Categories
9 شهور

حاجات البيبي اللى ملهاش تلاتين لازمة

 انا لازم اعترف أنى اشتريت كل حاجة كتبتها فى ليست طلبات البيبي قبل ما تتولد. فيه حاجات بصراحة مكنتش اقدر أعيش من غيرها ولا كنت هاصمد اول سنة بدونهم. و فيه حاجات تانية، من الآخر، لِسَّه بكرتونتهم او استعملتهم مرتين على الاكتر.

١. الفساتين و اللبس الكتير: من يوم ما عرفت انها بنت و انا افتريت فى شراء اللبس. الفساتين بالأخص مكنتش بأقدر اقاومها. اول ٦ شهور الأطفال بيكبروا بسرعة جداً، هم بيوسخوا الهدوم بسرعة بس بيكبروا أسرع و مش هتلحقى تلبّسى كل حاجة. و بصراحة الفساتين و لبس الخروج ده مش عملى خالص.

٢. التيتينة او السكاتة: انا عملت شاطرة و جبت اتنين بس قبل ما أولد. بس لما لقيت البنت بتاكل صوابعها و هدومها و اللعب و اى حاجة تقابلها قلت لما اجيب تيتينة بقى. جربت كل الأنواع اللى فى السوق و الهانم رفضتهم كلهم. اتأكدى الأول ان طفلك قابلها قبل ما تشترى كتير.

٣. Bottle warmer: الجهاز اللى بيدفى الببرونة: ممكن يبقى مفيد لو ناوية ترضعى صناعى. لكن بالنسبة للرضاعة الطبيعى ملوش لازمة. استعملته كام مرة فى الشتا عشان المشروبات الدافئة لما البنت جالها برد. غير كدة ملوش لازمة. انا بأفضل حمام المياه عنه لأن عمره ما بيوصل المشروبات او الاكل لحرارة عالية جداً تأذى الطفل.

٤. الجزم: ملهاش لازمة طول ما البيبي مش بيمشى. شكلها حلو لكن مش عملية خالص. بتفضل تقع و تجننك عشان تلاقيها. و تضيع و يفضل عندك فرد وحيدة شريدة مش عارفة توديهم فين. انا بصراحة وقعت فى الفخ ده مع دخول الشتا و اكتشفت ان الحل فى الجزم القماش اللى بتبقى اقرب للشراب فى الشكل. هتدفى، تثبت فى مكانها و مريحة و صحية اكتر للبيبي.

٥. الكاريكوت: حاجة فاشلة كدة من قبل اختراع  الكارسيتاكيد. هو عبارة عن سرير متحرك. هتستعمليه ٣-٤ شهور على الاكتر و بعدين البيبي بيرفضه لانه هيبدأ يحاول يقعد و يشوف الدنيا. لو مش عايزة تجيبي كارير او راب، يبقى هاتى ترافل سيستم عشان تحركى البيبي بالكارسيت. و بصراحة انا بكره الكاريكوت عشان بشوف ان مفيش اى أمان للطفل، بيتمرجح فى كل الاتجاهات و مش مبطن كفاية.

٦. الببرونات الكتير على الفاضى: هترضعى طبيعى او صناعى انصحك متشتريش كمية من نفس نوع الببرونات. حتى لو أحسن نوع فى السوق. مش دايماً الطفل بيقبل الببرونة من اول مرة و ساعات شكل الحلمة بيبقى مضايقه او ملمسها مش طبيعى كفاية. مشكلة كمان ممكن تكتشفيها ان بعض الانواع بتدخل هوا و بتعمل غازات مؤلمة فى بطن البيبي. جربى كذا نوع الاول قبل ما تجيبي كتير و اتأكدى ان قياسات الحلمة الأكبر متوفرة كمان.