Categories
Featured في المراية

العناية بفرش المكياج

انا بهتم جدا بفرش المكياج بتوعى و بأحرص انى انضفهم تقريباً بعد كل استعمال. لو عدد الفرش عندك محدود يبقى لازم تنضفيهم على الأقل مرة كل أسبوع. الفرش دورها الأساسى انها توزع المكياج صح و فى نفس الوقت تمنع انك تشتخدمى المكياج من العلبة مباشرة فتقلل احتمالات نمو البكتيريا. الفرش اللى مش نضيفة هتقصر عمر المنتجات اللى بتستخدميها لأنها هتكوّن فطريات و بكتيريا و هتنقلها للمنتجات دى. تانياً، نمو البكتريا ده هيأثر على بشرتك و هتلاحظى ظهور حبوب او حساسية. تالت حاجة، الفرشة نفسها هتبتدى تتأكل و شعرها يتكسر و هنا مش هتبقى مفيدة أصلاً.

طبعاً فى كل محلات المكياج ممكن تشترى محلول تنضيف الفرش. و فيه كمان سبراى مضاد للبكتريا ممكن ترشيه على الفرشة بعد كل استخدام لحد ما يبقى عندك وقت تغسليها.

و ممكن تعملى زى ما انا بأعمل و تعملى محلول التنضيف ده بنفسك. فيه كذا طريقة، الأتنين دول اكتر طريقتين بحبهم و بشوف كمية المكياج اللى كانت على الفرشة اول ما احطها فى محلول التنضيف.

حضرى كل الفرش اللى عايزة تنضفيها و هاتى برطمان و امليه كوباية مياه.

اول طريقة: زودى معلقة كبيرة شامبو الأطفال + نقطة مطهر زى الديتول. لو معندكيش شامبو اطفال ممكن تستعملى الشامبو العادى بتاعك. بس شامبو الأطفال الطف بكتير على الفرش و مش بيسيب اى ترسبات فبيبقى اسهل فى الشطف.

تانى طريقة: طبيعية 100%. بس هنا المياه لازم تبقى دافية شوية و زودى عليها معلقة كبيرة زيت زيتون و معلقة صغيرة عصير ليمون.

فى الطريقتين مش محتاجة تنقعى الفرش او اى حاجة قبلها. اول ما تجهزى المكونات فى البرطمان، رجيه كويس الأول و بعدين تنزلى كل فرشة لوحدها. حركى الفرشة كويس فى المحلول، كأنك بتقلبيه. بعد ما تتأكدى ان كل المكياج اللى عليها نزل. اشطفيها كويس تحت مياه جارية و بخفة اعصرى المياه الزيادة.رصى الفرش كلها على فوطة نضيفة و سيبيها فى مكان فيه تهوية كويسة. قليبيهم من وقت للتانى عشان تساعديم انهم ينشفوا اسرع.

هيحتاجوا على الأقل يوم كامل. لو عايزاهم ينشفوا اسرع ممكن تعلقيهم من المقابض عشان يتصفوا اسرع. بلاش الحمام عشان الرطوبة فيه عالية. هتلاحظى الفرق لما تستعمليهم المرة الجاية.

1 reply on “العناية بفرش المكياج”

Leave a Reply

Your email address will not be published. Required fields are marked *