Categories
في المطبخ

بطاطس محمرة فى الفرن

بحب البطاطس جداً، و هو مين مش بيحب البطاطس! بتكمل أى أكلة و تقريباً بتليق مع كل الأكلات، تلاقيها منورة على السفرة و بيحبوها الكبار و الصغيرين.
ده غير أن البطاطس مفيدة جداً و مليانة معادن و نسبة بوتاسيوم أعلى من الموز و كربوهيدرات أفيد من الرز و المكرونة و مضادات أكسدة بتقلل نسبة الدهون فى الجسم.
بيتقال عليها comfort food يعنى أكل مريح و لو كلنا منها كل يوم هنتبسط بطعم حلو و فايدة للجسم.
بس طبعاً لو اكلناها كل يوم متحمرة فى الزيت مش هنستفيد بأى حاجة من فوايدها و كمان هنتخن.
.البطاطس المحمرة فى الفرن اختراع، بعد ماكنت حارمة نفسى منها عشان هتخن دلوقتى ممكن اعملها كل يوم من غير ما احس بالذنب هى معلقة زيت واحدة بس و استمتع بطعم البطاطس اللى بحبها.

بطاطس
زيت
ملح
ورق زبدة Baking sheets
البهارات اللي تفضليها او استخدمي خلطتنا:
١ معلقة صغيرة بابريكا
١ معلقة صغيرة كاري
١/٢ معلقة صغيرة جنزبيل بودر
١/٤ معلقة صغيرة جوزة الطيب بودر
ملح و فلفل حسب الرغبة

بطاطس محمرة

نسخن الفرن على درجة حرارة 200.
نقطع البطاطس صوابع متوسطة الحجم.
نرش عليها الملح و الفلفل و بهاراتك بقي.
نفرد ورق الزبدة فى الصنية و ندهنه بالفرشاه نصف معلقة زيت.
نفرد البطاطس بشكل متساوى فى الصينية بحيث البطاطس متكونش فوق بعضها عشان تاخد سوا واحد.
تدخل الفرن المسخن مسبقاً لمدة نصف ساعة أو لحد ماتتحمر كويس و تاخد لون دهبى حلو من فوق و من تحت.
يفضل تقدميها سخنة اول ما تخرج من الفرن.