Categories
في المطبخ

باستا فلورا

من زمان و مامتى بتعمل الباستا فلورا بالسمنة، ناس كتير بتخاف تعمل الحلويات بالسمن و بتخليه للطبيخ بس. لكن الحقيقة ان السمنة البلدى المحترمة أحلى و أطعم من أى زبدة فى العالم و دى أول وصفة أنا جربتها بالسمن و اثبتت نجاحها.

* نصف كوب سكر

* نصف كوب سمن

* ٢ بيضة

* معلقة صغيرة فانيليا

* ٢ كوب دقيق

* معلقة صغيرة باكينج بودر

* ٥ معالق كبيرة مربى

فى الوصفة ممكن نستخدم أى نوع مربى، أنا هنا هستخدم مربى الفراولة البيتى.

نخلط السكر و السمن بالمضرب اليدوى أو الكهربائى.

نضيف البيض و الفانيليا.

ننخل الدقيق و نخلطه مع الباكينج بودر و نقلب لحد مايتكون خليط أتقل من الكيك شوية .

فى صينية مدهونة سمن نفرد ثلااث ارباع الخليط و نسيب الربع الباقى للتزيين.

المربى لو متماسكة و فردها هيكون صعب نحطها على النار أو فى الميكروييف دقيقة واحدة.

الباقى من العجين بنضيفله معلقتين كبار دقيق و نفرده و نقطعه بالقطاعات أشكال و نزين بيه الوش .

تدخل فرن سخن على درجة حرارة ١٨٠ لمدة ٢٠ دقيقة.