Categories
مع العيال

دليل تعليم التواليت: ١١ علامة لطفل جاهز و ازاى تستعدى له

 أول حاجة و أهم حاجة و من غيرها كل الكلام بعد كده مش هيكون ليه أى فائدة و لا فاعلية طول ما ابنك مش جاهز عمره ماهيستجيب لأى طريقة.

ركزى كده عشان من هنا البداية و بعد كده هتعرفى تشترى ايه و تجهزى نفسك و بيتك ازاى.

مش لازم كل العلامات اللى هنتكلم عنها تكون موجودة مرة واحدة، غالباٌ علامة أو اتنين بس فى الأول. دى هتبقى نقط أساسية تركزى فيها، عشان لو موجودة يبقى طفلك جاهز. طبعاٌ بعد احساسك و نظرتك ليه، هما اللى هيخلوكى تبتدى فى الوقت المناسب. الوقت و السن بيفرقوا من طفل للتانى، ممكن من أخ لأخوه، ده شئ طبيعى، بلاش تقارنى.

١. يكون بيعرف يقف لوحده و ماسك نفسه كويس و ياريت يكون بيمشى كمان.

٢. بيبين إهتمامه بالتواليت أو البوتى و تلاقيه عايز يدخل معاكى التواليت و يقلدك.

٣. يكون اتعلم و فهم ان كل حاجة ليها مكان معين فى البيت بتتشال و ترجع تتحط فيه.

٤. يبتدى يبين رغبته فى انه يرضي أبوه و أمه فى البيت.

٥. حفاضته تكون ناشفة على الأقل لمدة ساعتين، ده بيبين إنه قادر يمسك نفسه و مثانته قوية.

٦. يقدر ينام بالليل لوحده من غير ببرونة أو كوباية لبن.

٧. يكون عنده القدرة على التواصل و التعبير عن احتياجاته. مش لازم عن طريق الكلام، ممكن عن طريق حركات الجسم و تعبيرات الوش.

٨. يكون قادر انه ياخد تعليمات بسيطة و ينفذها زى هات الكورة و اديها لبابا.

٩. يكون بيبان على وشه علامات و هو بيعمل التواليت و ساعات هيستخبى، طبيعى جداً.

١٠. أول ما يعمل يبقى عايز يغير الحفاضة و ساعات يشيلها و يقلعها لنفسه.

١١. بعد ما تغيري له يبتدى يجرى منك و يبقى مش عايز يلبس الحفاضة تانى و مستمتع بأحساس الحرية.

خدى بالك:
لو ابنك هيحصله أى تغيير مفاجئ فى حياته، زى نقل بيت جديد أو ولادة أخوه أو نزول الحضانة، الأحسن تستنى لما يبقى مستقر نفسياً عشان منرجعش نعيده تانى بعد شهر.

 

استعدادات الأم

طبعاٌ انتى سمعتى حكاية صاحبتك الناصحة اللى علمت بنتها من قبل السنة. و جدتك اللى علمت ولادها من 4 شهور و دى معجزة فى حد ذاتها، كل ده جميل و كل واحد حر و مسئول عن نفسه و أولاده. نيجى لنقطة الخلاف، المقارنة، اللى بتوصل الأم لتوتر و ضغط عصبى فظيع، فتضغط على ابنها الغلبان و تطلب منه حاجة ممكن تكون مش مناسبة لقدراتة فى الوقت الحالى.

متخليش أى حد يضغط عليكى انك تبتدى طول ما ابنك مش جاهز. مامتك و حماتك و اصحابك مش هينفعوكى لما تدمرى نفسية ابنك و فى الآخر مش هيتعلم حاجة برضه. عشان هو مش مستعد، هتلاقى الموضوع متعب جداً. بدل ما هو المفروض يكون مريح، و خلاص هتخلصى من شراء الحفاضات و من التهاب الحفاضات.
حطى فى دماغك ان دخول التواليت ده حاجة أساسية، زى الأكل، يعنى هيتعلمه هيتعلمه. أخد أيام أو شهورلكن فى النهاية هيتعلم.

دلوقتى ابنك جاهز لتعليم التواليت، اسألى نفسك سؤال الأول: هل أنا جاهزة! متوترة و على وشك ولادة! عندى شغل كتير! لو أى حاجة من دى موجودة استنى شوية لازم تبقى جاهزة زى ابنك بالظبط.

جاهزة يا حاجة؟ جاهزة!

• خديلك أجازة على الأقل 3 أيام أو أسبوع و قومى كده جهزى وجبات للغدا عشان متبعديش عن ابنك كتير و فضى نفسك خالص.
• لو عندك غسيل اغسليه. خصوصاً لبس الأستاذ اللى هيتعلم التواليت عشان هيستهلك كمية كبيرة و هيغير كتير.
• حاولى متخليش ناس كتير تشترك فى الأول. و تأكدى على كل عيلتك و الحضانة إن الكل يمشى على نفس الروتين و نفس أسامى أعضاء الجسم و التواليت عشان ابنك ميتلخبطش.
• اتعرفى كويس على العلامات اللى بتظهر على ابنك و هو عايز يعمل تواليت، مثلاً علامات بوشه أو حركات بأيديه أو قعده معينة فى حتة متدارية.
• ابتدى بقى علميه شوية كلمات سهلة و مسميات للتواليت زى pee, poo, poopy.
• حوّلى فقرة تغيير الحفاضة دى لشئ عادى و تقليدى و ممل.
• عرفيه على التواليت الأول و خليه يجربه حتى و هو لابس الحفاضة.

تقدرى ترجعى لدليل تعليم التواليت من هنا عشان تتابعى الخطوات بالترتيب.

2 replies on “دليل تعليم التواليت: ١١ علامة لطفل جاهز و ازاى تستعدى له”

[…] أنا عايزاكى تطمنى لأنى كنت زيك، متوترة و قلقانة و خايفة كل ما الوقت يقرب، هابتدى ازاى و منين و هاوصل و لا لأ. مع كل الحكايات اللى بأسمعها من الناس عن صعوبة الفترة دى على الأم و الطفل. أنا مش دكتورة و لا متخصصة بس بعتبر نفسى أم عندها خبرة و عدت المرحلة دى بدون أى مشاكل و بسهولة كمان. خصوصاً مع طفل حركي جداً، تقريبا مش بيعمل أى نشاط و هو قاعد و ده كان التحدي بالنسبة لى. كل اللى عملته انى قريت كتير أوى فى الموضوع ده و فهمت أهمية انى مبتديش تعليم التواليت غير لما أنا أكون جاهزة و الطفل كمان جاهز و ده هتعرفيه لما تدوسى هنا. […]

Leave a Reply

Your email address will not be published. Required fields are marked *