Categories
في المراية

بمعلقتين زيت زيتون بس

لو قررتى تعملى ريجيم و نزلتى اشتريتى ازازة زيت زيتون محترمة كده و غالية و بعدين معجبكيش و اتركن، أحب أقولك متندميش بالعكس مبروك عليكى زيت من أنقى أنواع الزيوت ليه نتايج مبهرة للشعر و الجسم و أحسن من أجدع علاجات مليانة مواد كيميائية و هتلاحظى إن معظم الدكاترة بيوصفوه كعلاج آمن و فعال للجلد و البشرة و الشعر.

١. هاتى قطنة و معلقتين زيت الزيتون و بقى عندك مزيل مكياج طبيعى أحسن من الكريمات الجاهزة اللى مليانة مواد كيميائية و هتنشف بشرتك بعد فترة.

٢. اخلطى معلقتين زيت زيتون مع شوية سكر و اعملى مقشر طبيعى لوشك أو ايديكى أو جسمك عموماً و شيلى أى جلد ميت و شوفى النضافة و النعومة بعد كده.

٣. لو حامل أو عندك خطوط بيضاء فى جسمك (سترتش ماركس) ادهنى كل يوم زيت زيتون هيرطب بشرتك و يقلل من ظهورها.

٤. لو حاسة أن بشرتك ناشفة أو بتقشر، اخلطى معلقتين  زيت جوز هند  مع معلقة زيت زيتون و اعملى أحسن كريم مرطب فى العالم هيخلى وشك منور.

٥. هاتى قطنة ودان و حطى عليها زيت زيتون مخلوط بفازلين و ادهنى بيها رموشك كل يوم قبل النوم و هتشوفى نتايج هايلة فى شكلهم و طولهم.

٦. ضوافرك بتتكسر أو الجلد حواليها شكله مش حلو؟ ادهنيها بزيت الزيتون و سيبيها ممكن لحد نصف ساعة و بعدين اغسليها بمياه. فيتامين E اللى موجود فى زيت الزيتون هيساعدها تتحسن جداً.

٧. قولى لمامتك تدهن وشها بزيت الزيتون مرتين فى الأسبوع. فى الأول هتلاقى بشرتها ناعمة و بعدين هتمنع ظهور التجاعيد لفترة أطول و خصوصاً لو كانت بشرتها عادية أو تميل للجافة.

زيت زيتون

٨. للهالات السوداء تحت العين ادهنى زيت زيتون بالليل و نامى بيه و الصبح اغسليه.

٩. بعد ازالة الشعر استخدميه كمرطب للجسم عشان تتجنبى أى احمرار أو تهيج للجلد اللى بيسبب هرش.

١٠. بمعلقتين زيت زيتون و معلقة زيت لوز ادهنى كل المناطق الجافة فى الجلد زى الكوعين و الركب و كعوب الرجلين لمدة 10 دقائق و بعدين اغسليهم و شوفى النعومة.

١١. لو فاضية و قررتى تدلعى نفسك و تعملى حمام كريم لشعرك مش لازم تنزلى مخصوص تشترى حاجة. زيت الزيتون موجود، بس تدفيه الأول و تدلكى بيه فروة شعرك كويس أوى و تغطيه بشاور كاب و سيبيه ساعة قبل الشامبو. هتحسى شعرك إتحسن كتير و بقى طرى و لامع.

١٢. القشرة اللى بتظهر للأطفال خصوصاٌ فى أول أيام من الولادة ادهنيها بزيت الزيتون كل يوم من الصبح و بالليل اغسليها و بسبب الرطوبة اللى فى زيت الزيتون هتلاحظى انها بتختفى بعد فترة.

١٣. نقطتين زيت زيتون على جلد الطفل قبل مايلبس الحفاضة هيعملوا حاجز بين جلد الطفل و الحفاض و يحميه من التهابات الحفاضات.