Categories
مع العيال

العاب ممكن تصنعيها فى البيت لعمر 6-12 شهر

احنا بنحب نشجع فِطرة الطفل و مقتنعين بأهمية تنمية المهارات الحسية للطفل و توسيع مداركه بالأخص عن طريق اللعب و الأستكشاف. اللعب المتوفرة فى محلات اللعب معظمها غالى و مفيش منه تشكيلات كبيرة. انا قررت استخدم حاجات من البيت و الهدف فى الآخر واحد. هقولك على اكتر من طريقة تنمى بيها ادراك الطفل و تعلميه.

١. تمييز الأصوات و التفريق بينهم: دى اول لعبة اعملها لبنتى، و الفكرة جت فى ساعتها بصراحة. عندى ببرونات بطلنا نستخدمها عشان لونها غيّر او مش لاقيين المقاس الأكبر للحلمات. و كانوا مركونين فى درج لحد ما افكر هأعمل فيهم ايه. قررت انى اعلمها الأصوات من خلالهم. هتجيبي 3-5 ببرونات و تغسليهم و تنشفيهم كويس من جوه. هتشيلي الحلمات و هتملى كل ببرونة بحاجات تعمل اصوات مختلفة و تقفليها كويس جداً عشان البيبي ميعرفش يفتحها. اللى عملتهم مليت واحدة رز و عدس، عشان يبقى ملون كمان، و واحدة مكرونة اشكال مختلفة و واحدة فاصوليا بيضة و لوبيا و واحدة كليبسات ورق حديد و آخر واحدة حطيت فيها دومينو. متمليش الببرونة اوى عشان تفضل خفيفة البيبي يقدر يرفعها و يحركها، هتحتاجى مثلا معلقة كبيرة ارز. و عشان تسيبي مساحة للى جوا الببرونة يتحرك و يعمل دوشة. سيبي البيبي يحرك الببرونة و يرجها و يسمع الفرق بين صوت دى و صوت دى و يراقب كمان الاشكال و الألوان جوه الببرونة و يتابع حركتها.

 

٢. تمييز الألوان: دى نفس فكرة الأصوات، بس الأشكال و الألوان. هتجيبي الببرونة و هتمليها صمغ، هاتى صمغ سائل شفاف من بتاع صنع لوح المدرسة. و انتى فى المكتبة هاتى اشكال صغيرة تقدرى تدخليها مع الصمغ، زى الحلى اللى بتبقى عشان صنع الخواتم او السلاسل. لو ملقتيش استعملى من البيت، ممكن مكرونة و تلونيها. و لو عايزة حاجة اساسية خالص، يبقى كل ببرونة تمليها لون، ممكن تستخدمى الوان الحلويات (صالحة للأكل) مع مياه عشان تبقى امان اكتر. او تفضى الأقلام الفلوماستر مع الصمغ، بس تلزقى غطا الببرونة يبقى مستحيل فتحه. لو مش عايزة تستعملى ببرونات ممكن تستبدليها بأزايز مياه صغيرة. انا استخدمت جليتر كمان مع الألوان.

لعب اطفال انشطة منزلية

 

٣. Stacking boxes المكعبات اللى بتتركب فوق بعضها: اللعبة دى بتمنى مهارة حل المشكلات و بتشجع الطفل على التركيز. على قد ما ممكن تظهر بسيطة، لكنها مهمة. ببساطة استخدمت طقم علب خفيف كنت جايباه من ايكيا و مش بستعمله تقريباً. غسلة حلوة و بدأت اعلم البيبي الفرق فى الأحجام و اساعدها انها تدخل العلب فى بعضها صح.

لعب اطفال انشطة منزلية

 

٤. تمييز الملمس المختلف: جبت تيشيرت قديم و قصيت من تحت الابط و فتحته من الجنب فبقى قطعة مستطيلة طويلة. جمعت من البيت حاجات ملمسها مختلف، حتة صوف من بلوفر قديم، قطعة كرتون، قطعة ورق عليه جليتر خشن، باقى التيشرت قصيته و عملت منه ضفيرة و كور بارزة صغيرة و هكذا. لحد ما مليت قطعة القماش الكبيرة. دى بتبقى حلوة اوى بالأخص لو البيبي بدأ يزحف او بيحب ينام على بطنه، هينام او يتمشى فوقها و يقعد يكتشف براحته. خلى بالك ان الأطفال بيحبوا يستكشفوا ببقهم، لو البيبي بتاعك بيحط كل حاجة فى بقه يبقى ابعدى عن اى حاجة ورق او بلاستك. و حاولى انك تخيطى بدل ما تلزقى الحاجة و خلى احجامها كبيرة عشان البيبي ميعرفش يبلعها.

 

٥. حطى البيبي فى كرتونة: ده للبيبي اللى ماسكين نفسهم شوية و هم قاعدين. هاتى كرتونة او صندوق بلاستيك و قعدى البيبي فيه و امليه لعب على مزاجك. لما بيبيقى عندى كمان كرتونة عالية بالزق جواها ورق ملون عشان اشجع البيبي على الاستكشاف اكتر. متحطيش لعب عادية، بالعكس فكرى فى موضوع للكرتونة. مثلا سفارى، يبقى تلونيها من جوه اخضر و تحطى فى ارضيتها سجادة خضرا كأنها نجيلة و اللعب تبقى حيوانات و تقلدى اصواتها.

Leave a Reply

Your email address will not be published. Required fields are marked *