Categories
9 شهور

حساب الحمل و موعد الولادة

الدكتور بيحب يحسب بالأسبوع و انا ببقى عايزة اعرف انا فى الشهر الكام و السونار بيحسب رقم تانى خالص. ده طبعاً غير كل ما حد يشوفك يقولك انتى شكلك فى الشهر كذا او “مش باين عليكي، متأكدة؟!”

عشان تحسبى انتى فى الشهر الكام و لا بدأتى التلت التانى ولا لسه ممكن تتبعى طريقة من التلاتة دول:

  1. امشى مع الجدول الأسبوعى: الجدول ده بيحسب بالأسبوع اللى انتى فيه و مش بيتفاهم. الدكتور بيعرف من اختبار الدم او من السونار انتى فى الأسبوع الكام و هيقولك. احسبى من النقطة دى.
  2. اعرفى الشهر بيبتدى يوم كام: الطريقة دى معتمدة على حساب ميعاد التبويض و منه الدكتور بيحسب ميعاد الولادة. لو قلنا ان ميعاد الولادة 20 يناير يبقى انتى بتبتدى شهر جديد كل يوم 20 من الشهر بغض النظر انتى فى الأسبوع الكام. فى الطريقة دى ممكن تبتدى شهر جديد فى نص الأسبوع عادى و ممكن الشهر يبقى اكتر من 4 اسابيع طبعاً.
  3. السونار: يفضّل طبعا ان اللى يعملك السونار الدكتور بتاعك او متخصص سونار لأن دقته بتعتمد على القياسات اللى بتتاخد للجنين. مقاس الجمجمة و العظام. السونار المفروض يبين الأسبوع و ميعاد الولادة المتوقع. ميعاد الولادة فى العادى بيبقى مكتوب جنبه  EDD (estimated date of delivery)او ميعاد الولادة المتوقع و لو انتى فى نص الأسبوع الـ15 هتلاقى مكتوب15W+3D

خلى بالك طبعاً ان مهما حسبنا لازم تعملى حسابك فى اسبوع قبل و اسبوع بعد الميعاد المتحدد. نسبة قليلة جداً بتولد فى الميعاد المتوقع.

الحمل مش ٤٠ أسبوع ثابت. ممكن تولدى بدرى ما بين الأسبوع ال٣٧ و ٣٨. او تتأخرى لبعد ال٤٠ أسبوع كمان. مع اول ولادة احتمالات انك توصلى ل٤٠ أسبوع و اكتر بتبقى اعلى أكيد.

فى الاول و الآخر، المهم البيبي ييجى بالسلامة و ولادتك تبقى تجربة جميلة.