Categories
في المطبخ

المطبخ مش صعب

مش بتعرفى تطبخى او مش متشجعة تتعلمى طبخ اصلاً؟ المطبخ مش صعب على فكرة، هو عايز بس النية. متزنقيش نفسك لآخر لحظة قبل ما تستقلى فى بيتك او حياتك عامةً. ابدأى بدرى بالخطوات دى.

 

ابتدى بالأساسيات: الطبخ ليه شوية اساسيات، لو اتعلمتيها صح، هتعرفى تطبخى اى حاجة. من اول الحاجات اللى اتعلمتها انى اشوح صدور الفراخ مع ملح و فلفل بس. وصفة بسيطة زى دى علمتنى ازاى ادى اللحوم لون قبل طبخها. ازود مياه امتى و اضبط النار عالية ولا اوطيها. اتعلمت اظبط الملح و الفلفل و اعرف امتى الفراخ استوت.

 

اطبخى النشويات: الأرز و المكرونة و البطاطس. مع كل غدوة هتحطى طبق نشويات. ابتدى بالمكرونة لأنها الأسهل.

عادى جدًا ان اول حلة رز تعمليها تعجن و تترمى، جربى تانى لحد ما تحفظى ظبطة المياه، و متنسيش الملح.

 

دوقى الأكل: طول ما انتى بتتعلمى دوقى الأكل، اتأكدى ان المكرونة اتسلقت، ان الملح مظبوط و كل الكلام ده.

 

ابتدى بالتدريج: متحاوليش تعملى عزومة من اول مرة تدخلى المطبخ. اعملى اكلة بسيطة او طبق جانبى. و حاولى تجربى حاجة جديدة كل يوم

 

الأنترنت مليان وصفات و التليفزيون بقى فيه قنوات متخصصة فى الأكل افتحى اتفرجى و معلومة من هنا على معلومة من هناك هتلاقى نفسك اتشجعتى أكتر تقومى تجربى حاجة من اللى شفتيها.

 

متتكسفيش تسألي على الوصفة: لو دوقتى أكلة حلوة عند حد إسألي على طريقتها بكل بساطة، مش عيب ابداً بالعكس ده ساعات بيحسس اللى طبخ بأعجابك و إهتمامك بالأكلة أكتر.

 

الحلويات: ابتدى بحاجات سهلة و جاهزة عالتحضير زى جيلي بالفواكهة و كريم كراميل و طبعاً الكيك و ده ليه أسرار بس تعرفيها هتلاقيه سهل جداً.

 

قسمي الطبخة: إحساسك بالتعب و وقفِتك طول اليوم فى المطبخ هتكَرهك فيه، حاولى تقسمى الطبخ على مدار اليوم أو على يومين كمان يبقى أحسن، يعنى مثلاً تتبلي الفراخ من بالليل و تانى يوم تشويها أو تقليها، اللحمة تسلقيها الصبح بدرى و قبل الأكل الرز و الخضار مش هياخدوا وقت، عجينة البيتزا ممكن تتعجن من قبلها بيوم و هكذا..

 

و متنسيش تدلعى نفسك: اشترى أدوات شكلها حلو، شغلى مزيكا، اعملى لمامتك برنامج طبخ و قعديها تتفرج عليكى.

Have fun!

1 reply on “المطبخ مش صعب”

Leave a Reply

Your email address will not be published. Required fields are marked *