Categories
في البيت

١٢ خروجة اقتصادية للعيلة في القاهرة

حيرة الأجازات الأزلية، عايزين نخرج و نخرَج العيال نبسطهم و نتبسط معاهم. تخيلوا نفسكوا سافرتوا أى بلد، مش بتعملوا كل الأنشطة اللى فيها عشان تكتشفوها؟ فكروا شوية بره الصندوق و جربوا تعملوا كده فى القاهرة. بأقل تكاليف، 12 خروجة جديدة و مسلية.

١. جنينة الحيوانات
لو معاكم أطفال صغيرين لسه فى الحضانة و مش بيشوفوا الحيوانات غير فى الرسومات و الكرتون هيتبسطوا جداً لما يشوفوهم لأول مرة على الحقيقة.
الخدعة هنا انكم تروحوا يوم الأربعاء لأن الجنينة بتبقى اجازة يوم الثلاثاء لتنضيفها و ترجع تفتح الأربعاء، بتبقى أنضف يوم فى الأسبوع. سعر تذكرة الدخول 5 جنيه. نلبس جزم مريحة، المشي جوه كتير. لو معانا طفل صغير شوية يفضل ناخد معانا عربية البيبى (سترولر).

حديقة الحيوان بالجيزة

٢. الأهرامات
البسوا لبس عملى و بتاع فرهدة و جهزوا كاميرا حلوة و اطلعوا من الصبح بدرى على الأهرامات زى السياح و اضمن لكم انكم هتقضوا يوم مختلف و جديد و ميفوتكوش ركوب الخيل و الجمال، بس دى متعملوش فيها سياح أوى عشان هتدفعوا كتير. تذكرة الدخول 4 جنيه و 2 جنيه للطلبة.

٣. الأزهر بارك
شوية هوا نضيف و قعدة حلوة مع العيلة فى أى مكان جوه البارك، الأختيارات كتير. تقدروا تاخدوا وجبة خفيفة معاكم و تعملوا بيكنيك مثلاً. الأطفال يلعبوا فى الكيدز اريا أو تقعدوا فى أى رستوران و ممكن كل مرة تعملوا حاجة مختلفة. تذكرة الدخول خمسة جنيه بس. يفضل نروح يوم وسط الأسبوع الصبح عشان نستمتع بالمناظر الطبيعية فى هدوء.

٤. فلوكة فى النيل
النيل اللى مش بنشوفه غير و احنا معديين من فوق الكوبرى، جربوا تستمتعوا بيه يوم و مش لازم رستوران فظيع. ممكن فلوكة تلف بيكم فى النيل لمدة ساعة و اكتر و مش هتبقوا عايزين تروحوا. الخدعة هنا لو انتوا مجموعة كبيرة متروحوش كلكم مرة واحدة لأول مركب، خلى واحد بس يلف على كذا مركب يسأل على الأسعار و يفاصل و ياخد أحسن سعر و يحجز و يرجعلكم

فلوكة في النيل

٥. السيرك القومى فى العجوزة
فكرة السيرك ممكن تبقي ممتعة للأطفال، جربوا معاهم حاجة جديدة. تنوع فقرات السيرك هيخلى العيلة كلها تتبسط. سعر التذاكر 30 و 50 و 75 جنيه و كله بيشوف المسرح لأن الكراسى على مدرجات. الأجازة يوم الأربعاء.

٦. القرية الفرعونية
فى اليوم ده هترجعوا 7 الآف سنة ورا و هتشوفوا الفراعنة كانوا عايشين ازاى. ممكن تقضوا يوم كامل هناك من 9 الصبح لحد 5 مساءاً من غير ماتزهقوا، لأن هيبقى فيه رحلة يخت و فطار و غدا و متاحف و هدايا تذكارية. مناسب للأطفال الأكبر من 5 سنين، اللى عندهم حب استكشاف و عايزين يعرفوا اكتر عن عصر الفراعنة.
بيعملوا عروض علي التذاكر كل فترة و الأسعار بتبتدى من 50 جنيه للفرد شاملة رحلة نيلية على اليخت. بالنسبة للأطفال الصغيرين اللى مش هيفهموا الفراعنة و الآثار، ليهم جزء ترفيهى فيه ملاهى و حديقة حيوانات و ارت سنتر. أسعار انشطة الأطفال من 10 جنيه لحد 40 جنيه.

٧. برج القاهرة + حنطور و تمشية عَ النيل
تغيير نظرتك للمكان ممكن تغير من نفسيتك كتير. جربوا تشوفوا القاهرة من فوق من أعلى برج فيها، برج القاهرة. التذكرة ب ٣٠ جنيه و الأطفال مجاناً، بس يستحق التجربة فعلاً. هتنزل واحد تانى مودك متغير ١٨٠ درجة. بعديها ممكن تتمشوا على النيل، أقرب حاجة منطقة الزمالك. أو تركبوا حنطور، بيبقى واقف فى نفس مربع البرج و الأطفال بيحبوه جداً.

