Categories
في البيت

ازاي تنضفي غسالة الملابس و تتخلصي من الروائح السيئة

من فترة بشتكي من ريحة مش لطيفة بتطلع من الغسالة. المشكلة ان لاحظت كمان ان الريحة بدأت تتنقل للغسيل. صحيح الغسيل بيتعقم و اي روائح بتروح لما الغسيل بيتعرض للشمس و التهوية، بس ده معناه ان فيه حاجة غلط. ركزت كده و اكتشفت ان بقالي فترة مهملة مع الغسالة و مش بانضفها بأنتظام زي زمان.

اول مكان بابدأ بيه هو الحزام الكاوتشوك اللي حوالين حلة الغسالة. الصدمة انه مليان ترسبات سودة. المكان ده غالباً بيبقي هو مصدر الريحة. عشان مع نهاية كل غسلة بيتبقي شوية مياه متجمعين جوة الحزام ده و بيكونوا عفن بسيط، بيتجمع عليه بقي الأوساخ من الهدوم اللي اتغسلت، بتبقي العملية كارثية.
حله بسيط؛ فوطة مطبخ نضيفة، نبللها بخل و ندخلها جوه الحزام بلطف. مش عايزين نحشي الحزام جامد عشان ميبوظش شكله. هنسيب الفوطة 10 دقايق و بعدين نشيلها. لو الموضوع بسيط، في العادي الخل هيشيل كل الأوساخ و البكتيريا. هتمسحي الخل الزيادة بفوطة مبلولة بمياه و بعدين تنشفي مكانها.
في الحالات المتأخرة، اللي الخل مش بيقدر عليها، هنلجأ للكلور. مع اني مش بأفضل الكلور، لكنه الحل المثالي هنا لقتل البكتيريا و التنضيف بعمق. هنعمل خليط من نص كوب كلور مع نص كوب مياه و نبلل به فوطة نضيفة. زي ما عملنا مع الخل، هندخل الفوطة جوه حزام الغسالة. نسيبها 10 دقايق و نرجع نبص عليها، لو لسه فيه اوساخ، نرجعها 10 دقايق تاني، بحد اقصي 30 دقيقة. بعدها نمسح مكانها بفوطة مبلولة مياه بس و ننشف مكانها. ده سبب الريحة اللي بتظهر بعد الغسيل.

الريحة اللي بتظهر في الغسيل النضيف المبلول لسه دي جاية منين؟ من درج الصابون. بالرغم من اني بأستخدم صابون جل مش باودر، لكنه لسه بيسيب ترسبات. الترسبات دي بتلم الأتربة و بتعمل ريحة و بتنزل مع المياه في كل غسلة. تتنضف بأننا هنفك درج الصابون و نغسله كويس. هتلاقي في الدرج جزء تضغطي عليه لتحت و انتي بتسحبي الدرج لبره. مش محتاج اي عنف و هتلاقيه بيطلع بسهولة. غير كده تراجعي المانيوال بتاع غسالتك عشان تتأكدى الدرج بيتفك ازاي. في معظم الغسالات هتلاقي سهم عند المنطقة اللي بيطلع منها الدرج.

في الحوض، تحت مياه جارية، افركي الدرج كويس بفرشاة سنان قديمة عشان تطلعي بقايا الصابون من كل الأركان. المياه الدافيه كمان بتسرع من تفكيك الصابون. تنشفي الدرج كويس قبل ما ترجعيه مكانه.

نضفنا كل المناطق الظاهرة، عايزين ننضفها من جوه بقي. هنظبط الغسالة علي اسخن درجة حرارة مياه و نشغلها دورة كاملة. هنحط في درج الصابون كوبين خل. عشان معظم الغسالات بيبقي ممنوع انك تشغليها فاضية، يبقي هنحط فيها فوطتين او اى حاجة نضيفة، و اوعي تحطي كلور مع خل، بيتفاعلوا مع بعض و بيكونوا غاز سام.

آخر حاجة، تلمعي الغسالة من بره كويس. اي تراب فوق الغسالة مصيره في الآخر بيدخل الغسالة. تلمعي سطحها من فوق. و تمسحي الأزاز و باب الغسالة كويس بفوطة مبلولة بمياه دافية.

الغسالة هتحتاج تتنضف مرة كل شهر، تنضيفة روتينية.

امال ايه اللي وصل الغسالة انها تعمل ريحة كده، ازاي نتجنب ان ده يتكرر تاني:

١. تنشفي الغسالة بعد كل غسلة. بفوطة نضيفة تمسحي حزام الغسالة كله، بالأخص الجزء السفلي اللي بتتراكم فيه المياه.

٢. تراعي انتي بتدخلي ايه في الغسالة. تشيلي اي بقايا اكل لازقة في الهدوم و تنفضي اى حاجة مليانة طين او اتربة كتير قبل ما تدخل الغسيل.

٣. تشيلي الغسيل اول بأول، بمجرد ما الغسالة تخلص تفضي الغسيل منها. دي عادة صحية ليكي و للغسالة.

٤. متحوشيش غسيل في الغسالة، حتي الغسيل الناشف قبل التنضيف. عشان كده لازم تشتري سبت غسيل، تجمعي فيه الغسلة و تدخلي فيه الهدوم قبل ما تشغلي الغسالة مباشرة.

٥. التهوية. حتي بعد ما بتنشفي الغسالة، سيبي الباب مفتوح عشان الغسالة تتهوي كويس. انا اعتقد ان عمري ما بأقفل باب الغسالة تماماً.

٦. استعملي كمية الصابون المظبوطة. كتر الصابون مش هينضف الهدوم احسن. الصح انك تستخدمي الكمية المقررة حسب نوع الصابون مع نظام الغسيل المناسب لنوع الغسيل. الصابون الكتير هيسيب ترسبات علي الهدوم و في الغسالة.

٧. ضيفي خل للهدوم. من 1/2 كوب لكوب مع غسلة الفوط و الملابس الداخلية. الخل معقم طبيعي و مش هيبسيب ترسبات في الغسالة. و مع الشطف مش هيسيب ريحة في الهدوم، بالعكس هيقتل البكتيريا و يعقم الملابس.

٨. و طبعاً تركزي مع تنضيف الغسالة بأنتظام.

Leave a Reply

Your email address will not be published. Required fields are marked *