Categories
في البيت

ازاى توفرى فى ميزانية السوبرماركت

أنا كان نفسي اساعدكوا و أساعد نفسى و أكتب ميزانية متخرش المياه لبيتي و لكل الستات و نرتاح كلنا، بس ده طبعاً خيال علمى! الأسعار كل يوم بتتغير و بتختلف من مكان للتانى. ده غير إن إحتياجات كل بيت مختلفة و صعب كلنا نتفق على إختيارات واحدة، هقول لكم على شوية نصايح و أفكار ساعدتنا على التوفير و تظبيط الميزانية، يمكن نحَوش فى يوم من الأيام.

 

• اعرفى أسعار الحاجة: ساعات السوبر ماركت بيحط منتجات فى النشرة الشهرية ضمن العروض عشان يشجع الناس انها تشترى، فى حين ان المنتجات دى مش عليها عرض ولا حاجة. ده سعرها الاصلى.

• اختارى الجودة الاول: كمان معرفتك بسعر الحاجة هتساعدك فى اختيار المنتجات المناسبة ليكى. مش شرط السعر الأقل يعنى الأوفر. بالعكس، الحاجة لو جودتها أحسن هتعيش أطول و توفر لك على المدى البعيد.

• راجعى الوزن: زى ما قلنا ان السعر مش مقياس، الجودة اهم، ييجى بعدها الوزن. ممكن من نفس المنتج بنفس الجودة تلاقى مقاسات مختلفة. دايماً مع الأوزان او العبوات الأكبر بيبقى فيه نسبة توفير حوالى ١٠٪‏.

• العروض: الانترنت بقى مسهل الموضوع ده اوى. زورى صفحات السوبرماركتس إللى حواليكى و اعرفى أحسن العروض على المنتجات إللى ناوية تشتريها.

• اعملى كذا رحلة للسوبرماركت: متخلصيش ميزانيتك كلها اول الشهر. العروض فى كل حتة ليها تاريخ بتنتهى فيه و تنزل عروض جديدة. استفيدى من الموضوع ده بأنك تروحى السوبرماركت مرتين فى الشهر.

متروحيش السوبرماركت من غير ورقة الطلبات: بغض النظر عن العروض و كل كلام التوفير ده، لو انتى مش عارفة انتى محتاجة ايه هتقعدى تلفى و تلمى حاجات فى الكارت بتاعتك و خلاص.

النصيحة المشهورة “متعمليش شوبينج و انتى جعانة“. كل حاجة هيبقى شكلها مغرى و هيبقى عندك مليون فكرة لأكلات و هتحسى ان نفسك فى كل حاجة تقريياً.

• الحرمان مش توفير: انك تحرمى عيلتك او نفسك من حاجة هيجيب نتيجة عكسية. خصصي جزء من ميزانيتك للحاجات الغالية أو اشترى الحجم الاصغر.

• اعملى ميزانية للأطفال: لو ولادك بيلفوا و يجيبوا لك نص السوبرماركت، بدل ما تتخانقى معاهم عشان بيبوظوا الميزانية، اعملى حسابهم و خليهم يبقوا مسؤولين عن ميزانيتهم الشخصية.

• خزنى اثناء العروض: اشترى اللى يكفيكي لحد ما المنتج ده ينزل فى العرض تانى. كل حاجة بتنزل فى العروض كل فترة. تابعى كويس، خاصة العروض اللى بتبقى من الشركات المنتجة مباشرة.

خليكى دايماً عارفة الكميات إللى عندك مش بس إللى ناقص: اعملى ورقة او اكتبى فى ابليكيشن ايه اللى متخزن فى الفريزر و دولاب الخزين. عشان متشتريش فوق حاجتك و ترمى فى الزبالة لأن تاريخ صلاحيتها انتهى.

اعرفى هتدفعى كام من قبل ما تروحى: اكتبى ورقة الطلبات بتاعتك بالاسعار. معاكى زيادة لحد 10% لأن فيه حاجات سعرها بيتغير.

• راجعى الريسيت: كويس جداً. قبل ما تمشى من السوبرماركت. ساعات العروض مش بتتحسب او تتحسب غلط و ممكن منتج يتحسب مرتين و يضرب الميزانية خالص.

اعملى كروت النقاط و استفيدي بيها: بتعملها السوبرماركتس الكبيرة و هدفها انك ترجعى تشترى منهم تانى. النقاط دى لو ممكن تشترى بيها طلبات تانى تبقى حاجة ممتازة. المهم متنسيش تستبدليها قبل ما تنتهى و تضيعيها عليكي.

اعملى منيو و اشترى احتياجاتك للمنيو بس: ابتدى نظمى للغدا الاول، هو الاساس. دى اصعب حاجة فى التخطيط لكن هى اكتر حاجة بتوفر بجد.

• مترميش بواقى الاكل: اعملى بيها اكلة تانية. خاصة بواقى البروتين. كده تبقى عملتى غدا ليومين مرة واحدة. مترميش اكل تاني!

3 replies on “ازاى توفرى فى ميزانية السوبرماركت”

[…] ٩. تابعى عروض السوبرماركت و ركزى على المنظفات و مسحوق الغسيل لو عليهم عروض مش هيخسروا فى حاجة. لكن خلى بالك، ساعات بتبقى عروض فشنك و تدبسى فيها و خلاص، اشترى بس اللى يناسبك فى العروض. اعرفى ازاى توفرى فى ميزانية السوبرماركت من هنا. […]

[…] ١٠. تعملى ورقة باللى فى الفريزر: انا بأعمل جرد شهرى سريع كده للفريزر و التلاجة و دولاب الخزين. طبعاً ان يبقى فيه ورقة على باب الفريزر باللى فيه بتوفر وقت و مجهود. و اكيد الجرد الشهرى مع المنيو الأسبوعى بيساعدونى جدأ انى اوفر فى ميزانية السوبرماركت. […]

Leave a Reply

Your email address will not be published. Required fields are marked *