Categories
مع العيال

ازاي اختار المدرسة المناسبة لولادي


بلاش نستسهل و نصدق في جملة كله محصل بعضه و التعليم اصلاً في النازل و الكلام السلبي ده. لأن المدرسة الكويسة بتفرق جداً و مفيش حاجة هتعوضها و لا كورسات و دروس و لا غيره. عن تجربتي و تجارب ناس كتير غيري، وصلنا اننا نستثمر في مدرسة كويسة أحسن من التشتيت بين مدرسة ضعيفة و كورس و لخبطة كتير احنا في غنى عنها. و بردو مش المقصود هنا اني أضغط نفسي و ادخل أفظع و أغلى و أبعد مدرسة و ادفع المصاريف بالعافية.
المدرسة دي ابنك/بنتك بيقضي فيها ٧ ساعات يومياً، مابين تعليم و تربية. عشان كده ركزي كويس أوي في اللى هيقوم بالدور ده.
المهم، عشان نقدر نحدد المدرسة دي كويسة و لا لأ، مناسبة لينا و لا لأ، و مناسبة دي نحط تحتها ١٠٠ خط، عشان كل واحد فينا عنده أولويات هي اللى بيحدد على أساسها رأيه فى المدرسة:

١. المسافة بين المدرسة و البيت: المدرسة القريبة من البيت دي نعمة كبيرة ياريت نحط في اعتبارنا ان اللي هينزل كل يوم و يروح فى ساعة و يرجع فى ساعة ده طفل بردو. كده ممكن يقضي ٩ ساعات بره البيت على الأقل، و ده مجهود كبير أوي على طفل صغير. المدرسة القريبة من البيت هتديله فرصة ينام أحسن و جسمه مرتاح مش مرهق من طريق و زحام، و يقدر كمان يعمل أي نشاط تاني في يومه بعد المدرسه و  لو عنده تمارين هيبقى فايق.

٢. المناهج: اسألي عن المنهج اللي المدرسة بتدرسه و بيشتغلوا مع الولاد ازاي عشان يوصلوا المعلومة و نظام الواجبات المنزلية ازاي؟ يعني هل الواجبات يومية و الشغل كتير في البيت و لا أسبوعية بس لمجرد تأكيد المعلومات و هل الطفل بيبقى راجع فاهم و لا لأ.

٣. المدرسين: بالرغم ان ساعات المدرسة بتختار منهج قوي و لكن مع مدرس ضعيف أو تغيير كل شوية فى المدرسين حد يمشي و يجي غيره، ده بيضعف من قوه المنهج و الطفل مش بيستفاد حاجة.
و ده بيدل علي لخبطة في ادارة المدرسة، ده غير ان الاطفال بترتبط باسلوب المدرس و التغيير الكتير ده بيشتته

٣. المدارس الجديدة و المدارس القديمة: كل شوية بتفتح مدرسة جديدة و بتحط نظام و أفكار و وعود كتير لكن على أرض الواقع بتبقى أول سنة دي صعبة جداً على الولاد و الأهل و الأدارة. عدت أول سنة بسلام، خير و بركة، يبقى حظكوا حلو لأنها فيها مخاطرة شوية. غير كده بتدوروا على راحة البال، يبقى مدرسة قديمة شوية متجربة و معروف نظامها و معتمدة على نظام معين مش على ادارة أشخاص لو مشيوا النظام ده ينهار.

٤. التراخيص: دي نقطة مهمة جداً تخص المدارس الجديدة. هل المدرسة مرخصة و لا لأ؟ لأن مشاكل المدارس الغير مرخصة كتير جداً و ابسطها ممكن تتقفل فى أي وقت. و طبعاً لو جيتي تحولي هتتعبي جداً في النقل عشان تطلعي الشهادات.

عشان كده أي مدرسة عايزين نتأكد هى مرخصة و لا لأ، بنعمل زيارة سريعة للأدارة التعليمية التابعة ليها و هما هيقولوا لينا المعلومة الصحيحة.

٥. المصاريف. المصاريف و كمان مرة المصاريف. الموضوع مش بيقتصر على المصاريف الأساسية اللي بتدفع بدري جداً و جزء كبير بعد القبول فوراً و لا الزيادة السنوية اللى كانت ١٠٪؜ فقط و لكن مؤخراً معظم المدارس بتزود عن كده. مصاريف الباص و اليونيفورم و ليست طلبات المكتبة (سبلاي ليست) مصاريف طول السنة رحلات و أنشطة ليها طلبات و حفلات.
يعني من الاخر نعمل حسابنا على ٣٠٪؜ زيادة عن الرقم الأساسي.


٦. التربية: نختار مدرسة عندها أسس تربوية و إهتمام بالجزء التربوي. مش عايزين مدرسة قائمة على الزعيق و العقاب، مهم ان المدرسين يكونوا مؤهلين للتعامل مع الطفل و فاهمين نفسيته مش مجرد يعلموه كلمتين و خلاص. لأن حقيقي الطفل لما بيحس أن المدرس بيحبه، بيستوعب أحسن و العملية التعليمية بتكون أسهل بكتير. و ده هتلاحظوه لما ابنك يحب مدرس معين هيتفوق فى مادته و يحب يذاكرها.و زي ماقلنا هو هيقضي وقت طويل أوي في المدرسة يومياً يعني شخصيته هتتكون هناك.

 

٧. الوسط الاجتماعي: غالباً احنا بنختار و بندفع فلوس عشان ولادنا يكونوا في مجتمع مناسب لينا و ليهم عشان لما يكون صداقات يكونوا على نفس المستوى الفكري و الأخلاقي و نطمئن عليه معاهم.


٨. موقع المدرسة: ساعات المدرسة بتبقى فى مكان مش مناسب، جمب مصانع أو تراب يعني لو طفل عنده حساسية هتأثر على صحته. أو على طريق سريع خطر أو منطقة جديدة مش أمان.

٨. نضافة المدرسة: مدرسة نضيفة يعني بيئة نظيفة يعني صحة أحسن لولادك. متتنازليش عن الجزء ده و اتأكدي منه كويس و كمان التهوية فى الفصول و سياسة المدرسة مع أي طفل عيان. هل بيتم فصله لعدم انتقال العدوى و هل فيه طبيب مقيم فى المدرسة؟

Leave a Reply