Categories
مع العيال

ازاي تنضفي كل انواع اللعب.. بدون مجهود

كم اللعب اللي جمعناه علي مدار سنتين مهول! هدايا و اعياد ميلاد و لعب قديمة بتاعتي و مكآفات و لعب من قرايبنا. حلو اوي. خاصة ان احنا مش بنتفرج كتير علي التليفزيون، و بنشجع اللعب اللي بينمي المخيلة و الابداع. المشكلة الوحيدة هنا هي ان كل اللعب دي لازم تتنضف بانتظام. بدل ما تحوش بكتيريا و فطريات و تبقي مؤذية لصحة الطفل.
عشان كده انا عندي خدعة لتنضيف كل نوع لعب عندي و بدون مجهود مني عشان افضل احافظ علي نضافتهم و مكسلش.

قطع البازل
زي الليجو مثلاً. بتبقي معظمها مصنوع من بلاستك قوي. دي بحطها في كيس غسيل الشرابات و بيدخلوا غسالة الهدوم. آه مع الهدوم عادي. علي غسلة باردة مع نقطتين مطهر. و بعدين بطلع الكيس زي ما هو ينشف في مكان متهوي كويس و بعيد عن الشمس. تاني يوم بيبقوا نضاف، معقمين و ناشفين.

اللعب البلاستك
طب و اللعب البلاستك الكبيرة شوية؟ خاصة اللي بتدخل البق كتير. زي العضاضات و الاكشن فيجرز. دول بقي بيخشوا غسالة الاطباق. علي غسلة باردة برضه مع نص كوب خل و بيخرجوا ناشفين و جاهزين للعب مباشرة. و لو غسالة الاطباق مش متاحة، بغسل حوض المطبخ كويس بمطهر الاول و بعدين بنقعهم فيه. بملي الحوض بالكامل و بضيف للمياه ١/٢ كوب خل و بنقع اللعب فيه لمدة نص ساعة. و بعدين بشطفهم كويس و اسيبهم ينشفوا تماماً قبل اللعب.

اللعب البلاستك اللي بتغني
طبعا اي لعب فيها بطاريات او بتتشحن يبقي مينفعش تدخل اي غسالة. دول معمول لهم بخاخة فيها نص كوب مياه و نص كوب خل و معلقة صغيرة مطهر. برش من البخاخة علي فوطة نضيفة او مناديل مطبخ و امسح بيها اللعبة كويس. و بعدين بانشفها بفوطة ناشفة.

اللعب القماش
عندنا دب بيروح معانا كل حتة. كل اسبوع او اسبوعين بالكتير لازم يروح “ياخد دش” لان بيكون فعلا اتوسخ و ريحته بقت بشعة من كتر ما وقع علي الارض و اكل معانا.
في الاول كنت بادخل كل اللعب دي في الغسالة علي دورة خفيفة، حرارتها باردة و دورة العصر ضعيفة عشان اللعب تحافظ علي شكلها. و بعدين اكتشفت ان مش كلهم مناسبين انهم يدخلوا الغسالة. عشان كده بقيت باحرص اني اقرا التيكيت. اللي مناسب يدخل الغسالة بدخله عادي علي دورة غسيل و عصر خفيفة.
و اللي مش مناسب يدخل الغسالة.دول بعمل لهم خلطة تنضيف سريعة. في طبق عميق بخلط نص كوب مياه مع معلقتين كبار خل و معلقة صغيرة مطهر و معلقة صغيرة منعم ملابس. بفوطة نضيفة بفرك الخليط ده كويس اوي علي اللعبة لحد ما تنضف تماماً. و طبعا بسيبها تنشف لمدة يوم كامل قبل ما ارجعها لبنتي تلعب بيها تاني.

العاب اطفال

اللعب القماش اللي بتغني
بديلها رشة حلوة من البخاخة اللي في الاول من المياه و الخل بس. و بمسحها بفوطة مبلولة مياه بسيط جداً. بفركها كويس اوي بالفوطة و بعدين بسيبها تنشف في مكان متهوي كويس و بعيد عن الشمس.

العجل و عربيات الاطفال
دول بقي بيخرجوا بره البيت و بيلعب بيهم اطفال تانيين و بيترموا علي الارض و بيشوفوا اسوأ ظروف ممكن لعبة تعيشها. عشان كده دول بنضفهم بمطهر و بس. بخففه بمياه حسب الارشادات اللي علي علبة المطهر. و بمسح اللعبة كويس بيه. لو متوسخة اوي او عليها طين مثلاً يبقي بغسلها الاول بليفة بمياه و صابون غسيل الاطباق و بعدها بمسحها بالمطهر.

