صابون عادي جداً. لو فيها دهون كتير علي الشبكة بنقعها ساعة مثلاً عشان الدهون تدوب كلها. و لو شويت فيها بزود معلقة صغيرة خل مع الصابون عشان تشيل الريحة.

مرة واحدة استخدمتها مرتين ورا بعض من غير ما اخد بالي و لاحظت انها بوخت شوية في التنضيف بس طول ما هي بتتنضف اول بأول مفيش مشاكل.

تنضيف فيليبس اير فراير

العيب اللي ظهر بقي مع الوقت. و ده ظهر من باب الحب بصراحة. ان نفسي انها تاخد كمية اكبر. يعني عشان احنا عيلة صغيرة بعمل حوالي نص كيلو بانيه، ممكن ياخد وقت لحد ساعة. لأني بحط قطعتين او تلاتة بالكتير. و لو هحط كمية اكبر معناه أني لازم افتح اقلب كل القطع في النص.

مع شوية تنظيم ببدأ الاول بالحاجة اللي هتدخل الآير فراير و اكمل طبخ. مثلا ابدأ اول دور بانيه و لو هاعمل مثلا جنبه مكرونة ابدأ اسلق المكرونة و بعدين الدور التاني من البانيه و بعدين صوص المكرونة و بعدين دور بانيه و السلطة و آخر دور بانيه.

هي كبيرة شوية بس مش تقيلة يعني ممكن تشيليها و تدخليها مع كل استخدام.
و عشان توقعاتك منها تبقي مظبوطة. هي ببساطة فرن. لو انتي الفرن عندك حلو او محترفة في قلي الاكل في الفرن زي مها ممكن متحسيش انها مفيدة اوي. لو انتي وقتك ضيق او بتعملي مقليات كتير، يبقي هتفرق معاكي كتير.
عايزين وصفات الآير فراير؟ تحبوا اجرب لكم وصفة معينة؟

Leave a Reply