Categories
في المطبخ

اللبن المكثف المحلى

 اللبن المكثف المحلى ممكن يكون أساسى فى بعض الوصفات بس مش بالضرورة يكون أساسى فى طلبات البيت و ده اللى كان ممكن يمنعنى من انى اعمل وصفة من مكوناتها اللبن المكثف المحلى عشان مش موجود عندى فى البيت و لازم اشتريه مخصوص. لكن الوصفة دى معتمدة على اللبن البودرة، متوفر بسهولة فى البيت و فى أى سوبر ماركت بسيط جنب البيت. اعمليه لما تحتاجيه فى وصفة معينة أو جهزيه من بدرى و شيليه فى التلاجة على الأستعمال على طول. و لو بتشربى الشاى بلبن بسكر جربى تحطيه مع الشاى بدل اللبن، بيدى طعم أحلى و أغنى بكتير.

كوب لبن بودرة

كوب سكر بودرة

نصف كوب مياه

معلقة كبيرة زبدة

نحط كل المكونات فى كسرولة على النار.

نقلب كويس بالمضرب السلك اليدوى.

نتأكد أن السكر داب كويس و الزبدة ساحت.

غلوة واحدة بس و نطفى أول مانلاقيه بيتقل عشان مايقلبش كراميل و يتلسع مننا.

نسيبه يبرد و بعد كده نحطة فى برطمان نضيف و نشيلة فى الثلاجة يبقى جاهز عندنا لأى استخدام فى الحلويات.

يعيش فى التلاجة من أسبوع لأسبوعين حسب ظروف التخزين.