لعب البحر
لعب البحر بترجع البيت الرمل لازق فيها و مهما غسلتها بالمياه بيفضل عليها رمل. لحد ما بقيت برشها ببودرة اطفال قبل ما اغسلها. و هي ناشفة كده. و امسح البودرة كويس علي اللعبة. هتلاقي الرمل بيقع من عليها بسهولة جداً. و بعدها باشطفها بس بالمياه و هتبقي زي الفل.

لعب البانيو او المياه
لعب المياه دي مشكلتي الاساسية معاها انها بتحوش مياه جواها. مهما سبتها تنشف بالايام او حركتها، بيفضل جواها مياه. حلها بسيط، سديت الفتحات دي. بس لازم الاول تتأكدي ان اللعب ناشفة تماماً، عشان متعملش عفونة جوه اللعب. بمسدس الشمع قفلت كل الفتحات اللي في ارضية اللعب. نقطة من مسدس الشمع كفاية اوي، هي هتدخل و تسد الفتحة كويس. و عشان اللعبة مجوفة من جوه هتفضل تطفو عادي.
اللعب دي بتتنضف كل اسبوع او ١٠ ايام. بنقعهم في البانيو في مياه عليها ١/٢ كوب ملح. و بعدين بشطفهم كويس و بسيبهم ينشفوا قبل معاد الدش الجاي.
مهم اوي ان اللعب دي تنشف بين الدش و التاني لانها بتكون عفونة و بكتيريا بسهولة لانها بتتعرض لاوساخ كتير من ركنتها في الحمام و ببساطة لاننا بنغسل جسمنا فوقها يعني.

اللعب الخشب
اللعب الخشب هي احسن لعب للسن الصغير، خاصة تحت عمر السنتين. احسن طريقة هي اني برصهم كلهم علي مصفاة و ارشهم ببخاخة المياه بالخل اللي عملناها فوق. و بسرعة بانشفهم بفوطة نضيفة قبل ما المياه و الخل يبوظوا الخشب. دول بيتنضفوا شهرياً. لأن بصراحة بنسنخدمهم فترات قليلة كلعب تعليمية. انما اللي بنستخدمهم بانتظام بيتغسلوا كل اسبوع او اتنين بالكتير حسب حالتهم.

العرايس، خصوصاً باربي و اعوانها
دول بقي ليهم معاملة خاصة.
الاول بشيل كل القطع اللي بتتفك من العروسة زي الجزم و التوك و الهدوم كمان. كل القطع الصغيرة دي بتتحط في طبق او علبة صغيرة فيها كوب مياه عليه معلقة صغيرة صابون غسيل ملابس و نقطتين مطهر. و بسيبهم يتنقعوا لحد ما اخلص الباقي. في الآخر بشطفهم بمياه و بنشفهم بفوطة قبل ما ارجعهم علي العروسة تاني.
بجيب فوطة نضيفة ابللها في المياه بالصابون اللي في الطبق اللي جنبي و امسح بيها العروسة نفسها كويس لحد ما تنضف و ترجع جديدة.
شعر العروسة ده بقي موضوع لوحده، ملعبك و بيلم زبالة بالهبل. حله بسيط، بجيب كوباية املي نصها مياه دافية، اسخن درجة انا ممكن استحملها. و ازود عليها نقطتين مطهر و معلقة كبيرة منعم ملابس. و انقع شعر العرايس في الخليط ده لمدة ١٠ دقايق. بعدها بنتي بتيجي تساعدني نسرحهم. بمشط الاطفال او فرشة بسنون ناشفة بنسرح شعر العرايس. المياه الدافية هتفك اي بواقي اكل او الوان او تلزيق عامةً من شعر العروسة و المنعم هيعمل زي الكونديشنر لشعرك كده، هيسهل عملية التسريح.
بعدها بننشف الشعر بفوطة و نعمله ضفيرة او التسريحة اللي بنتي تختارها و نسيبهم ينشفوا ساعتين تقريباً.

عندك نوع لعب مش عارفة تنضفيه و مش موجود فوق؟ ابعتيلنا علي
hello@mashrou3set.com

او علي فيسبوك www.facebook.com/sett.mea

او علي انستاجرام www.instgram.com/sett.mea

Leave a Reply