Categories
في المطبخ

الأسرار لكيك سهل و دايماً ناجح

أنا فاكره كويس جداً أول كيكة عملتها كانت بالشيكولاتة و معرفش هى كانت قالبه على براونيز بالنسبة لى مع انها بمقادير الكيك. اللى اكتشفته بعد كده انها كانت هابطة و معجنة! بصراحة ساعتها مامتى قالتلى جميلة و اعملي لنا تاني و شجعتني جداً، طبعاً قعدت أجرب وصفات و مقادير مختلفة لحد ما إكتشفت إن التكنيك ذات نفسه مهم جداً و بيفرق. دى الأساسيات اللى انا مشيت عليها فى كل مرة لحد مابقيت أستاذة فى الكيك.

 

• أول حاجة نخرج المكونات كلها من الثلاجة زى البيض واللبن و الزبدة. طبعاً لازم كل حاجة تبقى بدرجة حرارة الغرفة.

• نجهز الأدوات اللى هنستخدمها: خلاط، عجان أو حتى مضرب يدوى و كل الأدوات تكون نضيفة و ناشفة من أى مياه لأن الكيك بيلقط أى روائح.

• جهزى المكونات كلها جنبك عشان متنسيش حاجة: فيه حاجات صغيرة كده ممكن ننساها تبوظ لنا الكيك زى الفانيليا، رشة الملح و البيكينج باودر على الدقيق.

• المقادير دايما تعايريها بنفس الكوباية: نصيحتى ليكى اشترى الأكواب المعيارية، لو مفيش ميزان مطبخ. هتلاقيها فى أى سوبرماركت و سعرها رخيص عشان كل مرة الكيك تطلع حلوة.

• نشغل الفرن على درجة حرارة متوسطة 180 قبل ما نبدأ شغل فى الكيك. لو الكيك بتطلع عالية من ناحية و هابطة من ناحية يبقى توزيع الحرارة فى الفرن مش متساوى نحاول نظبطها فى جنب واحد.

• لازم نضرب السكر كويس أوى مع الزيت أو البيض عشان يدوب كله. لكن بعد مانضيف الدقيق، العجينة تتقلب براحة بسباتيولا أو معلقة خشب من فوق لتحت عشان منخرجش الهوا منها و الكيك يطلع هابط.

• الدقيق يتنخل 3 مرات مع البيكينج بودر و الملح عشان البيكينج بودر يتداخل مع الدقيق كله.

• نتأكد من صلاحية البيكينج باودر ازاى؟ نحط شوية مياه فى كوباية أو طبق و نرش البيكينج باودر لو فار و عمل رغاوى يبقى كده زى الفل غير كده يبقى انتهت صلاحيته.

• ندهن الصينية بالسمن و نبطنها (نرشها) بالدقيق و لو كيك بالتشوكليت يبقى نبطنها بكاكاو خام أفضل.

• ناخد بالنا دايماً من حجم الصينية اللى هنخبز فيها الكيك يكون مناسب للمقادير، نعرف ازاى؟ الصينية يتملى تلات ارباعها بس بخليط الكيك أكتر من كده هتخرج برا و تتحرق و لو أقل هتطلع هابطة شوية.

• نفتح امتى نشوف الكيك؟ على الأقل مش قبل 15 أو 30 دقيقة على حسب حجم الكيك قبل كده هتهبط. الأفضل تنتظرى ٢/٣ المدة.

• نختبر الكيك دايما بخلة أسنان مش سكينة و لا بأيدينا لو طلعت عليها سائل أو أى فتافيت يبقى لسه محتاجة تسوية.

• لو الكيك اتحمرت من فوق و كانت لسة نية من جوة نغطيها بفويل و نرجعها تانى تكمل تسوية.

Leave a Reply

Your email address will not be published. Required fields are marked *