Categories
في المطبخ

بان كيك الموز: وصفة للأطفال المتعبين فى الأكل

فى يوم حلمت حلم جميل انى بأفطر ابنى و اديته فى الأول معلقة عسل على الريق و بعدين عملتله بيضة فى ساندويتش و للتحلية أكل موزة. يا سلاااام حلم جميل! و طبعاً صحيت على احباط كل يوم!
بس من هنا جاتلى الفكرة ازاى اقدمله الوجبة دى و ياكلها و هو مستمتع، من غير ما اجرى وراه عشان معلقة العسل، و اتخانق معاه عشان ياكل البيضة، اللى بالعافية بياكل البياض بتاعها بس. و طبعاً العيش ده ممكن يقعد يمضغ فيه 3 ساعات و الموزة تسوَد قبل ما يكمل نصها!

الموضوع طلع سهل أوى و مش بياخد فى تحضيره أكتر من 10 دقايق.

 

موزة
بيضة
2 معلقة كبيرة شوفان مطحون هيبقى ساعتها دقيق الشوفان و ممكن طبعا دقيق أبيض عادى أو أسمر (دقيق القمح الكامل)
رشة قرفة و فانيليا، او اللى تحبوه
معلقة كبيرة عسل أبيض

 

نهرس الموزة كويس أوى بالشوكة.
نكسر عليها البيضة .
نحط الدقيق و نخلط كله مع بعضه.

نزود الإضافات: الفانيليا، القرفة، قطع شوكولاتة.
نسخن طاسة و ندهنها زبدة أو زيت مسحة خفيفة، و ممكن من غير خالص لو الطاسة من النوع اللى مش بتلزق.
نستنى ثوانى المادة الدهنية تسخن هى كمان و بعدين نحط معلقتين كبار من الخليط.
لما الوش يعمل فقاعات و البانكيك تمسك نفسها من الجناب نقلبها على الوش التانى.
هتحتاجى حوالى دقيقة فى الأول و 20 ثانية على الوش التانى.

نطلعها و ندهنها بالعسل الأبيض و هى لسه دافيه عشان يسيح عليها.

ميزتها أن هى بتبقى طرية جداً عشان الموز و خبينا جواها البيضة و الشوفان. العسل بيدي الأطفال احساس انهم بياكلوا حاجة حلوة.

وجبة متاكملة سهلة كفطار أو عشاء و ممكن الطفل ياكلها لوحده.

Leave a Reply

Your email address will not be published. Required fields are marked *