Categories
في المطبخ

باستا الفريدو

اول وصفة جربتها فى اخواتى. سهلة للمبتدئين و غدوة بدون مجهود للمحترفين. بحب فيها انها خدعة كده. ممكن تعمليها فى عزومة ايطالى و تبهرى بيها ضيوفك  وهى مش بالصعوبة اللى هم متخيلينها. 

كيس مكرونه قلم او قواقع

٢٠٠ج مشروم

١٠٠ج سلامي

٣٠٠ج صدور دجاج مقطعة مكعبات

٢ قطعة طماطم مجففة

ملعقة كبيرة زيت زيتون

١\٢ كوب كريمة طهي

ملح

فلفل

بابريكا

توم بودرة

حطي المكرونة تتسلق حسب تعليمات العبوة. انا افضل انك تستخدمي penne  او rigatoni او shells. لأنك محتاجة حبة المكرونة نفسها تحوش صوص جواها.

في حلة تانية هنحضر الصوص.

سخني الحلة كويس الاول و بعدين ضيفيلها زيت الزيتون و استني ثواني حرارته تعلي شوية و بعدين ضيفي مكعبات الفراخ.

قلبي الفراخ لحد ما تبتدي تتحمر من بره. دلوقتي حطيلها البهارات: الملح ، الفلفل و البابريكا ، التوم البودرة. و معاهم السلامي. ممكن تقطعي السلامي مكعبات صغيرة او شرائح طويلة، حسب ما تحبي.

استني لما السلامي يتحمر هو كمان و بعدين ضيفي الطماطم المجففة. لازم تقطعيها اصغر حاجة ممكنة عشان تنزل طعمها.

آخر حاجة هي المشروم و ده محتاج تقليبة سريعة عشان يحافظ علي قوامه.

دلوقتي تحطي كريمة الطهي و تقلبي لحد ما تبتدي تغلي. استمري في التقليب لحد ما توصل للقوام اللي بتحبيه.

ضيفي المكرونة المسلوقة و قلبيها في الصوص كويس.

دى وجبة كاملة تقريباً، جنبها سلطة المشروم كفاية اوى.

Leave a Reply

Your email address will not be published. Required fields are marked *