Categories
مع العيال

ايه هو روتين النوم للأطفال؟

مش دايماً كلمة روتين معناها حاجة مملة بالعكس ساعات كتير الروتين بيبقى مريح خصوصاً مع الأطفال.

لكل الأمهات عودوا ولادكوا على روتين النوم لمصلحتكوا أولاً. خلينا صرحاء، الحياة فى وجود طفل بتتغير 180 درجة من بيت هادى و ناس بتنام بمزاجها و تصحى وقت ماهم عايزين لعياط فى نصف الليل و سهر و رضاعة مع تغيير حفاضات.

تتحول الأم اللطيفة للست أم العيال و جوزها يسيب أوضة النوم و ينام على الكنبة برا عشان مش مستحمل زن و عياط البيبى طول الليل. و ده أكيد هيأثر على علاقتهم بالسلب و تبتدى المشاكل اللى ممكن تجنبها بمجرد تطبيق روتين النوم مع البيبى من أول يوم.

ريحى البيبى

أول حاجة و أهمها تتأكدى أن مافيش حاجة تعباه زى المغص، الأمساك والغازات. دول ليهم دواء معروف و آمن جداً الدكتور هيكتبهولك من أول يوم ممكن تديه للبيبى كل ما تحسى انه بطنه وجعاه.
تغيرى الحفاضة أول بأول حتى لو عمل تواليت وهو نايم تغيري له و تتأكدى أن مفيش تسلخات.

الفرق بين الليل و النهار

طول ما الدنيا نهار افتحى كل شبابيك البيت.
انزلى اتمشى بالبيبى شوية أو حتى اطلعى بيه فى البلكونة و قعديه فى الشمس، اللى هتدي له فيتامين د طبيعى مهم جداً لنموه.
طبعا بالليل نهدى النور و نطفى التلفزيون.
مع الوقت هتلاحظى نشاطه الصبح زاد من لعب و ضحك و خروج و بالليل هدوء و نوم.

حمام دافئ

يفضّل يبقى نظام يومى و معاد استحمام محدد.
مثلا الساعة ثمانية بالليل نبتدى ندخل الأوضة و نجهز غيار نضيف و لبس مريح للنوم. نحمى البيبى و نعمل له مساچ لطيف بزيت الأطفال. نهدى النور خالص و تكون آخر وجبة رضعة و هو فى السرير.
حتى لو منمش نغني أغنية أو نحكي حدوتة بصوت هادئ.

النوم بالنهار

مهم جدا للبيبى أثناء مراحل نموه انه ياخد Nap القيلولة متحرميهوش منها اعتقاداً منك انه كدة هينام بالليل كويس. بالعكس هو لما مينامش بالنهار هيقضى معظم يومه فى اريفه احنا فى غنى عنها.
رضعيه و غيري له و سيبيه ينام براحته و لما يصحى اهريه لعب و متسيبيهوش.

النوم بالليل

بعد طبعاً تطبيق كل الكلام ده من نشاط نهارى و دش بالليل برضه البيبى هيصحى بالليل للرضاعة. بيرضع طبيعى، تصحى له على طول و يبدأ الرضاعة فى هدوء. لو بيرضع صناعى يفُضّل تكونى محضرة الرضعة مسبقاً. تغيري له و تدفية كويس و يرجع ينام. أهم حاجة متفتحيش نور عالى او دوشة كتير، لازم نور هادى و هدوء حتى لو عيط أو بقى عايز يلعب شوية، حافظى على نفس الجو الهادى. شوية بشوية هيتعود على مواعيد النوم و مش هيرتاح غير فى النظام ده. المهم تخليكى وراه و متيأسيش أبداً و اتطمنى لخبطة النوم بالليل دى مش بتطول، فى خلال شهور هيتعود على النوم فى مواعيد ثابتة.

ممنوع

أرجوكى متسمعيش كلام أى حد يقولك سيبى البيبى يعيط لحد ماينام و هو كده هيتعود! الدراسات اثبتت ان الأطفال لما بيحسوا بضغط عصبى و توتر أجسامهم بتفرز هرمون اسمه كورتيزول ده هرمون سام بيقتل خلايا المخ.
تخيلى ممكن توصلى ابنك لأيه! و هو ممكن يكون كل اللى محتاجه انك تشيليه و تاخديه فى حضنك و تغني له أغنية هتلاقيه راح فى سابع نومه.

Leave a Reply

Your email address will not be published. Required fields are marked *