Categories
9 شهور

دليل اختيار الببرونات

شخصياً بأشوف ان الببرونة من الاساسيات. حتى مع الرضاعة الطبيعية هتحتاجيها و انتى بتدخلى المياه لأول مرة. و اكيد فى الرضاعة الصناعية لا غنى عنها! انواع و احجام و اشكال و ماركات كتير. الأختيار كل يوم بيبقى اصعب. هتجاوبى على شوية اسئلة هتسهل عليكي اختيار الببرونة بعدين. 

محتاجاها لأيه؟ رضاعة؟ مياه؟ 

البيبي عمره قد ايه؟ 

بتشتريها امتى؟ انتى لسه حامل؟ 

الرضاعة الطبيعية اخبارها ايه؟ مستقرين ولا لسه بنتعلم؟ 

احفظى اجابات الأسئلة دى و خليها فى بالك  وانتى بتقرى بقية الكلام. 

١. الحلمة 

طبعا اول مرة نزلت اشترى ببرونة اتصدمت من كمية اختيارات الحلمات بس! اول نقطة لازم تراعيها هى ان يكون شكل الحلمة مشابه او اقرب لشكل الثدى. كل ما قربتى للطبيعة هتبقى عملية الرضاعة اسهل. 

الحلمات كمان مقاسات مختلفة، تبتدى من مقاس 1 اللى بيبقى مناسب لعمر 0-3 اللى بيبقى محتاج تدفق بطئ عشان لسه بيتعلم الرضاعة. بعده مقاس 2 لعمر 3-6 اللى بيبقى محتاج تدفق اكبر، و هنا الحلمة مش بتبقى طرية اوى زى مقاس 1 لأن الطفل بيكون كبر و قوة المص عنده بتبقى اكبر. و بعدهم مقاس 3، لعمر 6 شهور و اكبر للشاطرين محترفين الرضاعة اللى بيبقى محتاج حلمة بفتحات اكبر. لو متلخبطة فى مقاس الحلمات اللى عندك عدّى الفتحات اللى موجودة فى كل حلمة، تبدأ من فتحة واحدة لمقاس واحد و توصل ل4 فتحات لمقاس 3. 

فيه اختراع جديد جميل، حلمة فيها كل المقاسات، بتلفيها مع valve او صمام تحكم فى حركة الهوا عشان تتحكمى فى سرعة تدفق اللبن. هنا اللى بيتحكم فى سرعة الببرونة هو ضغط الهوا جواها مش عدد الفتحات اللى فى الحلمة. احنا بننصح انك تستخدمى النوع ده ابتدأ من مقاس 2 لأنها ممكن تبقى متعبة شوية للأصغر من سن 3 شهور لأن الحلمة بتبقى ناشفة شوية. 

عشان تعرفى تستخدمى مقاس كام، ممكن تمشى حسب العمر اللى بيبقى متحدد على عبوة كل مقاس، حسب الماركة اللى هتختاريها. و اعرفى انه برضه مش بمزاجك، اول ما تلاقى الطفل بيعيط مع الرضاعة، بيدلق اللبن من بقه، مش بيخلص الرضعة بعد 30 دقيقة و لسه جعان، دلوقتى تنقلى لمقاس اكبر، محتاجين تدفق اسرع للبن.

٢. ببرونة بلاستك؟ زجاج؟

الأتنين ليهم عيوب و مميزات. مع الببرونة البلاستك الحياه اسهل شوية لأن تحملها للحرارة اعلى بيخليها تبقى مناسبة مع كل طرق التعقيم و تقدرى تدخليها غسالة الأطباق كمان. المهم هنا انك تركزى فى نوع البلاستك المستخدم. لازم تدورى و تقرى اللى مكتوب على المنتجات البلاستك كلها قبل ما تشتريها. اهم حاجة يكون BPA Free و يكون كمان رقم البلاستك المستخدم 1 – 2 – 4 او 5 ، دى فقط الأرقام المناسبة لأدوات الأكل. غير كده البلاستك بيبقى داخل فى صنعه مواد ممكن تسبب للطفل التسمم لو اتسربت للأكل. 

الزجاج بقى صعب شوية فى حفظه و لازم تراعى درجات الحرارة المناسبة ليه. لكنه اسهل فى التنضيف و لونه مش بيتغير بسهولة زى البلاستك. الببرونة الزجاج فى الغالب بتبقى اغلى شوية من البلاستك، لكن ده عشان عمرها اطول من البلاستك و لو حافظتى عليها هتعيش لأكتر من 6 شهور. عيبها انها سهل تتكسر و دى حلها سهل انك تجيبي لها جراب سيليكون، هيحميها و يخلي حملها اسهل عليكي كمان. 

للأطفال الأكبر شوية اللى بيحبوا يمسكوا الببرونة لوحدهم، الزجاج ممكن تبقى تقيلة شوية، فى الحالة دى ممكن تنقلى لأكواب الشرب و تبعدى عن الببرونات خالص.

