Categories
في المطبخ

براونيز التفاح

كلمة براونيز التفاح تبدو غريبة طبعاً لكن السؤال هى ليه اسمها كده مش كيكة التفاح و خلاص؟
عارفين احساس لما تبقى عايز تأكل حلوة بقوام البراونيز طرية و تقيلة و غنية كده بس مش بالشيكولاتة.
طبعا لو بالكيك عادى يبقى تعملى كيكة معجنة لكن فكرة التفاح هنا بتدى نتيجة هايلة و طعم مختلف للناس اللى مش بتحب الشكولاتة.

نصف كوب زبدة أو سمن
بيضة
كوب سكر
3 تفاح مقشر و مقطع مكعبات صغيرة
1 كوب دقيق
ربع معلقة صغيرة ملح
نصف معلقة صغيرة باكينج بودر
نصف معلقة صغيرة باكينج صودا
معلقة صغيرة قرفة

نسخن الفرن على ١٨٠ درجة. يعنى عايزينه متوسط و لا سخن جداً و لا بارد.
لو الزبدة مش بدرجة حرارة الغرفة و طالعة من التلاجة، يبقي نسيحها و نستخدمها سايحة.
فى بولة كبيرة نحط الزبدة و السكر و البيضة و نضربهم بالمضرب.
نخلط معاهم قطع التفاح.
فى بولة منفصلة نخلط المواد الجافة؛ الدقيق و الملح و الباكينج بودر و الباكينج صودا و القرفة.
نخلط المواد الجافة على خليط التفاح.
نجهز صينية مدهونة سمن و مرشوشة دقبق.
ندخلها الفرن ٣٥ دقيقة و هنلاحظ الوش اتحمر و خد لون ذهبى كده يبقى استوت.

براونيز تفاح

معلومة
نسبة السكر للتفاح ممكن تتغير يعنى لو التفاح مسكر و حلو ممكن نقلل السكر لنصف كوب.
و لو التفاح مش حلو يبقى الوصفة دى حل لانقاذه و كباية السكر هتظبط طعمه.
إضافة المكسرات بتديلها طعم حلو، خصوصاً عين الجمل.
القرفة صديقة التفاح و أنا بحبها. عشان كده بحط معلقة صغيرة، اللى مش بيحبها يكتفى برشة خفيفة.