Categories
Featured في المراية

اصحى اجمل فى ٨ خطوات

مفيش وقت! اكتر عذر بأقوله لنفسى كل مرة أبقى عايزة أطوّل شوية فى الدش و اعمل ماسك لشعرى ولا لجسمى. أوقات كتير أبقى عايزة اتدلع بقى او اعمل حاجة اكتر من العناية الاساسية بنفسى. الاهمال برضه بيفرق فى نفسية الست. عشان كده قبل النوم بزود حاجة او اتنين من دول كجزء من الروتين الليلى بتاعى. توفير وقت و مجهود و جسمك يستفيد اكتر اثناء ساعات الليل الطويلة.

١. الترطيب الليلى: طبعاً ده اساسى، و بعد ما بتنضفى البشرة مع تونر خفيف. استعملى المرطب العادى على الوجه كله او لترطيب اقوى استعملى تركيبة مخصوص للترطيب بالليل اثناء النوم. هتصحى بشرتك ناعمة زى الأطفال و مع الوقت هتلاحظى الفرق فى اى مشاكل متعلقة بالترطيب زى الرؤوس السودا او جفاف البشرة.

٢. الرجلين: كل اللى محتاجاه نقطتين فازلين او زيت زيتون تدلكى بيهم رجلك كويس جداً و بعدين تلبسى شراب. اللى هيحصل ان الفازلين هيبتدى يرطب البشرة و الشراب هيحبس الترطيب ده اكتر و هيساعد انه يمتص احسن. مرتين فى الأسبوع فى الصيف او الشتا و هتحافظى على نعومة رجليكي.

٣. الشفايف: نقطة زيت لوز حلو على الشفايف قبل النوم كفاية انها ترطب الشفايف و تمنع التشقق. هتلاحظى الفرق و انتى بتحطى الروچ.

٤. الأيدين: انا شخصياً عندى مشكلة انى الاقى وقت كفاية للأيادى انها تمتص اى مرطب. اثناء النوم هو الوقت المثالى. و متنسيش كمان الكريمات المخصصة للمنطقة اللى حوالين الأظافر. لو محتاجة ترطيب عميق جربى تلبسى جوانتى، مش اساسي بس بيساعد للبشرة الجافة و المتضررة.

٥. شعرك: لو بتستعملى سيروم او بتجربى حاجة جديدة لتقوية شعرك، اثناء النوم هو احسن وقت لشعرك انه يمتص كل الغذا و المرطبات. اهم حاجة لعلاج الشعر ان الزيوت او السيروم تكون دافية و تدلكى فروة راسك فى حركة دائرية.

٦. الأطراف المقصفة: طبعا العلاج الجذرى انك تقصى شعرك. بس عشان تحافظى على الأطراف فترة اطول بدون تقصف حطى نقطتين فيتامين E (موجود فى الصيدليات) و دفيه بأيديكى و حطيه بخفة على اطراف شعرك بس. ميزته انه بيمتص بسرعة و بيغذى الأطراف كفاية انه يبعد عنها الجفاف اللى بيخليها تتكسر و تقصف. ممكن تجربى زيت اللوز الحلو او الچوچوبا او الارجان.

٧. العينين: البشرة حوالين العينين حساسة جداً و ضعيفة و بتحتاج عناية خاصة. اهتمى انك يومياً تستعملى كريم ترطيب لمنطقة العيون. هيفرق معاكى فى الهالات السودا و هتصحى حاسة ان شكلك منتعشة اكتر.

٨. العناية بالبشرة عامة: مش بس بالوجه. المناطق اللى بتحتاج عناية خاصة زى الركبة او الكوع. اتأكدى انك ترطبى الأماكن دى يومياً قبل النوم و الجسم كله بعد كل دش. ممكن تستعملى فازلين او الكريمات المخصصة لكل منطقة.

Leave a Reply