Categories
في المطبخ

حوّلي الجبنة القريش لجبنة كريمى سهلة الفرد

القريش أساسية فى تلاجتى. فى البيت عندى احنا بنحب الاجبان جداً، عشان كده بحرص على وجود القريش طول الوقت. صحية و خفيفة و مناسبة للأطفال و الرچيم. اهم حاجة تجيبيها من مصدر موثوق فيه. عيبها بس ان ساعات بنزهق من قوامها المميز ده. عشان كده بأحولها كريمى، مناسبة اكتر للسندوتشات.

قالب جبنة قريش تقريباً نصف كيلو
علبة زبادى
ربع كوب لبن

الأضافات
زعتر و زيت زيتون
فلفل رومى أو فلفل الوان
زيتون
بابريكا
فلفل حراق
شطة

جبنة قريش كريمي

نحط الجبنة و الزبادى فى الخلاط و ننزل اللبن شوية شوية مش لازم نحطه كله مجرد بس الخلاط يلف.
نضرب كويس أوى و نتأكد أن مفيش أى حبيبات و كله كريمى.
نضرب فى شكل نبضات لحد ما نوصل للقوام الكريمي.
نضيف أى إضافات احنا عايزنها مثلاً البابريكا بتدى لون حلو و طعم جبنة مدخنة.
ناخد بالنا لو هنضيف زيت زيتون يبقى نقلل اللبن شوية من الأول أو منحطوش.
الفلفل و الزيتون لو عايزينه قطع نضيفه فى الأخر خالص و نقلب بمعلقة.

جبنة قريش كريمي

معلومة سريعة: الوصفة الأساسية ملحها خفيف جداً، دوقى و ظبطى الطعم حسب رغبتك و ذوقك.
ممكن تحفظيها فى برطمان نضيف فى التلاجة و تبقى جاهزة عندك على الفرد فى السندويتشات علي طول.

جبنة قريش كريمي