Categories
9 شهور

حاجات جوزك عمره ما هايفهمها عن الحمل

الراجل أكيد مبسوط زيك بالظبط. و يمكن مستنى البيبي اكتر منك. الفكرة بس ان دماغ الراجل بتشتغل بنظام تانى غيرنا. هو ممكن يبقى مش عارف يعبر زيك و ممكن يكون فيه حاجات هو فعلاً مش قادر يستوعبها.

١. ان النتيجة الأيجابية دى هى احلى و اكتر حاجة مرعبة حصلتلك. حلوة و مرعبة فى نفس الوقت!

٢. انك بتختارى انك متشتكيش. او مش قادرة تشتكى اصلاً.

٣. انك عندك القدرة انك تنامى طول اليوم.

٤. على قد ما انتى نفسك تشوفى البيبي على قد ما انتى خايفة عليه من العالم و ممكن تستحملى و تفضلى حامل شهر كمان.

٥. حركة البيبي حلوة لحد ما يخبطك فى قلبك و ضلوعك.

٦. بيبقى نفسك تاخدى يوم اجازة من الحمل و تعملى اللى نفسك فيه.

٧. انك بتقنعى نفسك انك فعلاً مش عايزة تاكلى الأكل اللى ممنوعة منه بمزاجك. انتى أصلاً مبتحبيش السوشى اوى يعنى.

٨. انك متعرفيش اساساً انك ماشية زى البطريق.

٩. انك مش عايزة تفكرى فى الولادة. بس مستنية يوم الولادة عشان تقابلى البيبي بقى.

١٠. عادى جداً انك تبقى بردانة فى نص اغسطس او حرانة فجأة بدون مبرر.

١١. ليون كينج ده قصة مأساوية و مش عارفة ازاى اتفرجتى عليه قبل كده من غير ما تعيطي.

١٢. مش لازم ليون كينج عشان تعيطي. انا هعيط عشان انا مش عارفة انا بعيط ليه من الاساس.

١٣. انك بجد عايزة تعملى كل حاجة فى البيت. عندك النية فعلاً.

١٤. ان البيبي قاعد فوق المثانة و بيتنطط عليها كمان.

١٥. ان ممكن تبقى جعانة و مش قادرة تاكلى. معدتك بجد محشورة.

١٦. ان كل اعراض سوء الهضم مش لازم تيجى بعد الأكل. او ان ليها علاقة بالأكل.

١٧. عشان نخرج من البيت لازم نروح حتة التواليت فيها نضيف.

١٨. خبطات البيبي دى هى السبب الأساسى انك مستحملة كل اللى بيحصلك.

١٩. ان كل المخدات دى مهمة عشان يجيلك نوم.

٢٠. التلت الأول من الحمل كله خوف. التلت التانى من الحمل متعب و التلت الأخير خايفة لأولد!

٢١. يعنى ايه مش شايفة رجليكي؟

٢٢. انك مش عايزة تشوفى رجليكي من كتر ما هى وارمة.

٢٣. هتحسى انك هتبقى جدة مش ام من كتر ما انتى مش قادرة تعملى اى حاجة.

٢٤. فيه بنى آدم بيصحى و ينام و يلعب.. جوه بطنك!

٢٥. انك مش مسطولة. طبيعي يعنى انك تنسى تولعى النار على الأكل.

٢٦. انك مش انانية و عايزة تتكلمى عن البيبي و الحمل طول الوقت. هى دى اهم حاجة حصلتلك انهاردة.

٢٧. انك خايفة لا تحبى البيبي اكتر منه.

٢٨. انه هيبقى احسن اب فى الدنيا. اول ما يمسك البيبي فى ايديه و يستوعب.

٢٩. انك تقفي تطبخى ساعتين و بعدين ترمى الأكل عادى جداً لمجرد إن نفسك غمّت عليكي و قرفتى من الأكل فقررتى ترميه.

٣٠. إن ريحة برفان جوزك السيكسي جداً اللى جبتيهاله فى عيد ميلاده بقت تخنقك و تقلب معدتك.

٣١. لو كنتي بتاخدى وقت كبير و انتى بتلبسى عشان بتدلعى، دلوقتى هتاخدى وقت أكتر عشان تلاقى حاجة مقاسك فى الدولاب و غالباً هتقلب بدراما فى الآخر.

Leave a Reply

Your email address will not be published. Required fields are marked *