Categories
في المطبخ

بسكوت بالجبنة

الفكرة دى جاتلى يوم عيد ميلاد ابنى بعد ما جهزت التورتة و الكب كيك و المشروبات، اكتشفت أن السفرة كلها حلو و مفيش حوادق خالص. كمان مفيش وقت اطلب حاجة جاهزة. فتحت التلاجة و دولاب المطبخ و افتكرت الوصفة الهايلة دى. أنقذتني و تقريباً مكلفتنيش حاجة . قدمتها بشكل مختلف، و من ساعتها و أنا بأعملها على طول و ناكلها على الفطار مع الشاى و بتعجب الأطفال و الكبار.

2 كوب دقيق

نصف كوب سمن او زيت أو زبدة، بس الأحلى سمن

نصف كوب جبنة فيتا

2 جبنة مثلثات أو مربعات أى جبنة كريمى

2معلقة صغيرة بيكينج باودر

رشة ملح

نخلط المكونات كلها مع بعض لحد ما العجينة تلم معانا.

نسيبها ترتاح فى الثلاجة شوية قبل ما نفردها، حوالي ١٠ دقايق. لو لقينها بتفتفت شوية مش مشكلة، هى مش بتبقى متامسكة أوى عشان الجبنة.

نفرد و نقطع بالقطاعة و تدهنيها بالبيض و اللبن و ممكن نرش سمسم أو حبة البركة أو جبنة مبشورة رشة بسيطة.

تدخل فرن على 180 درجة حوالي ١٥ دقيقة لحد ما تاخد لون ذهبى من تحت و تتحمر من فوق.

البسكوت بيطلع فى الأول طرى شوية و بعد كده بيبقى مقرمش و بيدوب فى البق فى نفس الوقت.

Leave a Reply