Categories
مع العيال

دليل تعليم التواليت: يوم بيوم

أتمنى لما تكونى وصلتى لمرحلة الخطوات باليوم تكونى متأكدة أن ابنك جاهز يبتدى تعليم التواليت و لو لسه مش متأكدة ارجعى للموضوع من هنا. و اعرفى تجهزى بيتك و تستعدى انتى ازاى قبل ما تبدأى اى حاجة.

 

أول يوم

أول يوم ممكن يكون أصعب يوم و عشان كده احنا عايزينك تكونى ايجابية، عندك صبر، حب و اصرار و نظام.

ممنوع الضرب و لا العقاب : الحوادث هتحصل هتحصل، خليكى مستعدة ليها و اعرفى ان حتى الأطفال اللى بيكونوا اتعلموا بالفعل ممكن تفلت منهم مرة و يعملوا على نفسهم عادى جداً. لما تحسى بالأحباط ، افتكرى كويس ان الزعيق و الزعل هيؤدى لشهور و فترة أطول فى تعليم التواليت. و الطفل عمره ما هيتعلم لو مغلطش و بل الأرض و شاف نفسه هو بيعمل ايه. بدل ما تزعقى فكريه كل شوية يلا ندخل التواليت و شجعيه.

• صباح الخير، نفطر كويس و زى ما اتفقنا على النظام الغذائى فى فترة تعليم التواليت.

• البوتى مكانها التواليت، مش قدام التليفزيون و لا أوضة النوم، لازم الطفل يعرف ان ده مكان التواليت، النظام ده هيريحك كتير فى المستقبل.

• نبتدى اليوم، نقلع الطفل الحفاضة و فى الوقت ده نفهمه كده براحة ان دى هتكون اخر حفاضة يلبسها خلاص عشان هو كبر و يروح يرميها فى الزبالة بنفسه و نحتقل بالأنجاز العظيم ده. ممكن نكلم الأب فى التليفون لو مش موجود فى البيت أو الجدة و ننشر الخبر السعيد ده. طبعاً مننساش نشكر فى الطفل و اد ايه هو ولد كبير و شاطر و أنا فخورة بيه. الأيجابية دى هترفع معناوياته و تشجعه اكتر.

• و بعدين نلبس الأندروير (الغيارات) الجديدة اللى اخترناها سوا و نكمل الأحتفالات و ممكن نديله جايزة مثلاً بالونة.

• غالباً هيبقى عايز يعمل فى خلال ساعة من بعد الفطار. احنا نبتدى بعد ربع ساعة نعزم عليه و نجرب.

• أصدقائك فى الفترة دى هم أدوات النضافة. اهم حاجة تاخدى بالك تبعديهم عن ايد ابنك، عشان زى ما قلنا الحوادث هتحصل هتحصل فالأفضل تأمنى نفسك و تستعدى للمعركة.

• جهزى البيت؛ هتحاولى تلمى السجاد على اد ماتقدرى و تقللى مساحة حركة الطفل، و ممكن تفرشى مشمع بلاستيك فى الأماكن اللى صعب تشيلى منها السجاد.

• بلاش السؤال المعتاد و المكرر كل دقيقة بتاع عايز تدخل التواليت أو عايز تعمل بيبي؟ لأنه فى الغالب كل مرة هيقولك لأ عشان يخلص من السؤال مش أكتر و بعد ثوانى هيعمل فى الأندروير عادى جداً! ركزى معاه أكتر و تابعيه و خلى سؤالك فى الآخر و فى الوقت المناسب.

• الطفل ممكن يكون سرحان و مركز فى لعبة جداً و ينسى نفسه، عادى بتحصل حاولى بس الفترة دى تعملوا نشاط مع بعض عشان تبقىِ مركزة معاه طول الوقت مثلاً احكيله حدوتة، غنوا أغنية و ارقصوا سوا، اتفرجوا على صور الحيوانات.

