Categories
Featured في المطبخ

اصنعى بنفسك مسحوق الشوكولاتة سريع التحضير

الشتاء لما بيجى بيجيب معاه البطانية و اللكلوك و التليفزيون و مج المشروب الدافئ اللذيذ. طبعاً جمهور السحلب بيبقى جاهز و يدخلوا على المطبخ فى3 دقايق و يطلعوا بمشروب عظيم. احنا بقى عشاق الشوكولاتة نقعد نتفرج؟! لأ طبعاً نعمل مشروب الشوكولاتة السريع بتاعنا فى البيت و نحتفل بالشتاء.

عندى طريقتين طريقة بتتعمل على النار و طريقة سريعة فى المج علي طول.

 

على النار

 

كوب نشا

كوب سكر

كوب كاكاو خام

نصف كوب شوكولاتة مبشورة أو حبوب شوكولاتة

2 معلقة صغيرة فانيليا بودرة

رشة قرفة

 

اخلطى كل المكونات مع بعض و حطيهم فى برطمان.

3 معالق صغيرة على كوباية لبن فى كنكة على النار.

نقلب نقلب نقلب بالمعلقة و يغلى غلوة واحدة نطفى عليه و نقدمه.

لو هتعملى الوصفة اللى على النار جربى تحطى نقطتين فانيليا سايلة و عود قرفة وقت التحضير.

 

فى المج

 

كوب لبن بودرة

كوب سكر

كوب كاكاو خام

نصف كوب شوكولاتة مبشورة أو حبوب شوكولاتة

2 معلقة صغيرة فانيليا بودرة

رشة قرفة

 

اخلطى كل المكونات مع بعض و حطيهم فى برطمان ناشف و نضيف.

اغلى مياه و نزليها على 3 معالق صغيرة من الخليط و هيبقى الهوت شوكليت جاهز.

هنا اعتمادنا الأساسى على لبن البودرة لطعم أغنى و أتقل عشان هنحضره بالمياه.

البرطمانات ممكن تجهزيها و تستخدميها طول الشهر.

اعملى برطمانات صغيرة و خديها هدية لصاحبتك أو حماتك هيتبسطوا بيها أوى.