Categories
في المراية

ازاي غيرت حياتى لنظام صحى ببساطة

أنا كنت تخينة. مع ان الكلمة فى حد ذاتها سخيفة جداً لكنها الحقيقة و لا يمكن انكرها. تخنت زى كل البنات ما بتتخن و خصوصاً فى فترة المدرسة، من غير رياضة و قاعدة فى البيت للدروس. مروراً بأوحش يوم فى حياتى، يوم لما بننزل نشترى لبس و نفضل نلف عشان مفيش حاجة عجبانى و شكلى تخين و مش حلو و تقلب نكد.

المهم دخلت الجامعة و استجمعت كل قوتى و ارادتى و عملت اللى هقول عليه هنا. خدت وقتى براحة جداً، من غير استعجال.

و ده اللى خلانى بقالى سنين مرجعتش زى الأول، حتى بعد الجواز و الحمل و الولادة.

نظام الحياه

  • مبدئياً فيه شوية كلام تنسيه نهائى؛ أنا بعمل ريجيم او دايت، أصل ماشية على نظام كذا… كل الكلام الممل اللى يجيب احباط ده انسيه و الغيه من قاموسك مش عايزينه.
  • قومى غيرى البيجامة الواسعة دى و البسى لبس حلو كده و مظبوط على مقاسك. بصى فى المراية و سرحى شعرك و اقعدى فاردة ضهرك و اشفطى بطنك و بعدين نتكلم.
  • احساسك بنفسك هو اللى هيغير أسلوب حياتك من الأساس. يعنى ادى لنفسك احساس الفراشة و دايماً قولى لنفسك أنا حلوة بس عايزة ابقى أحلى. بلاش لازم أخس و شكلى مش حلو. لأ! ركزي، أنا حلوة و هبقى أحلى كمان.

الفكرة انى عايزة تركيزك كله يبقى على شكلك و جمالك و اهتمامك بنفسك. مش مجرد قاعدة بتفكرى فى الأكل و الحرمان و الريجيم و سعرات المحشى كام.

المتابعة

  • فيه ورقة متابعة الوزن، ممكن تطبعيها أو تعمليلها داونلود. هتكتبى فيها وزنك الصبح أول ما تصحى بعد التواليت و بأقل هدوم ممكنة.
  • و تجيبى مازورة تأخدى بيها مقاساتك: الوسط و البطن. المقاسات أهم كمان من الوزن.
  • لو أنتى من الناس المنظمة أوى، هتلاقى هنا جدول متابعة الوجبات متقسم فطار و غداء و عشاء و سناك ممكن تعلقيه على الثلاجة أو يبقى معاكى تكتبى فيه كل حاجة بتاكليها على مدار اليوم. ساعات الواحد ممكن يكون هيزود شوية، بس تبصي علي الورقة تقولي لأ بلاش أحسن.

نظام الأكل

  • وجبة الأفطار أساسية فى يومك. متفوتيهاش أبداً و ممكن تحضريها من بالليل. فى دقيقة تعملي سندويتش جبنة  بالخيار من بتاع المدرسة ده، يعتبر هايل. و هتلاقي كمان هنا كذا افكار تحضري بيها الشوفان من بالليل.
  • لو نفسك فى قطعة كيك، بسكوتة، شوكولاتة، فيه فى البيت أى تورتة أو حلويات، كلى منها الصبح مع مج النسكافية كده بروقان و استجمام عشان ان شاء الله تحرقيها بقية اليوم.
  • بلاش السكر الدايت ده، ضرره اكبر من فايدته. قللى سكرك بالتدريج فى المشروبات عشان يبقى أسلوب حياتك صحى، مش هتفضلى ماشية بالسكر الدايت طول عمرك. ممكن تبدليه بالعسل الأبيض أفيد.
  • الغداء فيه أفكار كتيرة و بدائل كتيرة جداً، هتلاقيها هنا. بس عموماً لازم بروتين نباتى أو حيوانى و خضار و سلطة و نشويات. عايزة تشيلى النشويات من الغداء، ممكن بس مش علي طول، أقصى حاجة أسبوع، غير كده هتتعبى.
  • خلى دايماً عندك فى الثلاجة علبة سلطة جاهزة عشان تلحقك تاكلى منها وقت ما تجوعى بدل العك.
  • المياه حلوة أوى و طعمها جميل حبيها كده زى ما هي.  مش لازم تحطي لها قشر برتقال و لا ليمون. كل المطلوب منك تجيبى اى ازازة تبقى جنبك علي طول.  و كل شوية اشربى عادى و امليها تانى من غير ماتقعدى تحسبيها.

الأكل بره البيت

  • لو أنتى بره كلى خفيف. لأن معظم المشويات و الخضار السوتية بره بيتعمل بزبدة أو زيت و دهون.  عموماً الحل انك تحاولى تاكلى كمية قليلة. بس لو زنقت أوى، تقدرى تبدلى الغداء بالعشاء.  هيبقى أسرع و اسهل حل تجيبى عيش و تعملى سندويتش أو زبادى و موزتين بدل اللخبطة و لما تروحى كلى غداكى براحتك. بس استنى علي الأقل ساعة قبل النوم.
  • خدى معاكى سناك علي طول فى شنطتك. أكتر حاجة كانت سهلة و بتسد الجوع معايا و كمان مغذية تفاحة و علبة لبن صغيرة خالى الدسم عشان متحسيش بجوع و هبوط و تاكلى أى حاجة قدامك.
  • مهما كانت الظروف و الأكل المتاح قدامك قسمى طبقك ربع بروتين ربع نشويات و ربع خضار و جمبهم طبق سلطة محترم كده يبقى معظمة أخضر زى الخس و الجرجير و الخيار و البقدونس.
  • ليه لما بناكل بره بنشبع أسرع مع ان ممكن تكون نص الكمية اللى بناكلها فى البيت؟ عشان قاعدين على كرسى فاردين ضهرنا و لابسين لبس كاتم على نفسنا و بندوق الأكل و نستمتع بيه مش سرحانين قدام التلفزيون و مش دريانين احنا بناكل ايه أصلاً! بكل بساطة اخلقى لنفسك جو الرستوران و قدمى الأكل بشكل حلو على السفرة و استمتعى بالأكل. امضغى ببطئ و حسى بطعم الأكل. هتشبعى أسرع لأنك هتدى فرصة للمعدة تبلغ المخ انها اتملت و بالهنا و الشفا.

الرياضة

  • الرياضة، الرياضة، الرياضة مش هقولك اشتركى فى جيم و لا هاتى أجهزة بالآفات. المهم انك تبدأى و تاخدى الخطوة، ممكن تبتدى بتمارين بسيطة من على اليوتيوب. مش عارفة، هاتى أغانى و أرقصى 10 دقايق. بلاش يا ستى، اتنططى و اعملى أى حركات عشوائية 3 مرات فى اليوم كل مرة 3 دقايق. مفيش أبسط من كده و صدقينى هتحسى بفرق رهيب.

مهم كمان انك تشغلي وقتك على طول. ساعات الفراغ و الملل بيخليكي تاكلي حتى لو مش جعانة. دايماً افتكري لو قايمة تدوري على أكل بدون هدف انك تشربي ٢ كوب مياه الأول و بعدين كلي خيارة أو جزرة و اغسلي سنانك. غالباً هتلاقي نفسك شبعتي و انه كان إنذار كاذب

هتلاقي افكار لأول اسبوع هنا

Leave a Reply