Categories
مع العيال

دليل تعليم التواليت: النوم و الخروج

الفترة دى هيحصل عليها اختلاف كبير. ما بين ناس هتقول خلاص يعنى عرفتى ان الطفل الجاهز و جهزتى البيت و بدأتى معاه التدريب يبقى برضه فى النوم و الخروج يكمل من غير الحفاضة، عشان بلاش نلخبطه بين قلع و لبس كل شوية.

و رأى تانى بيقول على الأقل أول فترة يلبس الحفاض لحد ما يتعود يمسك نفسه كويس و بعدين يقلعه خالص.

خلينا نتفق أن هى مش خناقة أو مسابقة، لو حاسة أن ابنك جاهز يشيل الحفاضة فى النوم و الخروج، يبقى الكلام ده هيساعدك. لو لسه مش واثقة، اصبرى شوية و سهلى الحياه على نفسك.

النوم مقسوم لحاجتين: وقت القيلولة Nap-time و وقت النوم بالليل Nighttime.

القيلولة Nap-time:

و دى بتبقى فترة قليلة ساعة مثلاً سهل نراقبه فيها. أحسن حل ندخله التواليت قبل ماينام فوراً و أول مايصحى نجرى على التواليت، عشان لو كان شاطر و مسك نفسه اثناء نومه.

النوم بالليل Nighttime:

ساعات بتحصل أن طفل يعرف يمسك نفسه خلال الليل بدرى عن المتوقع، لكن لو ده محصلش متقلقيش. حتى لو الطفل بقى شاطر و اتعلم كويس جداً و بقى طول اليوم نضيف ممكن ياخد وقت أطول على مايبتدى يمسك نفسه بالليل و خصوصاً الولاد.

 

هنعمل ايه مبدئياً عشان نتفادى حوادث الليل و البلل و الملل:

• نوقف المشروبات من بعد وجبة العشاء أو يعنى على الأقل ساعتين قبل ميعاد النوم.

• نشترى كوفر مرتبة أو مشمع حلو كده على مقاس السرير. هتلاقيهم فى كل محلات المراتب، و نفرش عليه ملاية. لو الطفل عمل على نفسه نشيل الملاية و نمسح الكوفر و نفرش ملاية نضيفة و خلاص. معلش هتغسلى أكتر بس أكيد أريح من الحفاضات. هنا فيه خدعة، ممكن تجيبي اكتر من كوفر و تفرشى كذا طبقة. يعنى كفر على المرتبة بعدين ملاية بعدين كوفر تانى بعدين ملاية. كده مش هتحتاجى تغيري الملاية فى نص الليل.

• ندخّل الطفل التواليت مرة و اتنين على الأقل قبل ما ينام.

• بعد ساعة أو اتنين من النوم نفوق الطفل كده براحة و نفهمه ان احنا هندخل التواليت نعمل بيبي و نرجع ننام تانى. لازم يقوم و يمشى و يروح و هو مركز شوية مش ندخله شايلينه و هو نايم. ده هيساعده يفهم و يعرف انه لو عايز يدخل التواليت و هو نايم يصحى يدخل عادى و يرجع يكمل نوم. و نصحيه كمان مرة، قبل ساعة من ميعاد ما بيصحى، عشان ساعات بيكون صاحى فى السرير بس لسه مكسل يقوم.

• لو لاحظتى بيتحرك و يفرك كتير اسأليه تحب ندخل التواليت.

• نخلى البوتى جاهزة فى مكان واضح و فيه نور خفيف بلاش الضلمة.الخروج

• أول يوم مش هنخرج خالص عشان نركز مع الطفل كويس جداً.

• تانى يوم ممكن نخرج ساعة واحدة الصبح بعد مانكون دخلنا التواليت.

• مفيش طفل مش بيحب الخروج، تالت يوم ممكن ننزل ساعة الصبح و ساعة بالليل و يبقى دافع للطفل انه يعمل تواليت عشان يخرج شوية.

• هنبتدى نطول شوية برا، يبقى هنحتاج شوية حاجات: قاعدة تواليت بتطبق دى تبقى فى شنطتك علطول مع غيار نضيف و وايبس و مناديل أو فوطة صغيرة.
و أنا اخترعت لنفسى حل لزنقة الشارع؛ بوتى عادية فى العربية عشان لو اتزقنا فى الطريق، مع اى نوع حفاضات تحطيها و بعد ما يخلص ننضف بنفس الوايبس و أكياس نحط فيها الحفاضة لحد ما نرميها.

• لو هنقضي اليوم برا، نبتدى بالأماكن المألوفه بالنسبة للطفل زى بيت جده و جدته عشان يبقى واخد علي المكان و كمان عشان نعفى نفسنا من أى كسوف.

• المولات و المطاعم و أى مكان ندخله، نحاول نعرف مكان التواليت أول ما نوصل و ندخل نجربه و كل شوية نعزم على الطفل و خصوصاً لو أكلنا و شربنا، نستنى شوية و ندخل.

 

تقدرى ترجعى لدليل تعليم التواليت من هنا عشان تتابعى الخطوات بالترتيب.

1 reply on “دليل تعليم التواليت: النوم و الخروج”

Leave a Reply

Your email address will not be published. Required fields are marked *