خروجة عائلية برج القاهرة

٨. ساقية الصاوى
أساسى بيعملوا مسرح للعرائس و حفلات أغانى و ورش عمل و فنون مناسبة لكل أفراد الأسرة كبير و صغير. تابعوا البرنامج الشهرى لساقية الصاوى على الموقع الرسمى ليهم أو صفحة الفيسبوك، بيعملوا ايفنت فيه كل التفاصيل و المواعيد و سعر التذاكر بالظبط. لكن عموماً أسعار تذاكر الحفلات بتكون فى حدود 20 جنيه و فيه كافيتريا و مطعم أسعارهم ظريفة.

٩. Swiss Club النادى السويسرى فى امبابة
المكان ده ناس كتير متعرفوش يا خسارة، ده كنز! قريب من وسط البلد، تقريباً 10 دقايق من الزمالك و تخرج من الزحمة تلاقى نفسك فى مكان جميل و هادى. جناين و ملاهى للأطفال و مطعم بيقدم أكل صحى للأطفال و دى ميزة هايلة و أسعاره تعتبر رخيصة. الدخول للأعضاء طبعاً و تذكرة دخول غير الأعضاء ب 10 جنيه.

١٠. حديقة الأسماك بالزمالك
فى الزمالك و أنت ماشى على الكورنيش تحديداً جنب سفارة المانيا هتلاقى مكان جميل كده؛ شجر، جناين، مناظر طبيعية و هوا نضيف، هى دى جنينة الأسماك. جربوها يوم الصبح بدرى مع كتاب و فنجان قهوة، شوية روقان أو مع الأطفال، هتلاقى ليهم ملاهى يلعبوا فيها. أو تابع الأنشطة المختلفة اللى بتبقى هناك من حفلات غنائية و خيرية، بازار و أوبن داى بتفتح من 9 و نص الصبح لحد 5 مساءاً. اجازة يوم الثلاثاء و سعر التذكرة 5 جنيه للفرد، الأطفال أقل من 4 سنوات مجاناً و 20 جنيه للأجانب

١١. قلعة صلاح الدين
على حسب ما افتكر دى كانت أول رحلة اطلعها مع المدرسة، رحلة لقلعة صلاح الدين و بعدها نتغدى في بيتزاهت. برغم بساطة الرحلة دى الا انها سايبة ذكرى جميلة فى نفوسنا. خسارة نحرم ولادنا من يوم زى ده أو نضيع على نفسنا فرصة نستعيد الذكريات و نشوف القلعة بجمالها و مسجد محمد على بروقان و المتحف الحربى و قصر الضيافة و نشترى طربوش و عصاية زى زمان. سعر التذكرة 5 جنيه.
الجديد كمان دلوقتى هو مهرجان القلعة اللى بتقوم بتنظيمه دار الأوبرا المصرية، هو مش جديد أوى ده بقاله سنين بس ناس كتير متعرفوش. بيحيى حفل الأفتتاح أوركسترا القاهرة الأحتفالى و بيشارك فيه مجموعة من المطربين و العازفين و الفرق الغنائية المعروفة و هدفه هو وصول فنون الأوبرا للناس اللى مش بتقدر تروح الأوبرا. بيكون فى الفترة مابين أغسطس و سبتمبر، على مسرح محكى القلعة فى أعلى مكان فى القلعة، يعنى الجو الجميل جداً و الفيو الرائع بالليل. الحضور مجاناً برسم دخول القلعة فقط و تقدروا تتابعوا الأيفنت بمواعيد الحفلات على صفحة Cairo Opera House على فيسبوك

١٢. حديقة الأسرة
(مدخل الرحاب 2 ) الكيلو 26 طريق القاهرة – السويس الصحراوي. ده عنوان حديقة الأسرة لو تعتقدي انها بعيدة. بس هى تستاهل المشوار، هتقضوا هناك يوم رائع لا يمكن تنسوه. بس نصيحتى تروحوا من الصبح بدرى، الحديقة بتفتح من 9 صباحاً و بتقفل 8 مساءاً. كعيلة يفضل النهار عشان تشوفوا كل حاجة فى الحديقة. بأختصار فيها حديقة حيوانات نضيفة و مفيش روائح كريهة، بس ناخد بالنا بتقفل 6 مساءاً. ملاهى و ألعاب لكل الأعمار و جزء ثقافى، نموذج مصغر لمكتبة اسكندرية و المتحف الحربى. عندهم كمان مركز تعليمى للأطفال فيه ورش عمل فنية و مركز للفنون و التكنولوجيا. التذكرة سعرها ٤٠ جنيه للفرد ما عدا الجمعة و السبت ٥٠ جنيه و الأطفال أقل من ٤ سنوات مجاناً. المعلومات كلها عن المواعيد و الحجز على الموقع، كمان هتلاقي خريطة الحديقة اللى هتساعدك متلفيش كتير.

Leave a Reply