Categories
مع العيال

ازاى تنظفى و تعقمى الببرونات و أدوات الاكل

من اول يوم لازم تحافظى على أدوات اكل طفلك معقمة لأن معدة الطفل و جهازه المناعى بيكونوا غير مكتملين و احنا بنبقى عايزين نبعد عنه اى تلوث من بكيتريا او أمراض.

فيه تلات طرق أساسية للتعقيم بس قبلها لازم تغسلى الادوات كويس بمياه و صابون و تشطفيهم كويس بمياه جارية. هتغسلى الأدوات بعد كل استخدام. الببرونات بعد ما الرضعة إللى جواها ما تخلص و المعالق بعد كل اكلة. العلب بتتغسل أكيد بعد ما تفضى إللى جواها.

لازم تعرفى ان الببرونات بتتغير كل ٦ شهور و الحلمات الخاصة بيها كل ٣ شهور. و ممكن تغيريهم قبل كده لو لاحظتى اى تغيير فى لونهم، معناه تكون بكتريا او اى جزء مشروخ او مكسور عشان ميقعش فى بق الطفل.

أحسن حاجة انك تغسلى الأدوات بعد الاستخدام مباشرة عشان الاكل إللى فاضل عليها ميبوظش و يكون عفونة او بكتيريا على سطح الأدوات.

للغسيل استخدمى الفرشة المخصصة لغسيل أدوات الأطفال، متاحة فى كل محلات مستلزمات الأطفال و ميزتها انها بتبقى مصممة انها مش ممكن تحوش بقايا اكل و سطحها بيبقى مقاوم للبكتريا. و جهزى لطفلك علبة مياه بصابون جديدة مع كل غسلة و يفضّل لو تبقى خاصة بيه و مش من أدوات البيت.

التعقيم

اول طريقة هى الغلى. و دى اقدم طريقة. عشان تغلى الببرونات مثلاً ابدأى الاول أغلى المياه و بعدين حطى قطع الببرونة. اتأكدى من ان كل القطع متغطية تماماً بالمياه. غطى الحلة إللى بتغلى فيها عشان البخار يعقم اى اجزاء فوق سطح المياه. أغلى كل حاجة لمدة لا تقل عن ٥ دقايق. جمعى الببرونة اول ما تطلعيها من المياه عشان تفضل معقمة. متسيبيش الحاجة فى المياه لحد ما تبرد.

تانى طريقة هى التعقيم بالبخار. و ده ممكن تعمليه عن طريق جهاز كهربائى ممكن تشتريه من محلات مستلزمات الأطفال. بترصى الادوات جواه و تضيفي المياه و تشغليه حسب الإرشادات بتاعته. او عن طريق علبة الميكروويف، المخصصة لأدوات الأطفال. بتمليها كمية مياه مع الأدوات و بتحطيها فى الميكروويف عدد دقايق معين حسب حجمها. ميزة التعقيم بالطريقة دى، فى الحالتين، ان لو مفتحتيش العلبة او الجهاز هيحافظوا على الأدوات معقمة لمدة ٢٤ ساعة.

تالت طريقة هى التعقيم على البارد. و دى هتحتاجيلها سائل تعقيم، ممكن تلاقيه فى الصيدليات و محلات الأطفال. في علبة مخصوصة للتعقيم او محكمة الغلق، بتحطى كمية مياه و عليها كمية معينة من سائل التعقيم و معاهم الأدوات و تسيبيهم لمدة زمنية حسب الإرشادات إللى بتختلف مع كل سائل تعقيم. و بعدها بتشطفى الادوات بمياه جارية و تجمعيها. أنا بأستخدم الطريقة دى كمان فى تعقيم اللعب البلاستيك و العضاضات إللى مش ممكن تتعرض للحرارة.

حسب ما الدكتور بتاعك ينصحك ممكن تبدأى تخففى تدريجيا من تعقيم أدوات الاكل بعد سن ٦-٩ شهور.

دائماً راقبى ريحة و لون أدوات الاكل مع كل غسلة و دورة تعقيم.

لو بتفضلى طريقة تعقيم واحدة يبقى احرصى ان كل الادوات و الألعاب إللى هتشتريها تكون متطابقة مع الطريقة دى.