Categories
مع العيال

دليل تعليم التواليت: الاستعدادات

مفيش أحسن من النظام! خلاص اتفقنا اننا هنبتدى نجهز البيت و طلباتنا، بعد ما الطفل يكون جاهز و مستعد يبتدى تعليم التواليت.

هاتى ورقة و قلم و اكتبى طلباتك و أفكارك بنظام. هنساعدك بكل الأفكار و الحلول السريعة اللى هتسهل عليكى الدنيا.

الأدوات اللى هنحتاجها

• رحلة للسوبرماركت نجيب أكلات فيها الياف عالية و مشروبات، المياه أهم حاجة مع شوية فواكه. و ممكن تقرائى نظام غذائى كامل طول فترة تعليم التواليت.

• البوتى (القصرية او النونية) أو قاعدة التواليت: الأطفال نوعين فيه طفل بيحب البوتى أوى و بتبقى جزء من عيلته و بيتعود عليها و واخدها معاه فى كل حتة، الطفل ده تاخديه محل أطفال يختار اللى تعجبه و الف مبروك.

و فيه طفل تانى معجب بالتواليت و تقليد باباه و مامته، هاتيله قاعدة تواليت نوع كويس، اللى بيبقى فيها سيليكون عشان تبقى ثابتة كويس و فيها جزء عالى من قدام عشان مفيش حاجة تطلع برا خصوصا مع الولاد.

بفكرك أن قاعدة التواليت المريحة أو البوتى هى بداية التعليم الصح و هى ممكن هتعجب ابنك و تحببه فى الموضوع أو تعقده منه. لو يوم حسيتى انها مش مريحاه غيريها فوراً بدون تردد.

• الغيارات الداخلية: خلاص بقى كبرنا على الغيارات اللى بتتقفل بكباسين من تحت و السالوبيتات. نعمل رحلة لمحل ملابس أطفال و نشترى غيارات شكلها حلو و ملون مع فانلات أو تيشرتات. كله يبقى قطن خفيف، سهل القلع و اللبس، هاتى كمية محترمة كده على اد ماتقدرى.

• أدوات النضافة: الجردل، الممسحة و جوانتى طبى للأيدين أو حتى أكياس بلاستيك، أى حاجة بتترمى، المهم مفيش حاجة تلمس أيدك عشان دى بكتريا. و سائل منظف و مطهر و اخترعى ليكى طريقة سهلة و سريعة فى التنضيف زى بخاخة فيها ديتول متخفف ترشى منها علي طول و تبقى جاهزة جنب ايدك.

• كفر للمرتبة: حسب لو ابنك بينام جنبك او فى سريره هتحتاجى مقاس المرتبة و بيبقى ليه استك يتثبت بيه من الجوانب. هتلاقي كل المقاسات فى ايكيا أو المحلات اللى بتبيع المراتب. ننصحك تغطى المرتبة كلها، مش بس الجزء اللى الطفل بينام عليه.

• مشمع: هاتى مقاس كبير و قصيه حسب احتياجك يعنى على مقاس السجادة اللى هتفرشيه عليها أو على الكنبة بدل ما تتبهدل.

• المكافأت و الجوايز: مش بنصح بأى حلويات أو حاجة بتتاكل عموماً عشان تأثيرها السلبى على المدى البعيد على الطفل، بتدمر صحته و مخه هيترجم انه كل ما يعمل حاجة كويسة عايز حلويات. احنا عايزين نربى طفل على الكلام الحلو و التشجيع على أكل الفواكهة و الخضروات كسناك (وجبة خفيفة) بين الوجبات. و أكيد نشجع انه يعبر عن نفسه بأننا نعبر عن سعادتنا بإنجازه. أسهل فكرة، تروحى على اقرب مكتبة ليكى و تجيبى فرخ ورق أبيض عشان تعلقيه على الحيطة جنب التواليت و ستيكرز نجوم الوان كتيرو مقاسات مختلفة و يبقى مع كل مرة يعمل فيها تواليت هياخد نجمة يلزقها على البورد، و كيس بلالين و زمارة لزوم الأفراح.

تقدرى ترجعى لدليل تعليم التواليت من هنا عشان تتابعى الخطوات بالترتيب.

3 replies on “دليل تعليم التواليت: الاستعدادات”

Leave a Reply

Your email address will not be published. Required fields are marked *