التهاب الحفاضة اللعين

حاجة غلسة كده و سبب اضافى ان الطفل يقعد يعيط كل غيار و يبقى صعبان عليكى. جلد الأطفال بيختلف من طفل للتانى و اللى كان بينفع مع ابن صاحبتك ممكن ميجيبش نتيجة مع بنتك. فيه شوية حاجات كدة لازم تراعيها مع كل غيار و تركزى معاها اكتر لو فيه التهاب.

١. الغيار بالمياه اساسى: انا جربت الوايبس اول شهور لكن عشان بنتى جلدها حساس جداً ظهرت التهابات بسرعة. استبدلتها بقطنة مبلولة مياه و خليت الوايبس و أحنا بره البيت بس. بمجرد ما الطفل يمسك نفسه خديه على الحوض و عيشي حياتك.

٢. الغيار اول بأول: مع المولود الجديد غيري كل ٢-٣ ساعات. حتى لو الحفاض مش مليان. مع الأكبر ممكن تغيرى كل ٤-٦ ساعات. متسيبيش البلل و الپووپ ياكلوا فى جلد البيبي.

٣. التنشيف: نقطة امهات كتير مش بتركز معاها. لازم تتشفَّى كويس جداً و بالأخص لو فيه التهابات لأن البلل الزيادة هيساعد على تكون بكتيريا و يزود من سوء حالة الجلد.

٤. التهوية: أدى فرصة للجلد فى المنطقة دى يتنفس شوية من كتمة الحفاض. دقيقتين مع كل غيار فى العادى و ١٠ دقايق لو الجلد ملتهب.

٥. الحاجز: لازم تصنعى حاجز بين جلد الطفل و الحفاض. هيقلل من نسب ظهور الالتهابات و يحافظ على ترطب البشرة. ممكن تستعملى كريم زنك او زيت جوز الهند. متحطيش كريمات طبية و لا كورتيزون بدون إشراف الدكتور. التهاب الحفاض فيه منه درجات و بيحتاج طرق علاج مختلفة. اسألى دكتورك قبل اى حاجة.

فيه خطوات انا بأعملها اول ما بلاقى اى علامات لظهور التهاب الحفاض. اول حاجة طبعاً براقب حالة الجلد. و أعد الأيام اللى فيها التهاب. اكتر من ٤ ايام بسأل الدكتور. لكن فى العادى بأستعمل واحد من العلاجات المنزلية الطبيعية دى.

١. زيت الزيتون او زيت جوز الهند: عامةً الزيوت الطبيعية مفيدة للبشرة و دورها هنا انها تكوّن حاجز بين جلد الطفل و الحفاض. خلى بالك ان بعض الالتهابات اللى بتسببها الفطريات، الزيوت الطبيعية دى مش بتحسن من حالتها، بالعكس بتغذيها و تخلى الحالة تسوء.

٢. النشا: بيمتص الرطوبة الزيادة و يحافظ على جفاف الجلد. تستعمليه بحرص لانه ممكن ينشف الجلد زيادة عن اللزوم. بدلي بينه و بين كريم او مادة مرطبة.

٣. اللانولين: هتلاقيه موجود فى كريمات العناية بالثدى. ممكن تستخدمى الكريم بتاعك. بيساعد على التأم الجروح بسرعة و يرطب الجلد مع تكوين طبقة عازلة خفيفة.

٤. الشوفان: مش هتستخدميه زى ما هو، هتعملى منه لبن للحموم. هتحطى كوب كبير شوفان فى قطعة شاش و تنقعيه فى ٢ كوب مياه ٨ ساعات على الأقل. ممكن تعملى كده بالليل. الصبح بقى تفضى لبن الشوفان ده و تحطى معاه الشوفان نفسه و تملى البانيو بتاع البيبي و تقعديه فيه شوية. الطريقة دى ممتازة للجلد، بتسحب منه اى رواسب او سموم و بتطهر الجلد و تغذيه. ممكن تعملى لنفسك الوصفة دى و هتلاحظى الفرق بنفسك.

٥. الكريمات المتخصصة: زى ديسيتين او موستيلا المصمم خصيصا لعلاج الالتهابات دى.

لو الاتهابات طولت اوى، و مع استخدام طرق علاج مختلفة. و بالأخص لو بتركزى مع النضافة و بتحاولى طول الوقت انك تتجنبى الألتهابات. غيرى نوع الحفاض. متحكميش قبل مرور اسبوع. بعض الأطفال بتكون حساسية من مكونات الحفاض او من ملمسه.