Categories
مع العيال

دليل تعليم التواليت: نظام غذائى مناسب

تعليم التواليت مش بيقف عند تجهيز البيت و أدوات التنضيف و نلم السجاد و التحضيرات اللى عرفناها من هنا.

مهم جدا أن معدة الطفل تبقى مظبوطة فى الفترة دى مش هنبقى عايزين امساك و لا اسهال، كل ده مش فى صالحنا، عشان كده لازم نركز فى نوعية الأكلات اللى بنقدمها له فى الفترة دى.

على عكس ناس كتير فاهمة غلط اننا نقلل النشوبات و نأكل الطفل رز و بطاطس عشان تمسك البطن و الحوادث تقل. احنا فى عصر السرعة و عايزين نخلص و نعَلم الطفل فى ٣ ايام!

العكس بقى هو الصح هنزود المشروبات و العصاير و أكل يبقى مليان الياف عشان الهضم يكون أسرع و يعمل تواليت أكتر فيتعلم فى فترة أقصر.

طيب نأكل ايه فى الفترة دى؟
الحبوب زى الشوفان و قمح البليلة و العدس و الفول و الفاصوليا.
السندويتشات تبقى فى عيش معمول من دقيق القمح الكامل، توست أو بلدى. يبقى احلى كمان لو دخلنا زبدة الفول السودانى ندهنها على التوست مع معلقة عسل أبيض هتدى للأطفال البروتين و الطاقة اللى بيحتاجوها فى أول اليوم و الأحلى طعم كريمى و لذيذ.

خضار مليان الياف زى: البروكلى و البطاطا و السبانخ ، الكرنب و البسلة و القرنبيط. ممكن تقدميه فى شكل شوربة خضار مع مكرونة صغيرة أو لسان عصفور و قطع فراخ صغيرة.

أو شوربة عدس هايلة و نركزعلى الخضروات زى الكوسة و الجزر و البروكلى ممكن ندخلهم فيها لو الطفل متعب و مش هياخد باله.
ممكن نحط السبانخ الطازة أو ورقتين كرنب فى سندويتش الجبنة.

ممكن نسوى البطاطا و نعمل بيها أشكل بقطاعات البسكوت و نرش عليها سكر بنى عشان نغرى الطفل انه ياكلها.

الفواكهة زى: التفاح و الكمترى و الخوخ. بس نحاول نجيب أنواع اورجانيك عشان نقدمها بقشرتها اللى فيها كل الفايدة و الألياف.

نضربهم فى الخلاط مع شوية رايب أو زبادى و نقدمهم فى شكل سموزى مع شاليمو ملونة.
ممكن نقطع العنب سلايسز مع طماطم شيرى الوانهم هتشد الأطفال لأكلها.
التفاح نقطعه شرايح و ندهنه بزبدة الفول السودانى.

الأفوكادو كمان هايل ممكن نهرسه و نعمل بيه صوص يتحط عالمكرونة .

كأطباق جانبية، المكرونة و الرز البنى و الفريك هما اختيارك الأفضل خلال الفترة دى.

بننصح انك تقللى الجبن و منتجات الألبان عموماً خلال فترة تعليم التواليت عشان الأمساك و نستبدله اللبن بمياه كتير.
النظام الغذائى العالى بالألياف زى النظام ده مش بس هيسهل على الطفل فترة تعليم التواليت، لكن كمان هتبقى فرصة هايلة إنك تقدمي له فيها و تعوديه على الأكل الصحى و الحياه الصحية من عمر صغير.

تقدرى ترجعى لدليل تعليم التواليت من هنا عشان تتابعى الخطوات بالترتيب.

2 replies on “دليل تعليم التواليت: نظام غذائى مناسب”

Leave a Reply

Your email address will not be published. Required fields are marked *