Categories
في المطبخ

بودينج الشوكولاتة

مفيش حد مش بيحب الشيكولاتة! يا سلام لو نغطس فى بولة شيكولاتة كده! مش هنبقى عايزين حاجة تانية من الدنيا. علب البودينج الجاهزة فى السوبرماركت ممكن تبقى اسهل طريقة تاكلى بيها شوكولاتة، المشكلة ان كلها مواد حافظة. امهات كمان بتبقى متخيلة انها بديل صحى لأطفالها لو بيحبوا الشوكولاتة جداً. لو عملتيه فى البيت طازة و بطريقة سهلة و مكونات بسيطة، هترضي العيلة كلها كبير و صغير. و هتبقى متأكدة ان اللى ولادك بياكلوه ده لبن فعلاً و مفيد.

 

لتر لبن أو 4 أكواب

نصف كوب نشا أو 3 معلقة كبيرة مليانين

3 معلقة كبيرة كاكاو

3 مكعبات شيكولاتة خام

نصف كوب سكر زيادة أو أقل حسب الرغبة

 

• نسخن 3 كوب لبن على النار و نشيل كوب على جنب عشان هندوّب فيه النشا و الكاكاو.

• نضيف الشكولاتة و السكر على اللبن لحد مايدوب السكر كله و الشوكولاتة تسيح.

• نخلط النشا و الكاكاو مع كوب اللبن و نقلبهم كويس. نتأكد ان مفيش كتل.

• ننزل خليط الكاكاو و النشا على اللبن و نخليهم يغلوا على النار لحد ما تاخد قوام المهلبية الكريمى.

• نطفى النار اول ما توصل للقوام اللى انتى عايزاه.

• نصبه فى الأطباق و نزينه بعد ما يبرد، مش و هو سخن. ندخله الثلاجة يسقع قبل التقديم.

• هنستعمل شوكولاتة خام أو أى نوع شوكولاتة عادى بس يكون نضيف و طعمه حلو. يعنى لو نص بار شوكولاته مستوردة اتبقى من الاطفال خديه اعملى بيه. عشان هو ده الأساس اللى معتمدين عليه فى أن الطعم يبقى زى المهلبية الجاهزة و أحلى كمان.

• ممكن تحضرى كمية للأسبوع و تحفظيها فى التلاجة ما بين ٣ ل٥ ايام. هتحتاجى علب صغيرة محكمة الغلق عشان تحافظ عليه.

Leave a Reply

Your email address will not be published. Required fields are marked *