Categories
في المطبخ

اسرار نجاح العزومات + منيو عزومة سهل

العزومة! مش حاجة سهلة ولا خفيفة على الست أبداً. بس احنا بنحاول نفك الشفرة و نخليها اسهل بكتير. و عشان كمان تقدري تقضى وقت مع ضيوفك و تستمتعى بيومك.

 

حضرى قبلها بيوم: او كام يوم كمان، كل ما يبقى الأكل جاهز على الطبخ على طول يوم العزومة كل ما هتبقي مستريحة اكتر و عندك وقت توضبى فيه ديكور البيت. اى اكلة بالبشاميل ممكن تتحضر و تبات فى التلاجة قبلها بيوم و حتى اسبوع فى الفريزر زى المكرونة بالبشاميل، اللازانيا، خرشوف او كوسة بالبشاميل. من اللى ممكن تعملى حسابه كمان انك توضبي صينية تقديم المشروبات و الكوبايات او الكاسات فى مكان واحد و تخطفيها وقت ما تحتاجيها على طول بدل ما تفضلى تلفى فى المطبخ.

 

وقت اقل قدام البوتجاز: انا بحب ارمى الحمل التقيل على الفرن، الأطباق الأساسية دايماً بأعملها فى الفرن. مثلا فراخ محشية او مشوية، عرق لحمة او بط بالبرتقال.

 

استخدمى ادوات اقل: دورى على وصفات الخطوات فيها قليلة و مش هتحتاجى فيها كل ادوات المطبخ. غسيل الأطباق ده مجهود على الفاضى.

 

سهلى التقديم: السرافيس دى موضة قديمة فى جميع الأحوال. اعملى حسابك و اطبخى فى صوانى فخار او بايركس هيبقى شكلها جميل فى التقديم. دلوقتى كمان بقى ممكن تشترى طقم جاهز للتقديم: صنية و معاها حامل للسفرة. زينى الأكل بشوية الوان، رشة بقدونس طازة او شرائح طماطم.

 

استعدى لبعد الأكل: الحلو دايماً بيبقى اسهل. مش لازم تخبزى كيك و تزينيها. لو فى الصيف اعملى حاجة بالآيس كريم و خليها جاهزة على التقديم فى الفريزر. فى الشتا ممكن تعملى ليزي كيك سريع و تقدميه مع صوص شوكولاته دافى.

 

مطبخ نضيف قبل و بعد: احرصى ان مطبخك يبقى نضيف قبل ما الضيوف يوصلوا، لسببين: بعد الأكل فجأة هيبقى عندك جبل اطباق فى الحوض، لو غسالة الأطباق فاضية ممكن تدخلى الأطباق عليها على طول و تشغليها. على ما تخلص هيكون الضيوف مشيوا تشغليها تانى بقى على دور الحلويات و تشترى دماغك من غسيل الأطباق خالص. السبب التانى: ضيوفك هيحاولوا يساعدوكى سواء بعمل الشاى او شحن الأطباق على المطبخ. منظر المجزرة بتاعة تحضير الأكل ده مش حلو.

 

فكرى فى ضيوفك: لو انتى عارفة ان حد مبيحبش حاجة معينة او عنده حساسية هيتبسط جدا انك عملتى حسابه فى حاجة مخصوصة ليه او انك بعدتى تماما عن الأكلات دى. لو ضيوفك فيجيتريان ابعدى تماما عن اللحوم، هيحبوكى زيادة.

 

اعملى حساب الأطفال: يبقى ليهم مكان و ترابيزة جمب السفرة و أكل مناسب ليهم. اعملى لهم أكل سهل ياكلوه لوحدهم زى قطع الناجتس او استخدمى قطاعات على اشكال ظريفة تشجع الأطفال على الأكل. هتطمنى أن الضيوف مرتاحين طول ما ولادهم مبسوطين.

 

وضبى البيت: مش عشان معزومين على العشا يبقى التركيز على الأكل بس. متنسيش علبة شوكولاته اول ما تستقبليهم. حطى مجموعة ورد صغيرة فى الحمام. و جهزى قراقيش صغيرة لو ناويين تسهروا زى اللب و السودانى، بسكوت او ميني بيتزا.

 

نوعى المنيو: مش لازم تعملى 20 طبق رئيسى. خلى بالك بس ان المنيو يبقى فيها كاربوهيدرات زى الرز او المكرونة و دى تبقى الطبق الجانبى و معاه الخضروات اكيد. اللحوم و دى خليها الطبق الرئيسى. و الأهم من ده كله المقبلات و السلطات، الأتنين دول سهلين جداً فاعملي منهم كام نوع تملى بيهم السفرة. الناس بره البيت برضه بيبقوا مكسوفين شوية، الفينجر فود ده دايماً بيفتح الشهية و هتلاحظى انه تقريبا الحاجة الوحيدة اللى هتخلص على السفرة.

 

الوصفات الاسهل عليكى: طبعا مش محتاجة اقولك انه حتى لو وصفة صعبة شوية و انتى عملتيها قبل كده كتير و واثقة فيها يبقى اعمليها. هتشيل عنك قلق ان وصفة تبوظ او انك تحضرى بدائل.

 

قطع فردية: وضبى الأكل اللى تقدرى عليه فى شكل قطع منفردة. ممكن تعملى ده فى المقبلات او الحلويات. اسهل فى التقديم و بالأخص فى الحلويات هيريحك من قصة الغرف و التقديم دى تانى.

 

غشى شوية: مش لازم تحضرى 100% من العزومة. ممكن تغشى و تجيبي مقبلات مجمدة او سلطات جاهزة. فكرة كمان انك تاخدى حاجة بسيطة من بره و تدخليها فى طبق تانى من صنعك زى الفراخ المشوية ممكن تفرميها و تعملى منها كروكيت فراخ او تقطعيها و تحشى بيها صينية المكرونة بالبشاميل.

 

المنيو

شوربة الفراخ كريمي مع المشروم

سمبوسك بالجبنة

خضروات مشوية فى الفرن (بطاطس، جزر، كوسة، بروكلى، مشروم)

فراخ مشوية فى الكيس الحرارى

فرايز للتقديم مع الفرخة و معاها كذا صوص

لازانيا

سلطة الفاصوليا الخضرا

سلطة حمص

تشيزكيك

و جنب الأكل ليمون بالنعناع

Leave a Reply

Your email address will not be published. Required fields are marked *