• متفضليش تدخَلى الطفل الحمام كل شوية و هو مشربش و لا أكل حاجة و مش باين عليه أى علامات انه عايز يعمل لأنه ممكن يزهق و انتى كمان تحبطى. الحل انك تعرضى عليه مياه و عصير كتير عشان لما يدخل يعمل فعلاً.

• أول ما تلاقيه بيعمل بيبي اجرى بيه على التواليت و حتى لو ملحقتيهوش من الأول أو ملحقتيهوش خالص و كان عمل، برضه يقعد على التواليت أو البوتى و نقوله شايف ياااع افيي امشى يا بيبيي و ريحة مش حلوة من غير ماتستخدمى أى كلمة مش كويسة او تدايقة.

• و افتكرى أن الحوادث دى هى اللى بتعلم و الطفل لو متضايقش من احساس البلل و عمل على نفسه مش هيفهم الفكرة بتاعة التواليت دى ابداً. عكس الحفاضة تماماً بيعمل حاجة هو مش شايفها و بعدين تختفى من غير مايقوم بأى مجهود.

• مش هنستنى من الطفل انه يعمل فى التواليت من أول يوم خالص و لا تانى يوم حتى.

• مجرد ما تحصل المعجزة و يعمل فى التواليت، نعمل فرح و نصقف و نغنى و نزمر بالزمارة دليل على النصر. نجرى نحط أول نجمة، و ياريت ابنك هو اللى يحطها بايده و يختار اللون اللى يحبه مع طبعاً كلام من نوعيه أنا مبسوطة منك أوى! أنت أشطر ولد فى الدنيا و نكلم الأب نحكيله و يهيص معانا.اليوم التانى

• هنكمل بنفس نظامنا من اليوم الأول مع متابعة الطفل و التركيز فى علامات البيبى.

• الطفل ساعات بيختبر أمه و يغلط عن عمد عشان يشوف لو ممكن ترجع له الحفاضة من تانى بس أنتى خليكى صبورة و هو بعد شوية هيدرك انك مش هتتنازلى.

 

اليوم التانى ميفرقش حاجة عن اليوم الأول مش مشكلة طول ما الطفل جاهز و بدأنا نكمل عادى.

• متستغربيش لو الطفل بقى يصرخ و يعمل تصرفات غريبة أنتى مش متعودة عليها ده طبيعى نظراً للتغييرات الجديدة فى حياته.اليوم التالت و الرابع و الخامس…

• حاولى تدخلى الأب معاكوا شوية فى الموضوع عشان انتى كمان متتعبيش و تَفقدى أعصابك.

• المفروض بعد كام يوم الطفل يبتدى يقول بيبى غالباً بعد مايكون عمل خلاص دى علامة كويسة كده ان بقى فاهم هو بيعمل ايه .

• الخطوة اللى بعدها علي طول انه هيقول قبلها و نجرى علطول ندخل التواليت؟ لأ بالعكس! نبتدى ندي له شوية حرية بقى و نقوله التواليت عندك اهو أو البوتى و اعمل وقت ما تحب فيه.

• فى طفل بيروح من نفسه على التواليت و بيبقى مرتاح كده أكتر و طفل تانى بيحب الحفلة و نخش كلنا سوا، فى الحالتين ده يعتبر تقدم.

 

بعد اسبوع مثلاً المفاجأت السعيدة هتبتدى تحصل.

ما هى كده كده هتحصل، بعد يومين أو أسبوع او شهر هيفاجأك و يطلب دخول التواليت و يمسك نفسه و يبقى شاطر، غالباً فى وقت ما تكونى خلاص مستنية مكافأة على تعبك ده كله.

اقعدى بقى و خدى نفس عميق تعبناكى معانا كتير و كنتى شاطرة و صبورة و عديتى فترة مش ظريفة بس اهى عدت و ارتاحتى.

تقدرى ترجعى لدليل تعليم التواليت من هنا عشان تتابعى الخطوات بالترتيب.

1 reply on “دليل تعليم التواليت: يوم بيوم”

Leave a Reply