Categories
في المراية

الحمام المغربى فى البيت

من أغلى لأقل سبا فى العالم و كلهم معتمدين الحمام المغربى كحاجة أساسية عندهم بس مع إختلاف الأسم Moroccan bath أو حمام العروسة. المهم إنه أثبت نجاحه تقريباً فى حل مشاكل الجلد كلها من غمقان و خشونة و جلد ميت. حتى لو انتي مجنونة نضافة و بتستحمي تلات مرات فى اليوم لما تعملي الحمام المغربى هتتفاجئ بالبلاوى اللى هتطلع، و لما تخلصى خالص و تشوفى النعومة و روقان بشرتك أحسن من أجدع مقشر فى العالم.

الحاجات اللى هنحتاجها للحمام المغربى هنا موجودة عند العطار أو الصيدلية أو محلات مستحضرات التجميل، سهل جداً انك تلاقيها

  • صابون مغربى ده بيبقى قوامه شبه الكريم بس أتقل شوية و لونه بنى غامق و ريحتة مش حلوة أوى متتخضيش.
  • ليفة مغربية و دى بتبقى صغيرة شبه الجوانتى و ممكن تجيبى معاها واحدة طويلة شوية عشان الضهر.
  • طمى مغربى أو أى سكرب (مقشر للجسم) هيؤدى نفس الغرض.
  • مياه ورد و لو بتشترى من عطار تأكدى عليه انها للجسم مش للأكل.
  • أى ماسك أو حمام كريم مناسب لشعرك.

هنعمل ايه بقى؟

  • نغسل شعرنا كويس بالشامبو و نحط حمام الكريم او الماسك و نلف شعرنا فى بونيه الأستحمام.
  • نعمل الكلام ده فى الوقت اللى البانيو بيملى مياه سخنة جداً أقصى درجة حرارة ممكن يتحملها جسمك، عايزين بخار كتييير.
  • نقعد بقى فى البانيو على قد ما نقدر و لو مفيش بانيو تحت الدش شوية حلوين عشان المسام تتفتح.
  • نحط الصابون على الجسم كله و نسيبه 10 دقايق بس نغسل الوش علي طول.
  • نغسل الصابون بالمياه السخنة و نبدأ نعمل بالليفة الجسم من تحت لفوق، نبتدى بالرجلين بعدين الأيدين و البطن و الصدر و كملى.
  • نركز على المناطق الخشنة زى الكوعين و الركب.
  • و فى المرحلة دى ممكن تشيلى الرؤوس السوداء من المناخير. ممكن تستخدمى سكرب بس لأن المسام بتكون مفتوحة من البخار.
  • أو تجيبى حجر تدعكى بيه كعوب الرجلين. هتلاقى الجلد الميت بيقع بسهولة جداً.
  • اغسلى جسمك كويس أوى بعد الليفة تانى بالمياه السخنة و اعملى سكرب أو الطمى المغربى.
  • اشطفى جسمك كويس بمياه فاترة.
  • نجيب قطن نغرقه مياه الورد و نمسح بيه الجسم كله. هتحسى بانتعاش فظيع فى اللحظة دى و هتشوفى نتيجة تعبك.

خدى بالك: الحمام المغربى بيتعمل قبل السويت، عشان لو انتى عروسة و هتقعى فى الغلطة دى زى معظمنا. السويت هيفتح المسام و تيجي بعد كده تعملى الحمام المغربى و تدعكى بالليفة هتلاقى جلدك التهب. لكن لما تعملى سويت بعده هتلاقى الموضوع سهل جداً.

عشان تشوفى نتايج مبهرة تفتيح و نعومة و كل إللى نفسك فيه، اعمليه كل 10 أيام مثلاً و لو عروسة الشهر اللى قبل الجواز تعمليه كل أسبوع.

Leave a Reply