Categories
في المطبخ

تيراميسو

مش هقدر أقول أن هى دى وصفة التيراميسو الأصلية و لما هتاكليها تحسي انك فى ايطاليا، دى وصفة اسهل، كل العلاقة بينهم القهوة و الجبنة  و البسكوت، مش أكتر. لكن اضمن لك أن الوصفة دى مضمونة و متجربة و معمولة على ذوقنا و على المكونات المتوفرة عندنا .

8 مكعبات جبنة مربعات (كيرى)

كوب كريمة خفق طازجة

2 باكيت كريم شانتى

2 باكيت كريم كراميل

كوب لبن

بسكوت سافويار

معلقة قهوة سريعة التحضير كبيرة مدوبة فى كوب مياه دافية

للتزيين 

معلقة كبيرة كاكاو خام

معلقة صغيرة قهوة سريعة التحضير مطحونة ناعم

هنحتاج صينية التشيز كيك اللى بتتفتح من الجنب. هنبطنها بكلينج فيلم.

نجهز خليط الجبنة فى الكيتشن ماشين: الجبنة و الكريمة و الكريم شانتى و الكريم كراميل و اللبن.

أنا بكتفى بسكر الكريم شانتى و الكريم كراميل لكن ممكن نزود 2 معلقة كبيرة سكر بودرة.

ندهن معلقة كبيرة من الخليط فى الصينية أول حاجة علشان نثبت عليها البسكوت فى الجناب.

نكسر البسكوت بالسكينة من تحت عشان يبقى مربع و ينفع يقف و نراعى يكون طول واحد.

نغطس البسكوت فى خليط القهوة.

نرص أول طبقة من البسكوت على اطراف الصينية و فى القاع.

tiramisu recipe

و بعدين طبقة الجبنة و نفضل نكرر الطبقات لحد ماتكون آخر طبقة من خليط الجبنة.

نقلب الكاكاو و القهوة للتزيين و نرشهم بمصفاة صغيرة فوق وش الصينية.

دخليها التلاجة من بالليل لتاني يوم أو ٤ ساعات على الأقل قبل التقديم عشان الطبقات كلها تترابط.

تيراميسو

Leave a Reply