٣. صمام الهوا

هتلاحظى ان فيه انواع كتير مكتوب عليها انها بتكنولوجيا بتمنع مرور الهوا او بتنظم حركة الهوا. دى ميزة مهمة جداً. اللبن جوا الببرونة و هو بيخرج لازم يملى مكانه هوا، دى قاعدة فيزيائية اساسية. لو الببرونة مفيهاش صمام او وسيلة لتنظيم حركة الهوا هتلاقى الببرونة فى فترة بتعمل فقاعات او هتلاحظى ان الطفل بيشرق لأن الهوا بيبدل مكان اللبن. حركة الهوا و اللبن دى فى الآخر بتسبب للطفل غازات، لأنه حرفياً بيبلع هوا. لو هترضعى صناعى او تستخدمى الشفاط بأنتظام، يبقى الخاصية دى اساسية فى اى ببرونة تختاريها.

٤. حجم الببرونة 

هتلاقى ان الببرونات فيه منها احجام مختلفة، من اول 60مل و لحد 250مل او اكتر. لو هتبدأى مع طفل حديث الولادة يبقى مش هتحتاجى ببرونة عملاقة، كل ما كانت اصغر كان اسهل عليكي انه يخلص الرضعة من غير ما يتبقى فى الببرونة لبن. و هيبقى اسهل عليكي انك تتابعى عدد الرضعات. 

كل ما الطفل يكبر كل ما الكمية اللى بيستهلكها فى الرضعة بتزيد بالتالى تنقلى على حجم ببرونة اكبر. 

اهم نقطة هى ان الببرونة الكبيرة مليانة هوا، و لو النوع مش مزود بصمام بينظم حركة الهوا فى الببرونة، الهوا ده هيسبب غازات فى بطن الطفل و يتعبه. 

٥. عدد القطع 

الببرونة شكلها حلو اوى من بره بس من جوه هى عبارة عن 500 قطعة بيتركبوا فى بعض! عايزاكى تتخيلى نفسك و انتى قايمة فى نص الليل تعملى رضعة، هل هتفتكرى ال500 قطعة بيتركبوا ازاى؟ لأ! كل ما عدد القطع قل كل ما بقت حياتك ابسط. و انتى بتشترى افتحى الببرونة و اقرى كتالوج التنضيف و التعقيم. تخيلي انك بتعملى الخطوات، حستيها صعبة يبقى بلاش منها. فكى و ركبى الببرونة و انتى فى المحل كمان لو تقدرى. الببرونة هتبقى جزء من حياتك لـ6 شهور على الأقل، سهلى الأمور على نفسك. 

انا عندى قاعدة، اقل عدد ممكن من القطع و بدون اجزاء مخفية. 

الأجزاء المخفية دى هى اى جزء مش هتعرفى تنضفيه او توصلى له بفرشة او فوطة او سفنجة تنضيف. يبقى مش هتعرفى تنضفيه 100% يعنى فيه احتمال كبير انه يكوّن بكتيريا. و احنا فى غِنى عن اى حاجة تسبب امراض.

٦. قطع متوفرة 

عن تجربة، اشتريت الببرونات من بره مصر  و لما حبيت انقل لمقاس الحلمات الأكبر مكانش متوفر فى مصر. النتيجة انى اشتريت ببرونات جديدة! و انت  بتشترى اتأكدى ان كل القطع متوفرة، الحلمات، الصمام لو بيتغير، الجسم ممكن يكون بيتباع منفصل. 

فيه ماركات كمان بتبيع اكسسوارات مناسبة للبرونات بتاعتها، و ده هيغنيكي عن مجهود انك تدورى على اكسسوارات مناسبة لشكل و حجم الببرونة. زى الجراب الحرارى، الغطا السيليكون للببرونات الزجاج، فرشة التنضيف و غيرهم. 

٧. عمر الببرونة 

بغض النظر عن نوع الببرونة اللى هتختاريه، شكلها و ماركتها لازم تعرفى ان فيه علامات لازم تغيري عندها الببرونة حتى لو اشترتيها من اسبوع بس. 

للزجاج و البلاستك، اى تغيير فى ريحة، لون او ملمس الببرونة يبقى تتغير. اى شرخ فى الببرونة الزجاج خطر و اى تشققات فى الببرونة البلاستك. 

الحلمات كمان لو لونها، ريحتها او ملمسها اتغير يبقى تترمى فوراً. و اكيد اى قطع فيها هيخليها تبقى مش مناسبة، هتنقط لبن او تسرب هوا جوا الببرونة. 

العمر الأفتراضى للحلمات 3 شهور، خلالهم غالباً بيكون الطفل محتاج ينقل لمقاس اكبر. 

العمر الأفتراضى للبرونات البلاستك 4 لـ6 شهور و الببرونات الزجاج تعيش لحد ظهور اى علامات.