Categories
في البيت

استخدامات زيت جوز الهند فى البيت

زيت جوز الهند من الزيوت المفيدة جداً للبشرة و الشعر و العناية الشخصية عامة و ممكن كمان تستخدميه فى المطبخ لأنه ممكن أكله. الى جانب العشروميت حاجة اللي ممكن تعمليها بزيت جوز الهند. ممكن تعملى بيه ايه في البيت؟!

 

• فك السوستة: السوستة اللى بتتحشر و تقرفك بتحتاج شوية تزييت بس عشان ترجع تتحرك بسهولة تانى. امسحى زيت جوز الهند على سنون السوستة و حركيها من تحت لفوق. لو السوستة محشورة بالفعل حطى زيت جوز الهند و اديله دقايق يتسرب لجوه السوستة قبل ما تحاولى تحركيها.

• امنعى التراب: خاصة على الاثاث اللى بيحوش التراب، زى الأسطح الخشب. مجرد انك تمسحيها بحاجة بسيطة جدا من زيت جوز الهند هيخلى التراب ميمسكش فيها لأنها هتكون طبقة عازلة. متقلقيش، لو الزيت خام مش هتبقع الأسطح ولا هتأثر عليها.

• تلمعى به الجزم: احلى من اللى بتشتريه جاهز و كله الوان. الجلد بتاع الجزم كمان بيحتاج ترطيب عشان يبقى طرى و يحافظ على شكله مع الحركة. امسحى الجزم بشوية صغيرين اوى على قطنة و شوفى الفرق بنفسك.

• تقليل الصدا: من على الحاجات الحديد زى اثاث الجناين. امسحى طبقة خفيفة من زيت جوز الهند على المنطقة اللى فيها صدا و سيبيها من ساعة لساعتين و بعدها امسحيها بفوطة، هتلاحظى فرق فى وقتها، و هتلاقى ان طبقة من الصدا طلعت فى الفوطة. زيت جوز الهند كمان هيقلل من انتشتر الصدا. ممكن تمسحى طبقة خفيفة جدا من زيت جوز الهند على المناطق السليمة لحمايتها من الصدا لأنه بيعمل طبقة عازلة عن العوامل الخارجية.

• تشيلي بيه الملصقات: الزيوت ممتازة فى تنضيف الأزاز و الحديد من بقايا اللزق. مكان ما بتشيلي علامة السعر او اللوجو. الطريقة دى لو انتى مستعجلة و عايزة تنضفى الحاجة دلوقتى. شبعّى الورقة الملصوقة بالزيت و ادعكيها بأيدك. لو مش مستعجلة، ممكن تستخدمى الطريقة اللى مش بتحتاج مجهود دى.

2 replies on “استخدامات زيت جوز الهند فى البيت”

Leave a Reply

Your email address will not be published. Required fields are marked *