Categories
في المراية

الحبوب و سنينها: أسباب ظهورها و علاجها

كلنا بنكره الحبوب البايخة إللى بتظهر فى أوقات استراتيچية. رايحة مناسبة مهمة، قررتى تتصورى مع ولادك، خارجة تتعشى برة او تدلعى نفسك شوية. حتى بدون أسباب، الوجع و قلة الراحة من اقل حباية كفاية انك تضايقى. قبل ما نقول حلول خلينا نقول بسرعة أسباب الحبوب دى جاتلك منين الأول:

• وراثة: لو حد من عيلتك عنده حبوب حاولوا تفصلوا حاجتكوا الشخصية عن بعض، خصوصاً الفوط لأنها من أسباب العدوى الاساسية.

• الهرمونات: و دى تقريباً بتبقى السبب الأساسى فى ظهور الحبوب. لخبطة الهرمونات فترة البريود أو الدورة الشهرية و مع الحمل و الولادة.

• التلوث: البكتريا فى كل حتة بتساعد جداً على تشجيع أى حباية بتفكر تظهر عشان كده حافظى دايماً على نضافة بشرتك.

• العادات الغلط: زى التدخين، الشكولاتات و السكريات الكتير و طبعاً أكل الشوارع اللى مليان دهون ممكن يكون سبب فى ظهور الحبوب.

• عوامل نفسية: التوتر و الطاقة السلبية اللى بتيجى قبل الأمتحان و لا قبل الجواز أو فى أى موقف صعب. نحاول نهدى كده شوية عشان كل ده بيطلع على وشنا فى الأخر.

• الكسل: لما نكسل نشيل الميكاب و ننام بيه أو لما حتى نكسل نقرا كويس على منتجات العناية بالبشرة بتاعتنا هل هى مناسبة لنوع بشرتنا فعلاً و لا لأ. عشان لو مش مناسبة، هتبهدل الوش و ممكن طبعاً نعمل ليها تجربة على الأيد الأول عشان نتطمن.

• السفر: متستغربوش لما تسافروا مكان بعيد ببيئة و جو مختلفين و تلاقوا ظهر حبوب، طبيعى جداً البشرة بتتأقلم مع الجو الجديد.

 

١٢ فكرة سهلة تخلصك من الحبوب فى البيت

١. العسل
هنحتاج ٢-٣ معالق صغيرة عسل أبيض.
نحطهم فى بولة صغيرة و بصوابعنا براحة نحط على الحبوب.
نسيب العسل ينشف و نديله فرصة يتشرب من غير مانلعب فيه لمدة ساعة.
نغسله بالمياه عادى و اكيد نكون غاسلين وشنا كمان قبل ما نحط العسل.
ليه العسل؟ عشان بيساعد على تنضيف مسام الجلد و بيمنع الميكروبات اللى هى بتزود الحبوب.

٢. ماسك العسل و القرفة
هنحتاج نصف معلقة صغيرة قرفة مع نصف معلقة صغيرة عسل.
نخلطهم مع بعض لحد مايبقوا زى الكريم كده و ندهن نقطة على كل حباية.
ننام بيه أحسن و الصبح نغسله.
نكرر الموضوع ده كل يوم لحد مانشوف نتيجة.
القرفة تعتبر مضاد للبكتريا بس ناخد بالنا انها تقيلة شوية و لازم نجرب الأول الماسك على الأيد عشان نتأكد ان احنا معندناش حساسية منها .

٣. الثلج
كل اللى هنحتاجه مكعبات ثلج و تى-شيرت قطن نضيف.
هنحط مكعبات الثلج جوه التيشرت و ندلك بيها المنطقة اللى فيها الحبوب لمدة ١٠ دقايق كل يوم.
منحاولش نحط الثلج علطول على الوش عشان هيضره أكتر مايفيده.

٤. البرتقال
اغسلى ايدك كويس و هاتى برتقالة و قشريها.
خدى القشر و امسحى بيه مكان الحبوب بس اعملى قشرة لكل ناحية عشان متنقليش البكتريا.
بعد كده هاتى قطنة و بليها فى عصير البرتقال و امسحى بيها وشك كله.
اغسلى وشك بعده على طول بمياه ساقعة.
البرتقال من الحمضيات الغنية بفيتامين سى اللى هايل للتخلص من الحبوب.

٥. الزبادى
معلقتين زبادى و قلبيهم كويس أوى.
افرديهم على وشك لمده 20 دقيقة.
كرريه مرتين فى الأسبوع عشان تلاحظى الفرق.

٦. الباكينج صودا
اخلطى كميات متساوية من الباكينج صودا و المياه مع بعض لحد مايبقوا زى عجينة.
اعملى بيها مساج فى شكل دائرى لمده 30 ثانيه و بعدين اغسليها بمياه ساقعة.
هتلاقيها بتشيل الجلد الميت و أى قاذورات و تلوث.

٧. زيت جوز الهند
زيت جوز الهند هايل و مناسب لكل الأعمار و كل أنواع البشرة.
ممكن تدفيه شوية بسيطة عالنار أو بأيدك و تدهنيه على مكان الحبوب. تقدرى تنامى بيه و الصبح تغسليه.
و ده أنسب حاجة تستخدميها فترة البريود أو تغيير الهرمونات اللى بتطلع حبوب .

٨. الفازلين
ادهنى طبقة خفيفة من الفازلين على أماكن ظهور الحبوب مرتين فى اليوم و لأن الفازلين بطبيعته بيرطب الجلد جداً و بيساعد مع الوقت انه يخفى اثار الحبوب.
ناخد بالنا بس إن الفازلين مش مناسب للبشرة الدهنية .

٩. الثوم
هاتى 3 فصوص ثوم و اطحنيهم و بعدين عليهم شوية مياه لحد ماتعمل عجينة خشنة.
ادهنيها على وشك لمدة 10 دقائق و بعدين اغسليه.

١٠. الألوفيرا
ممكن تجيبى چل الألوفيرا أو حتى ورقة شجر عادية و تقطعيها و تستخدمى الچل من جواها.
حلاوته انه كمان بيهدى اللون الأحمر خالص و لو فيه إحساس بالهرش كمان بيروح و مناسب لجميع أنواع البشرة.
15 دقيقة كفاية و تغسلية.

١١. زيت الزيتون
معلقتين زيت زيتون و اعملى بيهم مساج بشكل دائرى على وشك و سيبيه على وشك طول الليل.
استخدمى نوع زيت زيتون بكر كويس و هتلاحظى نتيجة مع المداومة عليه.

١٢. الشاى الأخضر
اعملى كوباية شاى أخضر عادى و حليها بالعسل النحل.
اشربيها بقى!
ليه بقى، لأن مضادات الأكسدة اللى فى الشاى الأخضر بتخلص الجسم من السموم، و بتنظم الهرمونات فى الجسم.
كل ده بينعكس على البشرة و بيخليها أنقى و أصفى و من غير حبوب.

Leave a Reply