Categories
في المطبخ

رحلة صلصة الطماطم البيتي



كنت سألت علي الجروب من مدة علي طريقة صلصة الطماطم في البيت. و لقيت كذا طريقة حلوة، قررت اجرب اكتر ٥ عجبوني.  

الصلصة اللي بنشتريها مفيهاش اي مشاكل، طول ما هي في برطمان ازاز و معليهاش اضافات.
العلب الحديد بتنزل سموم و بتتفاعل مع الاكل و بالأخص الاكل عالي الحموضة زي الطماطم. و طبعا الاضافات بقي من مكسبات طعم و الوان صناعية، كل دي حاجات احنا في غني عنها.

انا بدأت بحوالي ٣ كيلو طماطم عشان اجرب فيهم.
نقيت طماطم حلوة، مش مفعصة او مهرية. الهدف اصلا اني اعمل صلصة حلوة، يعني ابدأ بخضار ممتاز لسه محتفظ بكل العناصر الغذائية اللي فيه.

و عملت الطماطم بكذا طريقة عشان اجرب.

طريقة رقم ١
شيلي الطماطم في الفريزر زي ما هي.
بصراحة الطريقة دي فشلت معايا تماماً. لأني معظم الوقت بطبخ آخر لحظة. الطماطم كانت بتبقي مجمدة تماماً و مش بعرف حتي اضربها في الخلاط.
الميزة الوحيدة هنا ان الطماطم قشرتها طلعت بمنتهي السهولة.
ممكن ابقي استخدم الطريقة دي لو هعمل اكلة محتاجة طماطم متقشرة و قوامها مهروس شوية مش مقطعة قطع او مضروبة.

طريقة ٢
اعصري الطماطم كاملة و شيليها في الفريزر.
الطريقة دي بصراحة ممتازة. اولا الطماطم بقي سهل اضيفها علي كل و اي حاجة.
شغالة مع التتبيلات، مع الطبيخ، حتي اخدت منها معلقة صغيرة علي الجبنة القريش عشان اعمل جبنة كريمي بالطماطم.
عيبها ان حسيت ان الطماطم فقدت شوية من طعمها بعد التجميد لمدة طويلة. ممكن المرة الجاية اجرب اضيف رشة ملح و رشة سكر عشان تحفظ طعم الطماطم اكتر.

طماطم معصورة
طريقة ٣
اعصري الطماطم كاملة و اغليها قبل ما تشيليها في الفريزر.
انا مسبكتش الطماطم. خليتها تغلي بس عشان احافظ عليها فترة طويلة. و حطيتها في برطمان ازاز في التلاجة. المفاجأة ان الطماطم قعدت في التلاجة حوالي ٣ اسابيع. طعمها زي ما هو، كنت بزود علي وش البرطمان معلقة صغيرة زيت عشان متعملش عفونة.
عصير طماطم مغلي مع معلقة صغيرة ملح و معلقة صغيرة سكر.
مشكلته الوحيدة ان الطماطم هنا بقت شبه صلصة فعلاً، و بقت مناسبة للطبخ اكتر لأن طعمها بقي اتقل.

صلصة طماطم


طريقة ٤
اعصري الطماطم كاملة و سبكيها قبل ما تشيليها في الفريزر.
نفس اللي عملته مع الطريقة التالتة. الفرق اني سيبت الطماطم تغلي مدة طويلة لحد ما قلت تقريباً النص.
ده احلي طعم للطماطم للطبخ. و طبخ هنا يعني طبيخ. يعني مسقعة و فاصوليا و بسلة بالصلصة.
مع طريقة ٣ قدرت استخدم الطماطم في صلصة المكرونة او مع الفول. مع الطريقة دي حصرت الاستخدام للاكلات اللي بتحتاج معجون طماطم. مع ان القوام اخف، بس الطعم اقرب لأن جزء كبير من المياه في عصير الطماطم اتبخر.

طماطم متسبكة
طريقة ٥
هنا بقي رسمي طلعت معجون طماطم، اقرب حاجة للصلصة اللي بتشتريها جاهزة.
خدت عصير الطماطم الجميل و فردته في صينية و دخلته الفرن. بدون اي اضافات.
علي اوطي حرارة و كنت كل نص ساعة افتح اقلبه.
لحد ما لونه بقي احمر غامق جميل و اتسحب من الطماطم معظم المياه.
الطعم ممتاز و تحسي فيه انه شوية مدخن و مسكر. عجبني جداً  في الطبخ و ظاهر قوي في الاكلات اللي الصلصة بتتفوق فيها زي المكرونات او البيتزا.

الخلاصة
انا و لا مرة صفيت الطماطم او شيلت قلبها. عشان انا مقتنعة ان كل جزء من الطماطم شايل طعم. و اني استثني جزء معناه اني اغير من الطعم.
مفيش طريقة حسيت انها وحشة في المطلق. بالعكس، شفت ان كل طريقة ليها استخدام. و في الآخر ده يرجع لنوع الاكلات اللي بتطبخ في الغالب في البيت.
يعني في مطبخي ممكن النهاردة اعمل بامية و اصبح تاني يوم اعمل لازانيا. الاتنين بعملهم بالصلصة. بس مش بنفس الصلصة. عشان كده فضلت الطريقة التانية اكتر شوية.
مع ذلك اعتقد ان في المستقبل هعمل كذا برطمان للطرق اللي استريحت فيها اكتر، زي طريقة ٢ و ٥.

Leave a Reply

Your email address will not be published. Required fields are marked *