Categories
رمضانيات

بط بالبرتقال

الطريقة دي بتطلع البط مقرمش و مستوي تمام و طعم صوص البرتقال فيه مظبوط.

١ بطة صغيرة كاملة مغسولة و متنضفة
١/٤ معلقة صغيرة ملح
١/٤ معلقة صغيرة فلفل
للصوص:
٣/٤ كوب سكر بني
١ معلقة كبيرة زبدة
٢ معلقة صغيرة بشر برتقال
٣/٤ كوب عصير برتقال

اول حاجة هتسخني الفرن علي حرارة ٢٠٠
دلوقتي نحضر البطة. هننشفها الاول كويس اوي من اي سوائل.
و نعمل فيها خروم بالسكينة.
هنتبل البطة بالملح و الفلفل و بس.
و هنحطها علي شبكة علي صينية، يكون الصدر لفوق.
الشبكة مهمة جدا عشان البطة تبقي مقرمشة من برة و متبقاش طريقة من العصارة اللي هتنزل منها.
هنسيبها في الفرن حوالي ٤٥ دقيقة لساعة.
و بعدين نطلعها و نعيد علي الفتحات اللي عملناها.
المرة دي هنلفها يبقي الصدر لتحت. و ندخلها الفرن ٤٥ دقيقة تاني.
خلاص البطة استوت.
نطلعها من الفرن و نغطيها بفويل و نسيبها ترتاح ٢٠ دقيقة. لحد ما نحضر الصوص.
حطي الفويل عليها من بره، بس متكتميهاش عشان متبقاش طرية. عايزينها تفضل چوسي من جوه و مقرمشة من بره.

دلوقتي نحضر الصوص.
هنحط كل مكونات الصوص في حلة و نخليها تغلي.
لما تغلي نوطي علي الصوص و نسيبه يتكثف. هياخد حوالي ١٥ دقيقة.
القوام المفروض يبقي عامل زي العسل.
لو الصوص خفيف ممكن تدوبي معلقة صغيرة نشا في ربع كوب مياه و تضيفيه للصوص، هيتقل في ثواني.
و البطة علي الشبكة اسقيها بالصوص و سيبيها تصفي الزيادة.
لو حابة طعم الصوص يبقي قوي سيبي البطة ترتاح ١٠ دقايق و بعدين اسقيها تاني.
و قدمي من الصوص جنب البطة وقت التقديم.