Categories
ريڤيوز

My carry potty ريفيو بوتي الخروج

بصراحة انا الاول كنت بدور علي بوتيت بتاعة ماذركير. كانت عاجباني فكرتها اوي. و لسه شايفة انها مناسبة جدا لتعليم التواليت بره البيت.
بس رجعت و قلت بنتي مستحيل تقعد علي كيس. مش هترضي تستخدمها أصلا. ببساطة عشان هي من نوع الأطفال اللي رفض البوتي و اتعلمت علي التواليت علي طول.
لقيت الاختراع ده علي سوق دوت كوم و قلت ده مثالي للشخصية اللي عندي.
بنستخدمه بقالنا اكتر من شهر بحاجة بسيطة. و في الفترة دي شفت تقدم كبير.
نقول المميزات الاول:
1. عشان البوتي بتتقفل زي الشنطة بالظبط فهي مسؤولية بنتي بالكامل. هي اللي طالعة نازلة شايلاها. غير إحساسها بالمسؤولية كمان بقت بتحس ان ده ملكها و لازم تستخدمه. و ده اداها شوية تشجيع زيادة.
2. شكله و هو مفرود فعلا زي التواليت. و ده كسر حاجز شكل البوتي اللي اطفال كتير مش بتحبه.
3. هي فعلا مش بتنزل ولا نقطة ولا بتطلع ريحة خالص. بمجرد ما اتقفلت خلاص.
4. وزنها خفيف و البلاستك بتاعها قوي. و حجمها مش كبير اوي. يعني ممكن تحطيها في شنطة بيبي كبيرة شوية.
5. سهلة في الاستخدام في اي حتة، في العربية، في البارك، حتي استخدمناها كام يوم في البيت عادي. بتتفتح في ثانية فعلا.
6. حجمها من جوه مش عملاق بس كفاية انه يشيل دخول التواليت من غير ما الطفل يتبل او يقع براها حاجة. و فيها جزء عالي شوية من قدام عشان الولاد. و شفت امهات بتقول انها كملت معاهم لسن ٦ سنين في حالة الطوارئ.
7. سهلة في التنضيف اوي. مش لازم أخدها كلها انضفها. باخد بس البولة و هي متغطية. و مفيش اي روائح مسكت فيها لحد دلوقتي لانها بتتنضف اول بأول. مش بستني نروح البيت عشان اغسلها. بفضيها و اشطفها في اي بنزينة او تواليت يقابلني و لما اروح بغسلها بصابون و اعقمها بخل.
8. كسرت رهبة بنتي من دخول التواليت بره البيت. بعد ما اتعودت عليها بدأت ادخلها التواليت بره بس تقعد عليها جنب التواليت. مع الوقت اتشجعت و طلبت تدخل التواليت الكبير. (احنا مسمينها التواليت البيبي 😂)

بوتي الخروج

عيوبها بقي.
1. احتجت اجيب معاها قاعدة تواليت بتطبق عشان دخول التواليت بره. بس مازلت بستخدمها هي في العربية و الخروجات الطويلة.
2. الجزء المطاطي اللي بيمنع التسريب مع الغسيل الكتير فك مني في مرة. مش ملزوق في مكانه. هي حاجة بسيطة بس بقيت حذرة اوي و انا بغسلها بعد كده. و هي في رأيي ميزة و عيب. ميزة انك ممكن تفكيها تماما و تغسلي كمان تحت المطاط ده. عيبه انه غلس شوية علي ما عرفت اركبه صح.
3. حجمها علي قد ما هو مفيد، ساعات ببقي لازم اخد السترولر عشان احطها فيها، لأني تقريبا مبقتش استخدم شنطة بيبي.
4. لازم تتغسل او تتفضي اول بأول. علي عكس موديلات تانية الطفل بيعمل بيبي في كيس او علي حفاض.

بس الخلاصة. انصح بيها اي ام عندها طفل مستقل و شخصيته قوية. لانها بتشجع جدا و بتشيل عن الام ضغط و قلق دخول التواليت بره. يعني اكيد مع أطفالي تاني هستخدمها.

بوتي تريننج