Categories
رمضانيات

رز باللبن كريمي

الرز باللبن ده مزاج، أنا بحبه كريمي و خفيف عشان يرطب على الواحد بعد أكله تقيلة أو أكلة كشري خل و توم زيادة

المقادير و الطريقة سهلة و بسيطة
نصف كوب رز
لتر لبن
نصف كوب سكر
كيس كريم شانتي
رشة ڤانيليا تقريباً ربع معلقة

نغسل الرز و ننقعه نصف ساعة
فى حلة على النار نحط الرز مع مياه يدوب تغطيه
ياخد غلوه و قبل مايستوي ننزل بلتر اللبن
الرز لازم يستوي كويس جداً و يتهري جوه اللبن
نضيف السكر و الكريم شانتيه و الڤانيليا
نقلب عشان نتأكد السكر داب كويس و طبعاً ندوق عشان معيار السكر ممكن يزيد أو يقل حسب الذوق.
نشوف قوامه كده مظبوط و تقيل و لو حبينا نتقله أكتر ممكن ندوب معلقتين نشا فى ربع كوب لبن و ننزل بيه فى آخر غلوه و نطفي.
لو مظبوط خلاص يفُضل من غير نشا.
نغرف فى الأطباق و نضيف زبيب، مكسرات و جوز هند.